ବେଜିଂ,୧୩ ।୨: କୁଟିଳତା ଓ ଚାଲକିରେ ସମସ୍ତଙ୍କୁ ପଛରେ ପକାଇ ଦେଉଥିବ ଚାଇନା ଏବେ ତିବ୍ୱତରେ ପଇନ୍ତରା ଆରମ୍ଭ କରିଦେଇଛି । ବିକାଶ ନାଁରେ ତିବ୍ୱତରେ ଦ୍ରୁତ ଗତିରେ ସେନା ଢାଞ୍ଚାକୁ ବଢାଇବାରେ ଲାଗିଛି ଚାଇନା । ଏହା ପୂର୍ବରୁ ଚାଇନା ତିବ୍ୱତର ସଂସ୍କୃତି ଓ ପରିଚୟକୁ ନଷ୍ଟ କରିବାରେ ବର୍ଷ ବର୍ଷ ହେଲା ଲାଗିଛି । ହେଲେ ଏବେ ତିବ୍ୱତରେ ଚାଇନା ବିରୋଧରେ ସ୍ୱର ଉଠିଲାଣି । ଚାଇନା ଏହି ବିରୋଧକୁ ନଷ୍ଟ କରିବାକୁ ଚାଲାକି ଢଙ୍ଗରେ ବିକାଶ ନାଁରେ ଏମିତି ଢଙ୍ଗରେ ପ୍ରସ୍ତୁତି କରୁଛି ଯାହାଦ୍ୱାରା ଅତି ସହଜରେ ଓ ଶୀଘ୍ର ତିବ୍ୱତରେ ସେନା ପହଞ୍ଚିପାରିବେ ।
ତିବ୍ୱତ ରାଇଟ କଲେକ୍ଟିଭର ଏକ ରିପୋର୍ଟ ଅନୁଯାୟୀ, ଚାଇନା ୨୦୨୫ ସୁଦ୍ଧା ତିବ୍ୱତରେ ୪,୦୦୦ କିଲୋମିଟର ଲମ୍ବା ରେଳ ଲାଇନ ବିଛାଇବାକୁ ଲକ୍ଷ୍ୟ ରଖିଛି । ଏହା ବ୍ୟତୀତ ୨୦୩୫ ସୁଦ୍ଧା ୫୯ ନୂଆ ବିମାନବନ୍ଦର ଓ ୩୦୦ ହେଲିପ୍ୟାଡ ବି ତିଆରି କରିବାର ଯୋଜନା ରଖିଛି । ତିବ୍ୱତ ପଲିସି ଇନଷ୍ଟିଚ୍ୟୁଟ ଅନୁଯାୟୀ, ଚାଇନା ତିବ୍ୱତରେ ଯାହା ସବୁ କରୁଛି ତାହା ତିବ୍ୱତ ଲୋକଙ୍କ ସୁବିଧା ପାଇଁ ନୁହେଁ ବରଂ ଏଠାକାର ଲୋକଙ୍କ ବିରୋଧକୁ ଚପାଇ ଦେବାକୁ ତୁରନ୍ତ ସେନା ପଠାଇବାକୁ ପ୍ରସ୍ତୁତ କରୁଛି । ଚାଇନାର ଲକ୍ଷ୍ୟ ରହିଛି ତିବ୍ୱତରେ ବୌଦ୍ଧ ପରିଚୟକୁ ସମ୍ପୂର୍ଣ୍ଣ ଭାବେ ହଟାଇ ଦେଇ ଏହାକୁ ଚାଇନା ସହ ମିଶାଇ ଦେବାକୁ ।
