ଓ୍ବାଶିଂଟନ, ୨୮।୮(ଆଇଏଏନ୍ଏସ୍):ଆମେରିକା ଓ ଚାଇନା ମଧ୍ୟରେ ସମ୍ପର୍କ ତିକ୍ତ ହେବାରେ ଲାଗିଛି। ସଦସ୍ୟ ଦକ୍ଷିଣ ଚାଇନା ସାଗରର ସାମରିକୀକରଣ ଲାଗି ଚାଇନା ସରକାରୀ ସଦସ୍ୟମାନଙ୍କୁ ଦାୟୀ କରି ଆମେରିକା ସେମାନଙ୍କ ଭିଜାକୁ ନିଷିଦ୍ଧ କରିଛି। ଏହାର କିଛି ସମୟ ପୂର୍ବରୁ ବେଜିଂ ବିବାଦୀୟ ସାଗର ମଧ୍ୟକୁ ଦୁଇଟି କ୍ଷେପଣାସ୍ତ୍ର ଛାଡ଼ିଥିଲା। ବିମାନବାହୀ ରଣତରୀକୁ ଧ୍ୱଂସ କରିବା କ୍ଷମତା ଉକ୍ତ କ୍ଷେପଣାସ୍ତ୍ରର ରହିଛି।
ଦକ୍ଷିଣ ଚାଇନା ମର୍ନିଂ ପୋଷ୍ଟ ରିପୋର୍ଟ ଅନୁଯାୟୀ ଚାଇନା ବୁଧବାର କିଙ୍ଘାଇ ପ୍ରଦେଶରୁ ମଧ୍ୟମ ଦୂରଗାମୀ ବାଲିଷ୍ଟିକ୍ ମିଶାଇଲ୍ ଡିଏଫ୍-୨୬ବି ଏବଂ ଝେଜିଆଙ୍ଗରୁ ଡିଏଫ୍-୨୧ଡି ବାଲିଷ୍ଟିକ୍ ମିଶାଇଲ ସମୁଦ୍ର ମଧ୍ୟକୁ ଛାଡ଼ିଥିଲା। ଫଳରେ ଆମେରିକାକୁ ଚାଇନା କମ୍ୟୁନିଷ୍ଟ ପାର୍ଟି ସରକାର, ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ଏବଂ ଏହାର କାରବାର ଉପରେ ଅଭୂତପୂର୍ବ କାର୍ଯ୍ୟାନୁଷ୍ଠାନ ନେବାକୁ ବାଧ୍ୟ କରିଛି। ସମୁଦ୍ର ମଧ୍ୟରେ ଯେକୌଣସି ଗତିଶୀଳ ଟାର୍ଗେଟକୁ ଧ୍ୱଂସ କରିଦେବା ପାଇଁ ଡିଏଫ୍-୨୬ବି ସକ୍ଷମ ବୋଲି ଚାଇନା ସରକାରଙ୍କ ମୁଖପତ୍ର ଗ୍ଲୋବାଲ ଟାଇମ୍ସରେ କୁହାଯାଇଛି। ସେଥିପାଇଁ ଏହାର ନାଁ ରଖାଯାଇଛି ‘ଏୟାରକ୍ରାଫ୍ଟ-କ୍ୟାରିୟର କିଲର’। ଏହାର ଲକ୍ଷ୍ୟଭେଦ କ୍ଷମତା ୪,୫୦୦ କିଲୋମିଟର ହୋଇଥିବାରୁ ଏହା ପଶ୍ଚିମ ପ୍ରଶାନ୍ତ ମହାସାଗର, ଭାରତ ମହାସାଗର ସମେତ ଗୁଆମ୍ରେ ଥିବା ଆମେରିକୀୟ ନୌସେନା ଘାଟି, ଡିଏଗୋ ଗାର୍ସିଆର ବ୍ରିଟିଶ ଆଇଲାଣ୍ଡ ଏବଂ ଏପରିକି ଅଷ୍ଟ୍ରେଲିଆର ଡାର୍ଓ୍ବିନ ସହରରେ ପହଞ୍ଚତ୍ପାରିବ। ଡିଏଫ୍-୨୧ଡି ମଧ୍ୟ ଏକ ଜାହାଜ ବିଧ୍ୱଂସୀ ମିଶାଇଲ ସିଷ୍ଟମ।
ଆମେରିକାର ଗୁପ୍ତଚର ବିମାନ ଚାଇନା ବାୟୁସୀମା ଅତିକ୍ରମ କରିବା ପରେ ବେଜିଂ ହୈନାନ ପ୍ରଦେଶ ଓ ବିବାଦୀୟ ପାରାସେଲ ଆଇଲାଣ୍ଡ୍ସ ଅଞ୍ଚଳ ମଧ୍ୟରେ ଦୁଇଟି କ୍ଷେପଣାସ୍ତ୍ର ମାଡ଼ କରିଥିଲା ବୋଲି ଚାଇନା କମ୍ୟୁନିଷ୍ଟ ପାର୍ଟି ପକ୍ଷରୁ କୁହାଯାଇଛି। ଏସୀୟ ଦେଶଗୁଡ଼ିକର ଲାଇଫ୍ଲାଇନ ଭାବେ କାର୍ଯ୍ୟ କରୁଥିବା ଦକ୍ଷିଣ ଚାଇନା ସାଗରରେ ଚାଇନା ନିଜର ସାର୍ବଭୌମତ୍ୱ ଜାହିର କରୁଥିବା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ପ୍ରଶାସନ ପକ୍ଷରୁ କୁହାଯାଇଛି। ଚାଇନାର ଉହାନ ସହରରୁ ସୃଷ୍ଟ କରୋନା ଭୂତାଣୁ ସମ୍ପର୍କରେ ବେଜିଂ ତଥ୍ୟ ଲୁଚାଇବାରୁ ଏହା ସାରା ବିଶ୍ୱକୁ ବ୍ୟାପିଲା। ଏହି ମହାମାରୀ ପାଇଁ ଆମେରିକା ଚାଇନାକୁ ଦାୟୀ କରିଆସୁଛି। ସେବେଠାରୁ ଦୁଇଦେଶ ମଧ୍ୟରେ ସମ୍ପର୍କ ତିକ୍ତ ହେବାରେ ଲାଗିଛି।