ବେଜିଂ,୨୯ ।୧୦: ତିନି ବର୍ଷ ପୂର୍ବରୁ ଉହାନରୁ ସାରା ବିଶ୍ୱକୁ ବ୍ୟାପିଥିବା କରୋନା ଭାଇରସ ପୁଣିଥରେ ଚାଇନାରେ ଦେଖିବାକୁ ମିଳିଛି । ତେବେ ସଂକ୍ରମଣକୁ ଦୃଷ୍ଟିରେ ରଖି ସହରକୁ ଆଂଶିକ ଲକଡାଉନ ଘୋଷଣା କରାଯାଇଛି । ଶୁକ୍ରବାର ଚାଇନାର ବ୍ୟବସାୟୀକ ସହର ସାଂଘାଇର ପ୍ରଶାସନ ୟାଂଗପୁ ଜିଲାର ସମସ୍ତ ୧୩ ଲକ୍ଷ ଲୋକଙ୍କର କୋଭିଡ-୧୯ ଯାଞ୍ଚ ନିର୍ଦ୍ଦେଶ ଦେଇଛନ୍ତି । ଏହାସହ କୁହାଯାଉଛି ଟେଷ୍ଟ ରିପୋର୍ଟ ନ ଆସିବା ପର୍ଯ୍ୟନ୍ତ ଲୋକେ ଘରୁ ବାହାରକୁ ଯାଇ ପାରିବେ ନାହିଁ ।
ସୂଚନାଯୋଗ୍ୟ, ଏଭଳି ନିର୍ଦ୍ଦେଶ ଚଳିତ ବର୍ଷ ଗ୍ରୀଷ୍ମ ଋତୁରେ ବି ଦିଆଯାଇଥିଲା । ଫଳରେ ୨ ମାସ ପର୍ଯ୍ୟନ୍ତ ସମ୍ପୂର୍ଣ୍ଣ ସହରରେ ଲକ ଡାଉନ ଜାରି ରହିଥିଲା । ଅଢେଇ କୋଟି ଜନସଂଖ୍ୟା ବିଶିଷ୍ଟ ଏହି ସହରରେ ସ୍ଥାନୀୟ ଅର୍ଥବ୍ୟବସ୍ଥା ସମ୍ପୂର୍ଣ୍ଣ ଭୁଷୁଡି ପଡିଥିଲା । ଗତଥର ଲକଡାଉରେ ସହର ଭିତରେ ଖାଦ୍ୟ ସଙ୍କଟ ଦେଖାଦେବାରୁ ଅନେକ ଥର ଜନତା ଓ ଅଧିକାରୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଥିଲା ।
ସୂଚନାଯୋଗ୍ୟ, ଚାଇନାର ବୁହାନରେ ଉତ୍ତର ପଶ୍ଚିମରେ ଥିବା କିଛି ସହରରେ କରୋନା ସଂକ୍ରମଣ ଦେଖାଦେବାରୁ ସେଠାରେ ପୁଣିଥରେ ଲକ ଡାଉନ ଲଗାଯାଇଛି । ଶୂନ୍ୟ କୋଭିଡ ନୀତି ଆଧାରରେ ଏଠାରେ ଲକଡାଉନ ଲଗାଯିବା ସହ ଉକ୍ତ ଅଞ୍ଚଳକୁ ସିଲ କରି ଦିଆଯାଇଛି । ଗତ ୨୪ ଘଣ୍ଟା ମଧ୍ୟରେ ଲଗାତାର ତୃତୀୟ ଦିନରେ ଚାଇନାରେ ଦୈନିକ ସଂକ୍ରମଣ ୧୦୦୦ରୁ ଅଧିକ ରହିଥିବା ଜଣାପଡିଛି ।