ବେଜିଂ,୭।୧୧: ଚାଇନାକୁ ବିଶ୍ୱାସ କରିଥିବା ଦେଶ ଏବେ ପଶ୍ଚାତାପ କରୁଛନ୍ତି। ବନ୍ଧୁ ବୋଲି କହି ଚାଇନା ସେମାନଙ୍କୁ ଠକି ଦେଇଛି। ୪ଟି ବନ୍ଧୁଦେଶକୁ ଚାଇନା ନକଲି ଅସ୍ତ୍ରଶସ୍ତ୍ର ବିକ୍ରି କରିଛି। ଏବେ ଏହି ଘଟଣା ଧରା ପଡ଼ିଛି। ବାଂଲାଦେଶ, ନେପାଳ, ପାକିସ୍ତାନ ଏବଂ କେନିଆକୁ ଚାଇନା ନକଲି ଅସ୍ତ୍ରଶସ୍ତ୍ର ଯୋଗାଇ ଦେଇଛି। ବାଲାଂଦେଶକୁ ୨୦୧୭ରେ ଚାଇନା ୦୩୫-ଜି ବୁଡ଼ାଜାହାଜ ବିକ୍ରି କରିଥିଲା। ଏହାର ଦାମ ୧୦୦ ନିୟୁତ ଡଲାର ଥିଲା। ତେବେ ଏଥିରେ ବହୁ ତ୍ରୁଟି ରହିଥିବା ଜଣାପଡ଼ିଛି। ସେହିପରି ୨୦୦୩ର କିଇାଯାଇଥିବା ଏକ ମିଙ୍ଗ୍ ବର୍ଗର ଯୁଦ୍ଧପୋତ ଦୁର୍ଘଟଣାଗ୍ରସ୍ତ ହୋଇଛି। ଅପରପକ୍ଷରେ ବିଏନ୍ଏସ୍ ଓମାର ଫାରୁକ୍ ଏବଂ ବିଏନ୍ଏସ୍ ଅବୁ ଉବୈଦାହର ନାଭିଗେଶନ ରାଡ଼ାର ଏବଂ ଗନ୍ ସିଷ୍ଟମ୍ରେ ତ୍ରୁଟି ରହିଥିବା ଜଣାପଡ଼ିଛି। ନେପାଳ ଚାଇନାଠାରୁ ୬ଟି ବିମାନ କିଣିଥିଲା। ଓ୍ବାଇ-୧୨-ଇ ଏବଂ ଏମ୍ଏ-୬୦ ବର୍ଗର ଏହି ବିମାନ ଗୁଡ଼ିକୁ ବାଲାଂଦେଶ କିଣିବାକୁ ମନା କରି ଫେରାଇ ଦେବାରୁ ଏସବୁକୁ ନେପାଳକୁ ବିକ୍ରି କରାଯାଇଥିଲା। ବିମାନ ଗୁଡ଼ିକ ନେପାଳକୁ ଆସିବା ପରେ ଖରାପ ହୋଇଯାଇଥିଲା। ବିମାନଗୁଡ଼ିକର ଯନ୍ତ୍ରାଶଂ ଏବେ ଆଉ ବଜାରରେ ଉପଲବ୍ଧ ହେଉ ନ ଥିବାରୁ ନେପାଳରେ ଏସବୁ ଖତ ଖାଉଛି। ସେହିପରି ପାକିସ୍ତାନର ମିତ୍ର ଦେଶ ବୋଲାଉଥିବା ଚାଇନା ଯୁଦ୍ଧପୋତ ଏଫ୍-୨୨-ପି ବିକ୍ରି କରିଥିଲା। ତେବେ ଏଥିରେ ବହୁ ଯାନ୍ତ୍ରିକ ତ୍ରୁଟି ରହିଥିବା ଜଣାପଡ଼ିଥିଲା। ଏହାର ସର୍ଭିସିଂ ପାଇଁ ପାକିସ୍ତାନ ଅନୁରୋଧ କରିଥିଲା। ତେବେ ଆଉ ଲାଭ ନ ମିଳିବା ଜାଣିବା ପରେ ଚାଇନା ଅନୁରୋଧକୁ ଅଣଦେଖା କରିଥିଲା। କେନିଆକୁ ମଧ୍ୟ ଚାଇନା ଠକିଥିବା ଜଣାପଡ଼ିଛି। କେନିଆ ଚାଇନାଠାରୁ ଅସ୍ତ୍ରଶସ୍ତ୍ର ବୋଝେଇ ଗାଡ଼ି କିଣିଥିଲା। ଚାଇନାର ସେଲସ୍ ରିପ୍ରେଜେଣ୍ଟଟିଭ୍ ଏଥିରେ ବସି ଟେଷ୍ଟ୍ କରିବାକୁ ମନା କରିଥିଲେ। ଏଥିରେ ଯାନ୍ତ୍ରିକ ତ୍ରୁଟି ଥିବାରୁ ପରବର୍ତ୍ତୀ ସମୟରେ ଏହି ଗାଡ଼ିରେ ଯାଉଥିବା ସମୟରେ ବିସ୍ଫୋରଣ ଯୋଗୁ ବହୁ ସୈନ୍ୟଙ୍କ ମୃତ୍ୟୁ ଘଟିଥିଲା।