ନୂଆଦିଲ୍ଲୀ,୧୩ା୨ : ବେଜିଂ ନିଜ ବିସ୍ତାରବାଦୀ ମହତ୍ତ୍ୱାକାଂକ୍ଷାକୁ ଚରିତାର୍ଥ କରିବା ପାଇଁ ଭାରତ-ଚାଇନା ମଝିରେ ଥିବା ଅନ୍ତର୍ଜାତୀୟ ସୀମା ସଂଲଗ୍ନ ଅଞ୍ଚଳକୁ ଦଖଲ ଲାଗି ନିର୍ମାଣ କାର୍ଯ୍ୟ ଜାରି ରଖିଛି। ଲଦାଖର ପାଙ୍ଗୋଙ୍ଗ୍ ହ୍ରଦ, ତିବ୍ଦତ, ଅରୁଣାଚଳ ପ୍ରଦେଶ ଓ ସିକିମ୍ରେ ଚାଇନାର ପିପୁଲ୍ସ ଲିବରେଶନ୍ ଆର୍ମି (ପିଏଲ୍ଏ) ସୈନ୍ୟ ଭାରତୀୟ ସେନାକୁ ପ୍ରତିହତ କରିବାକୁ ଜଗିରହିଛନ୍ତି।
ଭାରତୀୟ ସେନା ଯୁଦ୍ଧ ଭଳି ସ୍ଥିତିର ମୁକାବିଲା ପାଇଁ ସକ୍ଷମ ଓ ପ୍ରସ୍ତୁତ ହୋଇ ରହିଥିବା କହୁଥିଲେ ହେଁ ପ୍ରକୃତ ନିୟନ୍ତ୍ରଣରେଖା (ଏଲ୍ଏସି) ସଂଲଗ୍ନ ଅଞ୍ଚଳରେ ପିଏଲ୍ଏ ପକ୍ଷରୁ ଏୟାରଷ୍ଟ୍ରିପ୍ ଓ ବ୍ରିଜ୍ ନିର୍ମାଣ ଚାଲିଛି। ପାଙ୍ଗୋଙ୍ଗ୍ ହ୍ରଦ ଦକ୍ଷିଣ ପାର୍ଶ୍ୱରେ ଯୁଦ୍ଧକାଳୀନ ଭିତ୍ତିରେ ଚାଇନା ୮ ମିଟର ଦୈର୍ଘ୍ୟ ବିଶିଷ୍ଟ ଏକ ବ୍ରିଜ୍ ନିର୍ମାଣ କରୁଛି। ହାଡ଼ଭଙ୍ଗା ଶୀତରେ ମଧ୍ୟ ଏହି ନିର୍ମାଣ କାର୍ଯ୍ୟ ଅବ୍ୟହତ ରହିଥିବା ଉପଗ୍ରହ ଚିତ୍ରରୁ ଜଣାପଡ଼ିଛି। ୨୦୨୦ରେ ଦୁଇଦେଶର ସୈନ୍ୟ ମୁହଁାମୁହିଁ ହୋଇଥିବା ସମୟରେ ଚାଇନା ଏହି ଅଞ୍ଚଳରେ କେତେକ ଅସ୍ଥାୟୀ ହସ୍ପିଟାଲ ଓ ଗୋଦାମ ନିର୍ମାଣ କରିଥିଲା।
୨୦୨୦ ଜୁନ୍ ୧୫ ରାତିରେ ପୂର୍ବ ଲଦାଖରେ ଭାରତୀୟ ଯବାନ ଏବଂ ପିଏଲ୍ଏ ସୈନ୍ୟଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ହୋଇଥିଲା। ଏଥିରେ ୨୦ ଯବାନ ଶହୀତ ହୋଇଥିବାବେଳେ ଚାଇନାର ୪୨ ସୈନ୍ୟ ନିହତ ହୋଇଥିଲେ। ୨୦୨୨ ଡିସେମ୍ବର ୯ରେ ପିଏଲ୍ଏ ୧୭,୦୦୦ ଫୁଟ୍ ଉଚ୍ଚରେ ଥିବା ତଥା ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଅରୁଣାଚଳ ପ୍ରଦେଶର ୟାଙ୍ଗ୍ସେ ଅଞ୍ଚଳକୁ ଦଖଲ ଉଦ୍ୟମ କରିଥିଲା। ସେହିଦିନ ପ୍ରତିପକ୍ଷର ୩୦୦ ସୈନ୍ୟ ଯୋଜନାବଦ୍ଧ ଭାବେ ଉକ୍ତ ଅଞ୍ଚଳକୁ ମାଡ଼ିଆସିଥିବାବେଳେ ସଂଘର୍ଷରେ ଭାରତର ୩୪ ଓ ଚାଇନାର ୪୦ ସୈନ୍ୟ ଆହତ ହୋଇଥିଲେ।
ସିକିମର ନାଥୁଲାରେ ମଧ୍ୟ ଚାଇନାର କୁଚକ୍ରୀ ଷଡ଼ଯନ୍ତ୍ର ଦେଖିବାକୁ ମିଳିଛି। ୧୯୬୭ ସେପ୍ଟେମ୍ବରରେ ଉଭୟ ପକ୍ଷ ମଧ୍ୟରେ ସଂଘର୍ଷ ଘଟିଥିଲା। ଏଥିରେ ଭାରତୀୟ ସେନାର ୮୮ ଓ ଚାଇନାର ୩୪୦ ସୈନ୍ୟଙ୍କ ମୃତ୍ୟୁ ଘଟିଥିଲା। ପୂର୍ବ ଲଦାଖ ବିବାଦର ସମାଧାନ ହୋଇଥିବା ବିଷୟ କୁହାଯାଉଥିଲେ ମଧ୍ୟ ଚାଇନା ଏହି ଅଞ୍ଚଳକୁ ଦଖଲ ପାଇଁ ଜୋର୍ଦାର ଉଦ୍ୟମ କରୁଛି। ଏନେଇ ଗତ ସପ୍ତାହରେ ନୂଆଦିଲ୍ଲୀରେ ଅନୁଷ୍ଠିତ ଡିଜିପି ଏବଂ ଆଇଜିପି ବୈଠକରେ ମଧ୍ୟ ଉପସ୍ଥାପନ କରାଯାଇଥିଲା। ସୀମାନ୍ତ ଅଞ୍ଚଳରେ ପର୍ଯ୍ୟଟନର ବିକାଶ ଉପରେ କେନ୍ଦ୍ର ଗୁରୁତ୍ୱ ଦେଉଥିବା ବିଷୟ ପ୍ରତିରକ୍ଷା ରାଷ୍ଟ୍ରମନ୍ତ୍ରୀ ଅଜୟ ଗଣମାଧ୍ୟମକୁ କହିଛନ୍ତି।