ହଂକଂ,୧୨ା୭: କରୋନା ମହାମାରୀ ସାରା ବିଶ୍ୱରେ ୧୨ ନିୟୁତରୁ ଅଧିକ ଲୋକଙ୍କୁ ସଂକ୍ରମିତ ହେଲାଣି। ଚାଇନା ଯେଉଁ ସମୟରେ ସଂକ୍ରମଣ ନେଇ ସୂଚନା ଦେଲା ତାହାର ବହୁ ପୂର୍ବରୁ ଜାଣିଥିଲା ବୋଲି ହଂକଂର ଜଣେ ଭୂତାଣୁ ବିଜ୍ଞାନୀ କହିଛନ୍ତି। ସରକାରଙ୍କ ଉଚ୍ଚ ସ୍ତରରେ କରୋନା ତଥ୍ୟକୁ ଲୁଚାଇ ରଖାଯାଇଥିଲା ବୋଲି ହଂକଂ ସ୍କୁଲ୍ ଅଫ୍ ପବ୍ଲିକ୍ ହେଲ୍ଥରେ ଭାଇରୋଲୋଜି ବିଶେଷଜ୍ଞ ଥିବା ଲି-ମେଙ୍ଗ୍ ୟାନ୍ ଶୁକ୍ରବାର ଗଣମାଧ୍ୟମକୁ ସାକ୍ଷାତକାର ଦେଇ କହିଛନ୍ତି। ସେ ହଂକଂରୁ ପଳାଇଯାଇ ଏବେ ଆମେରିକାରେ ରହୁଛନ୍ତି। ମାରାତ୍ମକ ଭୂତାଣୁ ମଣିଷ ଦେହକୁ ସଂକ୍ରମଣ ହେଉଥିବା ସମ୍ପର୍କରେ ଚାଇନା ସମଗ୍ର ବିଶ୍ୱକୁ ଜଣାଇବାର ଥିଲା। ସଂକ୍ରମଣ ଆରମ୍ଭ ବେଳେ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ସ୍ବୀକୃତିପ୍ରାପ୍ତ ଲାବରେଟୋରି ଇନ୍ଫ୍ଲୁଏଞ୍ଜା ଭୂତାଣୁ ଏବଂ ମହାମାରୀ ଉପରେ ଗବେଷଣା ଚଳାଇଥିଲା। ୟାନ୍ ଏହା ଉପରେ ଗବେଷଣା ଆରମ୍ଭ କରିଥିଲେ ହଁ ତାଙ୍କର ସୁପରଭାଇଜର ତଥା ବିଶେଷଜ୍ଞମାନେ ଏହାକୁ ଅଣଦେଖା କରିଥିଲେ। ସେ ବିଶ୍ୱର ପ୍ରଥମ ବୈଜ୍ଞାନିକ ଯିଏ କୋଭିଡ୍-୧୯ ଉପରେ ଅଧ୍ୟୟନ କରିଥିଲେ ମଧ୍ୟ ତାଙ୍କର ସୁପରଭାଇଜର ଡ. ଲିଓ ପୁନ୍ ଏହାକୁ ଚାଇନା ମୁଖ୍ୟ ଭୂଖଣ୍ଡରୁ ଗତବର୍ଷ ଡିସେମ୍ବରରେ ଆସିଥିବା ସାର୍ସ ଭଳି ଭୂତାଣୁ ବୋଲି କହିଥିଲେ। ହଂକଂ କିମ୍ବା ଅନ୍ୟ ଦେଶର ଗବେଷକ ଚାଇନାରେ ଭୂତାଣୁ ଉପରେ ଗବେଷଣା କରିବାକୁ ବେଜିଂ ଚାହୁଁ ନ ଥିଲା।