ନୂଆଦିଲ୍ଲୀ/ଓ୍ବାଶିଂଟନ, ୨୬।୮: ପୃଥିବୀରୁ କରୋନା ମହାମାରୀ ସଂକ୍ରମଣ ହଟିବାର ନାଁ ଧରୁନି। ଏପରିସ୍ଥଳେ କରୋନା ସଂକ୍ରମଣର ଏନ୍ତୁଡ଼ିଶାଳ ପାଲଟିଥିବା ଚାଇନା ଜୈବିକ ଅସ୍ତ୍ର ଏବଂ ରାସାୟନିକ ଅସ୍ତ୍ର ପ୍ରସ୍ତୁତ କରି ପୃଥିବୀ ଉପରେ ଅଧିକାର ସାବ୍ୟସ୍ତ କରିବାର ଷଡ଼ଯନ୍ତ୍ର ରଚିଛି। ଏନେଇ ପାକିସ୍ତାନ ସହିତ ଚାଇନା ହାତ ମିଳାଇଛି। ପାକିସ୍ତାନକୁ ଟଙ୍କାର ଲୋଭ ଦେଖାଇ ଚାଇନା ଏଭଳି କରୁଥିବା ନେଇ କ୍ଲାକ୍ସୋନ ରିପୋର୍ଟରେ ପ୍ରକାଶ ପାଇଥିବା ଗଣମାଧ୍ୟମ ସଂସ୍ଥା ଏଏନ୍ଆଇ ପକ୍ଷରୁ କୁହାଯାଇଛି। ଏହା ଉପରେ ଉହାନ୍ରେ ଏକ ବୈଜ୍ଞାନିକ ଦଳ ଗତ ୫ ବର୍ଷ ଧରି କାର୍ଯ୍ୟ ଜାରି ରଖିଛନ୍ତି। ଶତ୍ରୁ ଦେଶ ଉପରେ ଜୈବିକ ଅବା ରାସାୟନିକ ଅସ୍ତ୍ର ପ୍ରୟୋଗ କରିବା କିଛି ନୂଆ ଘଟଣା ନୁହେଁ। ୧୯୪୩ରୁ ୧୯୬୯ ମଧ୍ୟରେ ଆମେରିକା ମଧ୍ୟ ଏଭଳି ଅସ୍ତ୍ର ଉପରେ କାମ କରୁଥିଲା। ତେବେ ୧୯୯୭ରେ ପ୍ୟାରିସ୍ ଚୁକ୍ତିର ଆଇନ ଅନ୍ତର୍ଗତ ଏଭଳି ଅସ୍ତ୍ର ପ୍ରସ୍ତୁତି ଉପରେ କଡ଼ା କଟକଣା ଲଗାଯାଇଥିଲା। କିନ୍ତୁ ଏବେ ଚାଇନା ପାକିସ୍ତାନ ସହିତ ମିଶି ଏଭଳି କାର୍ଯ୍ୟ ଜାରି ରଖିଥିବା କୁହାଯାଉଛି। ପାକିସ୍ତାନରେ ଚାଇନା ନିବେଶ ବୃଦ୍ଧି ଏବଂ ବିକାଶ କାର୍ଯ୍ୟ କରିବାର ଲୋଭ ଦେଖାଇ ଏଭଳି ପ୍ରୋଜେକ୍ଟରେ ସାମିଲ କରିଥିବା କୁହାଯାଉଛି।