ବାରଙ୍ଗ,୧୭।୧୧(ଡି.ଏନ୍.ଏ.):ପ୍ରାଣୀ ଉଦ୍ୟାନ ନନ୍ଦନକାନନରେ ପର୍ଯ୍ୟଟକମାନଙ୍କର ଅନ୍ୟତମ ଆକର୍ଷଣ ଶିଶୁ ରେଳଗାଡ଼ି ମଙ୍ଗଳବାରଠାରୁ ବିଧିବଦ୍ଧଭାବେ ଚାଲିଛି। ପର୍ଯ୍ୟଟକଙ୍କୁ ଆକୃଷ୍ଟ କରିବା ସହ ସେମାନଙ୍କୁ ସୁଲଭ ମୂଲ୍ୟ ଓ ସୁବିଧାରେ ନନ୍ଦନକାନନ ବୁଲିବା ସୁଯୋଗ ଦେବା ଲକ୍ଷ୍ୟରେ ଏହି ଯୋଜନା ଆରମ୍ଭ କରାଯାଇଛି। ଏହି ଶିଶୁରେଳଗାଡିରେ ବୁଲିବାକୁ ହେଲେ ଜଣେ ଶିଶୁ ପର୍ଯ୍ୟଟକଙ୍କୁ ୩୦ଟଙ୍କା ଓ ବୟସ୍କ ପର୍ଯ୍ୟଟକ ଜଣକ ପିଛା ୫୦ଟଙ୍କା ଟିକେଟ ବାବଦରେ ଦେବାକୁ ପଡ଼ିବ। ପର୍ଯ୍ୟଟକଙ୍କ ସୁବିଧା ପାଇଁ ଦିନକୁ ୬ ଟ୍ରିପ କରିବା ସହିତ ପୂର୍ବାହ୍ନ ୧୦ଟାରୁ ଅପରାହ୍ନ ୪ଟା ଯାଏ ଶିଶୁ ରେଳଗାଡ଼ି ଚାଲିବ। ଟ୍ରେନ ଛାଡ଼ିବାର ଅଧାଘଣ୍ଟା ପୂର୍ବରୁ ପର୍ଯ୍ୟଟକମାନେ ଟିକଟ ସଂଗ୍ରହ କରିପାରିବେ। ମଙ୍ଗଳବାର ପ୍ରଥମ ଦିନରେ ୬ଟ୍ରିପରେ ମୋଟ ୨୨୨ଜଣ ପର୍ଯ୍ୟଟକ ଟିକେଟ କାଟି ଶିଶୁ ରେଳଗାଡିରେ ବସି ମଜା ଉଠାଇଥିଲେ। ସେମାନଙ୍କ ମଧ୍ୟରେ ୪୭ଜଣ ଶିଶୁ ଥିବାବେଳେ ୧୭୫ ଜଣ ବୟସ୍କ ପର୍ଯ୍ୟଟକ ଥିଲେ ବୋଲି ନନ୍ଦନକାନନ ଉପନିର୍ଦ୍ଦେଶକ ସଞ୍ଜିତ କୁମାର ସୂଚନା ଦେଇଛନ୍ତି। ଉଲ୍ଲେଖଥାଉକି, ଗତ ୧୪ତାରିଖରେ ଏହି ଶିଶୁ ରେଳଗାଡ଼ି ସେବା ଆରମ୍ଭ ହୋଇଥିବା ବେଳେ ୧୫ତାରିଖରେ ଯାନ୍ତ୍ରିକ ତ୍ରୁଟି ଯୋଗୁ ବନ୍ଦ ରହିଥିଲା।
