ବେଜିଂ,୧୦।୧ : ଚାଇନାରେ କରୋନା ମହାମାରୀ ସଂକ୍ରମଣ ଅଣାୟତ୍ତ ସ୍ଥିତିରେ ରହିଛି। କେତେକ ଦେଶ ଏବେ ଚାଇନାରୁ ଆସୁଥିବା ଯାତ୍ରୀଙ୍କ ଉପରେ କଟକଣା ଜାରି କରିଛନ୍ତି। ଏହାକୁ ନେଇ ଚାଇନା କ୍ରୋଧ ପ୍ରକାଶ କରିବା ସହିତ ଏହାକୁ ନିନ୍ଦା କରିଛି। ଏବେ ଚାଇନା ଦକ୍ଷିଣ କୋରିଆ ନାଗରିକଙ୍କୁ ମିଳୁଥିବା ଶର୍ଟ ଟର୍ମ ଭିଜା ଉପରେ କଟକଣା ଜାରି କରିଛି। ଏନେଇ ଦକ୍ଷିଣ କୋରିଆରେ ଥିବା ଚାଇନା ଦୂତାବାସ ପକ୍ଷରୁ ବିବୃତି ପ୍ରକାଶ ପାଇଛି।
ପ୍ରତିହିଂସା ପରାୟଣ ହୋଇ ଚାଇନା ଏଭଳି କରିଥିବା କୁହାଯାଉଛି। ଦକ୍ଷିଣ କୋରିଆ ଚାଇନା ନାଗରିକଙ୍କ ଉପରେ ଲାଗୁ କରିଥିବା କରୋନା କଟକଣା ଉଠାଇବାପରେ ଭିଜା ପ୍ରସଙ୍ଗ ଉପରେ ବିଚାର କରାଯିବ ବୋଲି ଚାଇନା ଦୂତାବାସ ପକ୍ଷରୁ ସୂଚନା ପ୍ରଦାନ କରାଯାଇଛି। ଚାଇନା ବୈଦେଶିକ ମନ୍ତ୍ରୀ କିନ ଗେଙ୍ଗ ଦକ୍ଷିଣ କୋରିଆର କଟକଣାକୁ ଭେଦଭାବ ପୂର୍ଣ୍ଣ ବୋଲି କହିଥିଲେ। ଏହା ସହିତ ଦକ୍ଷିଣ କୋରିଆ ପ୍ରତିପକ୍ଷ ପାର୍କ ଜିନଙ୍କ ସହିତ ଟେଲିଫୋନରେ କଥାବାର୍ତ୍ତା କରିଥିଲେ। କଥାବାର୍ତ୍ତା ହେବାର ଗୋଟିଏ ଦିନ ପରେ ଚାଇନା ଭିଜା କଟକଣା ଲାଗୁ କରିଛି।
