ଇଟାନଗର,୧୦।୪: କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଅରୁଣାଚଳ ପ୍ରଦେଶ ଗସ୍ତ କରିଛନ୍ତି। କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ସୋମବାର ଆସାମର ଦିବ୍ରୁଗଡ଼ରେ ପହଞ୍ଚିଥିଲେ। ସେଠାରେ ମୁଖ୍ୟମନ୍ତ୍ରୀ ହେମନ୍ତ ବିଶ୍ୱ ଶର୍ମା ତାଙ୍କୁ ସ୍ବାଗତ କରିଥିଲେ। ଏହାପରେ ଅମିତ ଶାହା ଅରୁଣାଚଳ ପ୍ରଦେଶ ଗସ୍ତ କରିଥିଲେ। ଯେଉଁଠାରେ ସେ ଭାରତ-ଚାଇନା ସୀମାରେ ଥିବା ଏକ ଗ୍ରାମ କିବିଥୁରେ ‘ଭାଇବ୍ରେଣ୍ଟ ଭିଲେଜ ପୋଗ୍ରାମ’ର ଶୁଭାରମ୍ଭ କରିବେ। ଏହି ବଜେଟରେ ସରକାର ‘ଭାଇବ୍ରେଣ୍ଟ ଭିଲେଜ ପୋଗ୍ରାମ’ର ଘୋଷଣା କରିଥିଲେ। ଚାଇନା ସୀମାଠାରୁ କିବିଥୁ ଗ୍ରାମ ମାତ୍ର ଏକ କିଲୋମିଟର ଦୂରରେ। ସ୍ବରାଷ୍ଟ୍ରମନ୍ତ୍ରୀ ଅରୁଣାଚଳ ପ୍ରଦେଶର ଅଞ୍ଜୱା ଜିଲାର କିବିଥୁରେ ଆଇଟିବିପି ଯବାନଙ୍କ ସହ ଆଲୋଚନା କରିବେ। ସେହିପରି ମଙ୍ଗଳବାର ଶାହା ଆସାମର ଦିବ୍ରୁଗଡରେ ଏକ ସାଧାରଣ ସଭାକୁ ସମ୍ବୋଧିତ କରିବା ବ୍ୟତୀତ ଭାଜପା ଜିଲା କାର୍ଯ୍ୟାଳୟର ଶିଳାନ୍ୟାସ କରିବେ। ସ୍ବରାଷ୍ଟ୍ରମନ୍ତ୍ରୀ ଏପ୍ରିଲ ୧୧ରେ ନମତି ଅଞ୍ଚଳ ପରିଦର୍ଶନ କରିବେ ଏବଂ ୱାଲଙ୍ଗ ଯୁଦ୍ଧ ସ୍ମାରକରେ ଶ୍ରଦ୍ଧାଞ୍ଜଳି ଅର୍ପଣ କରିବେ। ଅନ୍ୟପଟେ ଅମିତ ଶାହାଙ୍କ ଏହି ଗସ୍ତ ଉପରେ ଚାଇନା ଆପତ୍ତି ଉଠାଇଛି। ଚାଇନା ବୈଦେଶିକ ମନ୍ତ୍ରୀଙ୍କ ମୁଖପାତ୍ର କହିଛନ୍ତି, ଏହା ସୀମା ପାଇଁ ଅନୁକୂଳ ନୁହେଁ, ସ୍ବରାଷ୍ଟ୍ରମନ୍ତ୍ରୀଙ୍କ ଏହି ଗସ୍ତ ଚାଇନାର ଆଞ୍ଚଳିକ ସାର୍ବଭୌମତ୍ୱକୁ ଉଲ୍ଲଂଘନ କରିଛି। ଆଉ ଏହାକୁ ଚାଇନା ବିରୋଧ କରୁଛି କାରଣ ଜଙ୍ଗନାନ ଅଞ୍ଚଳ ଚାଇନାର ଅଞ୍ଚଳ ଅଧୀନରେ ଆସୁଛି।