ବେଜିଂ,୨୯।୮: ଚାଇନା ମାନଚିତ୍ରର ଏକ ନୂତନ ସଂସ୍କରଣ ପ୍ରକାଶ କରିଛି। ଚାଇନା ମାନଚିତ୍ର ପ୍ରକାଶ କରିବା ମାତ୍ରେ ବିବାଦ ଉପୁଜିଥିଲା। ଚାଇନା ଭାରତର ଅରୁଣାଚଳ ପ୍ରଦେଶ, ଅକସାଇ ଚାଇନା, ତାଇୱାନ ଏବଂ ଦକ୍ଷିଣ ଚାଇନା ସାଗରକୁ ନିଜ ଅଞ୍ଚଳରେ ଦେଖାଇଥିଲା। ଏହା ପରେ ଭାରତ କହିଛି ଯେ, ଅରୁଣାଚଳ ପ୍ରଦେଶ ସର୍ବଦା ଭାରତର ଏକ ଅବିଚ୍ଛେଦ୍ୟ ଅଙ୍ଗ ହୋଇଆସୁଛି ଏବଂ ରହିବ।
ଚାଇନାର ଖବରକାଗଜ ଗ୍ଲୋବାଲ ଟାଇମ୍ସ ଏକ୍ସରେ ଟୁଇଟ୍ କରି କହିଛି ଯେ, ଚାଇନା ଅଗଷ୍ଟ ୨୮ରେ ୨୦୨୩ର ଏକ ନୂତନ ମାନଚିତ୍ର ପ୍ରକାଶ କରିଛି। ଚାଇନାର ଜାତୀୟ ସୀମା ତଥା ବିଶ୍ୱର ବିଭିନ୍ନ ଦେଶର ଚିତ୍ରାଙ୍କନ ପଦ୍ଧତି ଉପରେ ଆଧାର କରି ଏହି ମାନଚିତ୍ର ପ୍ରସ୍ତୁତ କରାଯାଇଛି। ଗ୍ଲୋବାଲ ଟାଇମ୍ସ ଦ୍ୱାରା ପ୍ରକାଶିତ ମାନଚିତ୍ରରେ ଅରୁଣାଚଳ ପ୍ରଦେଶ ଏବଂ ଅକସାଇ ଚାଇନା ମଧ୍ୟ ନିଜ ଅଞ୍ଚଳରେ ଦେଖାଯାଇଛି।
ସୂଚନାଯୋଗ୍ୟ, ଚାଇନା ଅରୁଣାଚଳ ପ୍ରଦେଶକୁ ଦକ୍ଷିଣ ତିବ୍ଦତର ଏକ ଅଂଶ ଭାବରେ ବିବେଚନା କରେ। ତେବେ ଚାଇନାର ଏହି ମାନଚିତ୍ରକୁ ଭାରତ ପ୍ରତ୍ୟାଖ୍ୟାନ କରିଛି। ଭାରତ କହିଛି ଯେ, ଅରୁଣାଚଳ ପ୍ରଦେଶ ଭାରତର ଏକ ଅବିଚ୍ଛେଦ୍ୟ ଅଙ୍ଗ ଏବଂ ଭବିଷ୍ୟତରେ ଏହା ମଧ୍ୟ ଭାରତର ଏକ ଅବିଚ୍ଛେଦ୍ୟ ଅଙ୍ଗ ହୋଇ ରହିବ।