ଭୁବନେଶ୍ୱର, ୮।୨ (ତପନ ସ୍ବାଇଁ): କଳିଙ୍ଗ ଷ୍ଟାଡିୟମରେ ଚାଲିଥିବା ଏଫ୍ଆଇଏଚ୍ ମହିଳା ହକି ପ୍ରୋ ଲିଗ୍ରେ ବୁଧବାର ଚାଇନା ୩-୧ ଗୋଲରେ ଆମେରିକାକୁ ପରାସ୍ତ କରିଛି। ଚଳିତ ଲିଗ୍ରେ ଚାଇନାର ଏହାଥିଲା ୪ ମ୍ୟାଚରୁ ତୃତୀୟ ବିଜୟ। ଏଥିସହ ଦଳ ଏହାର ଭୁବନେଶ୍ୱର ଚରଣ ଶେଷ କରିଛି। ଭାରତକୁ ୨-୧ ଗୋଲରେ ହରାଇ ଅଭିଯାନ ଆରମ୍ଭ କରିଥିବା ଚାଇନା ପରବର୍ତ୍ତୀ ମ୍ୟାଚରେ ଅଷ୍ଟ୍ରେଲିଆକୁ ୩-୦ରେ ପରାସ୍ତ କରିଥିଲା। ପରବର୍ତ୍ତୀ ମ୍ୟାଚରେ ଦଳ ନେଦରଲାଣ୍ଡ୍ସଠାରୁ ୧-୩ ଗୋଲରେ ପରାଜିତ ହୋଇଥିବାବେଳେ ଏବେ ଆମେରିକାକୁ ହରାଇ ସଫଳ ପ୍ରତ୍ୟାବର୍ତ୍ତନ କରିଛି। ଚାଇନା ୯ ପଏଣ୍ଟ ସହିତ ଟେବୁଲର ଦ୍ୱିତୀୟ ସ୍ଥାନରେ ରହିଛି। ବୁଧବାର ମ୍ୟାଚରେ ଚାଇନା ପକ୍ଷରୁ ଜୋଉ ମେରଙ୍ଗ ୮ମ ମିନିଟରେ ଗୋଟିଏ ଏବଂ ଡାନ୍ ଓ୍ବେଙ୍ଗ୍ ୨୬ ଓ ୪୭ତମ ମିନିଟରେ ୨ଟି ଫିଲ୍ଡ ଗୋଲ ଦେଇଥିଲେ। ଆମେରିକା ପକ୍ଷରୁ ସୁମଫେଷ୍ଟ ଜ୍ୟାକଲିନ୍ ୫୮ତମ ମିନିଟରେ ଗୋଟିଏ ଗୋଲ ପରିଶୋଧ କରିଥିଲେ।
ମ୍ୟାଚର ୪ଟି ଯାକ କ୍ୱାର୍ଟରରେ ଚାଇନା ପ୍ରାଧାନ୍ୟ ବିସ୍ତାର କରି ଖେଳିଥିଲା। ଟୁର୍ନାମେଣ୍ଟରେ ଏପର୍ଯ୍ୟନ୍ତ ଆକ୍ରମଣାତ୍ମକ ରଣନୀତିରେ ଖେଳି ଆସିଥିବା ଏହି ଦଳ ଏଠାରେ ମଧ୍ୟ ସମାନ ଯୋଜନାରେ ସଫଳ ହୋଇଥିଲା। ପ୍ରଥମ କ୍ୱାର୍ଟରରେ ମେରଙ୍ଗ୍ଙ୍କ ଗୋଲ ଆମେରିକା ଉପରେ ଚାପ ପ୍ରୟୋଗ କରିଥିଲା। ଦ୍ୱିତୀୟ କ୍ୱାର୍ଟରରେ ମଧ୍ୟ ଅନୁରୂପ ଅବସ୍ଥା। ୨୬ତମ ମିନିଟରେ ଓ୍ବେଙ୍ଗ୍ ନିଜ ପ୍ରଥମ ଗୋଲ ଦେଇ ପ୍ରଥମାର୍ଦ୍ଧ ଶେଷ ବେଳକୁ ଚାଇନାର ଅଗ୍ରଣୀ ବ୍ୟବଧାନକୁ ୨-୦ରେ ପହଞ୍ଚାଇ ଦେଇଥିଲେ। ତୃତୀୟ କ୍ୱାର୍ଟରରେ ଗୋଲ ହୋଇ ନ ଥିବାବେଳେ ୪ର୍ଥ ତଥା ଅନ୍ତିମ କ୍ୱାର୍ଟରରେ ଗୋଲ ପରିଶୋଧ ପାଇଁ ଆମେରିକା ଭରପୂର ପ୍ରୟାସ କରିଥିଲା। ତେବେ ୪୭ତମ ମିନିଟରେ ଓ୍ବେଙ୍ଗ୍ଙ୍କ ବ୍ୟକ୍ତିଗତ ଦ୍ୱିତୀୟ ଗୋଲ ଚାଇନାକୁ ଡ୍ରାଇଭର ଶିଟ୍ରେ ବସାଇ ଦେଇଥିଲା। କେବଳ ଏହି କ୍ୱାର୍ଟରରେ ଆମେରିକା ୭ଟି ପେନାଲ୍ଟି କର୍ନର ପାଇଥିଲା। ତେବେ ଏଥିରୁ ଗୋଟିଏକୁ କେବଳ ଗୋଲରେ ପରିଣତ କରି ପାରିଥିଲା। ଓଭରଅଲ୍ ଦେଖିବାକୁ ଗଲେ ପୂରା ମ୍ୟାଚରେ ଚାଇନା ୫ଟି ଓ ଆମେରିକା ୧୦ଟି ପେନାଲ୍ଟି କର୍ନର ପାଇଥିଲା। ମାତ୍ର ଚାଇନାର କୌଶଳ ଆଗରେ ଆମେରିକା ହାର ମାନିବାକୁ ବାଧ୍ୟ ହୋଇଥିଲା।
