ନୂଆଦିଲ୍ଲୀ,୨୨ା୧୦: ଭାରତ-ଚାଇନା ସୀମା ବିବାଦ ଥମିବାର ନାଁ ନେଉନାହିଁ। ଗତ ଜୁନ୍ ମାସରୁ ଦୁଇଦେଶ ମୁହଁାମୁହିଁ ଅବସ୍ଥାରେ ଥିବାବେଳେ ଚାଇନାର ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ପ୍ରକୃତ ନିୟନ୍ତ୍ରଣରେଖା (ଏଲ୍ଏସି)ରେ ଲ୍ୟାଣ୍ଡମାଇନ୍ ବିଛାଇବା ଆରମ୍ଭ କରିଛି। ଲ୍ୟାଣ୍ଡମାଇନ୍ ପାଇଁ ପିଏଲ୍ଏ ଏକ ସ୍ବତନ୍ତ୍ର ରକେଟ ଲଞ୍ଚର ମଧ୍ୟ ପରୀକ୍ଷଣ କରିଛି। ଶତ୍ରୁ ପକ୍ଷର ସେନା ଓ ଟ୍ୟାଙ୍କ ଯେପରି ନିଜ ପଟକୁ ପ୍ରବେଶ କରି ନ ପାରିବେ ସେଥିଲାଗି ଲ୍ୟାଣ୍ଡମାଇନ୍ ବିଛାଯାଇଥାଏ। ଚାଇନାର ନ୍ୟୁଜ୍ ଚ୍ୟାନେଲ ସିସିଟିଭି-ମିଲିଟାରି ଅନୁସାରେ ପିଏଲ୍ଏ ତିବ୍ବତର କମାଣ୍ଡ ନିକଟରେ ରକେଟ ଲଞ୍ଚର୍ସର ସଫଳ ପରୀକ୍ଷଣ କରିଛି। ଏହି ରକେଟ ଲଞ୍ଚର୍ସକୁ ଟ୍ରକ୍ରେ ଅଣାଯାଇଥାଏ। ପରେ ଲ୍ୟାଣ୍ଡମାଇନ୍ସକୁ ରକେଟରୁ କୌଣସି ସୀମା ବା ଅଞ୍ଚଳ ଆଖପାଖରେ ବିଛାଯାଇଥାଏ। ଗୋଟିଏ ଟ୍ରକ୍ରେ ୪୦ଟି ଲଞ୍ଚର୍ସକୁ ପରିବହନ କରାଯାଇପାରେ।
ତେବେ ଏହି ଲଞ୍ଚରଗୁଡ଼ିକର ରେଞ୍ଜ କେତେ ତାହା କୁହାଯାଇ ନାହିଁ। କିନ୍ତୁ ସୂଚନା ମୁତାବକ ଏହାକୁ ଉଚ୍ଚ ଅଞ୍ଚଳରେ ଅବସ୍ଥାପିତ କରି ‘କମ୍ବାଟ-ଲକ୍ଡାଉନ୍’ କରାଯାଇପାରେ। ଚାଇନା ସେନା ଏହି ସ୍ବତନ୍ତ୍ର ଲଞ୍ଚର୍ସର ଟେଷ୍ଟ ପ୍ରାୟ ୧୨ ହଜାର ଫୁଟ୍ ଉଚ୍ଚତାରେ କରିଛି।
ବିଶେଷଜ୍ଞଙ୍କ ମତରେ ଚାଇନା ସେନା ଏହି ପରୀକ୍ଷଣ ଦୁଇଟି ବଡ଼ କାରଣରୁ କରିଛି। ପ୍ରଥମତଃ ଚାଇନା ସୈନ୍ୟଙ୍କୁ ଉଚ୍ଚସ୍ଥାନରେ ପହଞ୍ଚତ୍ବାରେ ଅସୁବିଧା ହୋଇଥାଏ। ବିଶେଷକରି ଶୀତଋତୁରେ ପ୍ରବଳ ଥଣ୍ଡା ଯୋଗୁ ସେମାନେ ଉଚ୍ଚସ୍ଥାନକୁ ଯାଇପାରି ନ ଥାନ୍ତି। ଦ୍ୱିତୀୟତଃ ଚାଇନାକୁ ଗୋଟିଏ ଭୟ ଘାରିଛି ଯେ, ଯଦି ଭାରତ ସହ ଆଲୋଚନା ବିଫଳ ହୋଇଯାଏ ତେବେ ଭାରତୀୟ ସେନା ଏଲ୍ଏସି ଅତିକ୍ରମ କରି ଆକ୍ରମଣ କରିବ। ତେଣୁ ଚାଇନା ନିଜ ସୀମାକ୍ଷେତ୍ରରେ ଏପରି ବିପଜ୍ଜନକ ଲ୍ୟାଣ୍ଡମାଇନ୍ ବିଛାଉଛି। ଅନ୍ୟ ଏକ ରିପୋର୍ଟ ଅନୁସାରେ ଚାଇନା ପିଏଲ୍ଏର ପଦାତିକ ବାହିନୀ ସଂଖ୍ୟା ବଢ଼ାଇବା ସହିତ ଅସ୍ତ୍ରଶସ୍ତ୍ର ଠୁଳ କରିବାରେ ଲାଗିଛି।
ଇତିମଧ୍ୟରେ ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ବୁଧବାର କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଶାସନରେ କୌଣସି ଶକ୍ତି ଭାରତର ଏକ ଇଞ୍ଚ ମଧ୍ୟ ଭୂମି ନେଇ ପାରିବେ ନାହିଁ। ଲଦାଖ ସଂଲଗ୍ନ ଏଲ୍ଏସିରେ ମୁହଁାମୁହିଁ ହେବାବେଳେ ଭାରତୀୟ ଯବାନମାନେ ଏକ ଚମତ୍କାର କାର୍ଯ୍ୟ କରିଛନ୍ତି। ପ୍ରକାଶ ଯେ, ଜୁନ୍ ୧୫ରେ ଗଲଓ୍ବାନ ଉପତ୍ୟକାରେ ଦୁଇଦେଶର ସେନା ମଧ୍ୟରେ ରକ୍ତାକ୍ତ ସଂଘର୍ଷ ଘଟିଥିଲା। ଏଥିରେ ୨୦ ଭାରତୀୟ ଯବାନ ଶହୀଦ ହୋଇଥିବାବେଳେ ପିଏଲ୍ଏ ସୈନ୍ୟଙ୍କ ମୃତାହତ ନେଇ ଚାଇନା ଅଦ୍ୟାବଧି କିଛି ସ୍ପଷ୍ଟ କରିନାହିଁ।