ବେଜିଂ,୧୬।୯: ଘୁର୍ଣ୍ଣିଝଡ଼ ବେବିଙ୍କା ସୋମବାର ସାଂଘାଇରେ ଳ୍ୟାଣ୍ଡଫଲ କରିଛି। ସାଂଘାଇ ସେଣ୍ଟ୍ରାଲ ମେଟେରୋଲୋଜିକାଲ ଅବଜରଭେଟୋରୀ ଅନୁଯାୟୀ ସ୍ଥାନୀୟ ସମୟ ପ୍ରାୟ ୭ଟା ୩୦ ସମୟରେ ଏହି ଝଡ଼ ସହରରେ ପହଞ୍ଚିଥିଲା।
ସିହ୍ନୁଆ ନ୍ୟୁଜ ଏଜେନ୍ସିର ରିପୋର୍ଟ ଅନୁଯାୟୀ ଏହି ଝଡ଼ ପୁଡଙ୍ଗ ଜିଲାର ଲିଙ୍ଗଙ୍ଗ ଅଞ୍ଚଳ ଉପକୂଳରେ ପହଞ୍ଚିଛି। ଝଡ଼ର କେନ୍ଦ୍ର ନିକଟରେ ସର୍ବାଧିକ ପବନର ବେଗ ପ୍ରତି ସେକେଣ୍ଡରେ ୪୨ ମିଟରରେ ପହଞ୍ଚିଛି।
୭୫ ବର୍ଷରେ ସାଂଘାଇରେ ବେବିଙ୍କା ସବୁଠାରୁ ଶକ୍ତିଶାଳୀ ଟାଇଫୁନ ବୋଲି ବିଶ୍ୱାସ କରାଯାଏ।
ରାଜ୍ୟ ବନ୍ୟା ନିୟନ୍ତ୍ରଣ ଏବଂ ମରୁଡ଼ି ସହାୟତା ମୁଖ୍ୟାଳୟ ରବିବାର ଚାଇନାର ପୂର୍ବ ଅନୁହୁଇ ପ୍ରଦେଶ ପାଇଁ ଲେଭଲ-୪ ଜରୁରୀକାଳୀନ ସଙ୍କେତ ଦେଇଥିବାବେଳେ ସାଂଘାଇ ଏବଂ ଜେଜିଆଙ୍ଗରେ ଲେଭଲ-୩ ଜରୁରୀକାଳୀନ ସଙ୍କେତ ଦେଇଛି।
ସାଂଘାଇ, ଜିଆଙ୍ଗସୁ, ଜେଜିଆଙ୍ଗ ଏବଂ ଅନୁହୁଇ ପ୍ରଦେଶରେ ବନ୍ୟା ପରିସ୍ଥିତିକୁ ଦୃଷ୍ଟିରେ ରଖି ଚାଇନାର ଜଳ ସମ୍ପଦ ମନ୍ତ୍ରଣାଳୟ ଏକ ଲେଭଲ-୪ ଜରୁରୀକାଳୀନ ପ୍ରତିକ୍ରିୟା ଜାରି କରିଛି।
ମନ୍ତ୍ରଣାଳୟ ଶନିବାର କହିଛି ଯେ ଚାଇନାର ଦକ୍ଷିଣ-ପୂର୍ବ ଅଞ୍ଚଳରେ ଟାଇଫୁନ ବେବିଙ୍କା ପ୍ରଭାବରେ ପ୍ରବଳ ବର୍ଷା ହୋଇପାରେ ଏବଂ ଏହି ଅଞ୍ଚଳର କେତେକ ମଧ୍ୟମ ଏବଂ ଛୋଟ ନଦୀର ଜଳ ସ୍ତର ବିପଦ ସଙ୍କେତ ସ୍ତରରୁ ଅଧିକ ହୋଇପାରେ। ପ୍ରଭାବିତ ଅଞ୍ଚଳରେ ବନ୍ୟା ମୁକାବିଲା କରିବାକୁ ମନ୍ତ୍ରଣାଳୟ ଗୁରୁତ୍ୱାରୋପ କରିଛି।
ବନ୍ୟା ନିୟନ୍ତ୍ରଣ ପାଇଁ ଚାଇନାରେ ଏକ ଚାରି ସ୍ତରୀୟ ଜରୁରୀକାଳୀନ ପ୍ରତିକ୍ରିୟା ବ୍ୟବସ୍ଥା ରହିଛି, ଯେଉଁଥିରେ ଲେଭଲ-୧ ସବୁଠାରୁ ଭୟଙ୍କର ଅଟେ।
