ନୂଆଦିଲ୍ଲୀ,୬ା୪: ଅରୁଣାଚଳ ପ୍ରଦେଶସ୍ଥିତ ୧୧ଟି ସ୍ଥାନର ନାମ ପରିବର୍ତ୍ତନ ପରେ ଏହି ଭୂଖଣ୍ଡ ଉପରେ ଚାଇନା ନିଜ ସାର୍ବଭୌମତ୍ୱ ଦାବି କରିଛି। ଚାଇନାର ଗୃହ ବ୍ୟାପାର ମନ୍ତ୍ରଣାଳୟ ପକ୍ଷରୁ ରବିବାର ଏକ ତାଲିକା ଜାରି କରାଯାଇଥିଲା। ଏଥିରେ ଅରୁଣାଚଳ ପ୍ରଦେଶସ୍ଥିତ ୧୧ଟି ସ୍ଥାନର ନୂତନ ନାମକରଣ କରାଯାଇଛି। ସେହି ସ୍ଥାନଗୁଡ଼ିକୁ ଷ୍ଟେଟ୍ କାଉନ୍ସିଲର ଅନୁମୋଦନକ୍ରମେ ଚାଇନା ଓ ତିବ୍ବତୀୟ ଭାଷାରେ ନୂଆ ନାମ ଦିଆଯାଇଛି। ୨ଟି ଭୂଭାଗ, ୨ ଆବାସିକ ଅଞ୍ଚଳ, ୫ ପର୍ବତ ଓ ୨ଟି ନଦୀର ନାମ ବଦଳାଯିବା ସହ ସେଗୁଡ଼ିକ ଚାଇନାର କେଉଁ ପ୍ରଶାସନିକ ଜିଲା ଅଧୀନରେ ଆସୁଛି ତାହା ମଧ୍ୟ ଉକ୍ତ ତାଲିକାରେ ଉଲ୍ଲେଖ କରାଯାଇଛି।
ଅନ୍ୟପକ୍ଷେ ଭାରତର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରିନ୍ଦମ୍ ବାଗ୍ଚୀ ଏକ ବିବୃତିରେ କହିଥିଲେ, ଚାଇନା ପ୍ରଥମ ଥର ପାଇଁ ଏପରି ଉଦ୍ୟମ କରିନାହିଁ। ଏହାକୁ ଆମେ ସମ୍ପୂର୍ଣ୍ଣ ଭାବେ ପ୍ରତ୍ୟାଖ୍ୟାନ କରୁଛୁ। ନାମ ପରିବର୍ତ୍ତନ କରିଦେଲେ ବାସ୍ତବତା ବଦଳିଯାଏ ନାହିଁ। ଅରୁଣାଳ ପ୍ରଦେଶ ଭାରତର ଅବିଚ୍ଛେଦ୍ୟ ଅଙ୍ଗ ଥିଲା, ଅଛି ଓ ରହିବ। ଏହାର ଜବାବରେ ଚାଇନା ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ମାଓ ନିଙ୍ଗ୍ କହିଛନ୍ତି,ଜାଙ୍ଗ୍ନାଙ୍ଗ (ଅରୁଣାଚଳ ପ୍ରଦେଶ)
ଚାଇନାର ଅବିଚ୍ଛେଦ୍ୟ ଅଙ୍ଗ। ଚାଇନା ସରକାର ଓ ଷ୍ଟେଟ୍ କାଉନ୍ସିଲ ନିଷ୍ପତ୍ତିକ୍ରମେ ଏହି ନାମ ବଦଳାଯାଇଛି। କାରଣ ଏହା ହେଉଛି ଚାଇନାର ସାର୍ବଭୌମ ଅଧିକାର। ଇତିମଧ୍ୟରେ ଚାଇନାର ବିସ୍ତାରବାଦୀ ଉଦ୍ୟମକୁ ଆମେରିକା କଡ଼ା ବିରୋଧ କରିଛି। ଭାରତୀୟ ଭୂଖଣ୍ଡକୁ ଦଖଲ କରିବା ପାଇଁ ବେଜିଂ ଅରୁଣାଚଳର ନାମ ବଦଳାଇଥିବା ହ୍ବାଇଟ୍ ହାଉସ୍ ପକ୍ଷରୁ କୁହାଯାଇଛି। ଚାଇନାର କୌଣସି ପ୍ରକାର ଏକତରଫା ନିଷ୍ପତ୍ତିକୁ ଆମେରିକା ବିରୋଧ ଜାରି ରଖିବ। ଅରୁଣାଚଳ ପ୍ରଦେଶ ଭାରତର ଅବିଚ୍ଛେଦ୍ୟ ଅଙ୍ଗ ବୋଲି ହ୍ବାଇଟ୍ ହାଉସ୍ ପ୍ରେସ୍ ସେକ୍ରେଟାରୀ କେରାଇନ୍ ଜିନ୍-ପିଏରେ କହିଛନ୍ତି।