ବେଜିଂ,୧୮।୧୦: ବିସ୍ତାରବାଦ ନୀତି ପାଇଁ ଚାଇନା ସାରା ବିଶ୍ୱରେ ଜଣାଶୁଣା। ଡ୍ରାଗନର ଅନ୍ୟ ଦେଶର ଜମିକୁ କବଜା କରୁଥିବା ଯୋଗୁ ପ୍ରାୟ ପ୍ରତ୍ୟେକ ପଡୋଶୀ ଦେଶ ସହିତ ଏହାର ସମ୍ପର୍କ ତିକ୍ତ। ବର୍ତ୍ତମାନ ଏହା ଭୁଟାନର ଜମିକୁ ଦଖଲ କରିଛି। ଏକ ରିପୋର୍ଟରେ ଏହା ପ୍ରକାଶ ପାଇଛି। ରିପୋର୍ଟରେ ଦର୍ଶାଯାଇଛି ଯେ, ଭୁଟାନରେ ଚାଇନା ୨୨ଟି ଗାଁ ନିଜ ଅକ୍ତିଆରକୁ ନେଇଛି। ଚାଇନାର ଏଭଳି କାର୍ଯ୍ୟ ହେତୁ ଭାରତ ସମେତ ଅନେକ ଦେଶ ଚିନ୍ତିତ ଅଛନ୍ତି। କାରଣ ଏହା ଭୁଟାନର ସାର୍ବଭୌମତ୍ୱ ପାଇଁ ଚିନ୍ତା ବଢାଉଛି।
ଭୁଟାନ ଅଞ୍ଚଳରେ ଚାଇନା ୧୯ଟି ଗାଁ ଏବଂ ତିନୋଟି ଛୋଟ ବସତି ନିର୍ମାଣ କରିଛି। ଏହା ପୂର୍ବରୁ ମଧ୍ୟ ଏକ ଖବର ଥିଲା। ୨୦୨୩ରେ ଚାଇନା ଭୁଟାନର ପାରମ୍ପରିକ ସୀମା ଭିତରେ ୭ଟି ଗ୍ରାମ ନିର୍ମାଣ କରିଥିଲା।
ବିଶେଷଜ୍ଞମାନେ କହିଛନ୍ତି, ଚାଇନାର ଏହି ପଦକ୍ଷେପ କେବଳ ଭୁଟାନ ପାଇଁ ନୁହେଁ ବରଂ ପଡୋଶୀ ଦେଶ ପାଇଁ ମଧ୍ୟ ବିପଦଜନକ। ଡ୍ରାଗନର ଏହି ପଦକ୍ଷେପ ପରେ ପୁଣି ଥରେ ଚାଇନାର ବିସ୍ତାରବାଦୀ ନୀତି ସାରା ବିଶ୍ୱରେ ଆଲୋଚନା ହେଉଛି।
ଚାଇନାର ବିସ୍ତାରବାଦୀ ନୀତି ହେତୁ ଏହାର ପ୍ରାୟ ସମସ୍ତ ପଡୋଶୀ ଦେଶ ସହିତ ସୀମା ବିବାଦ ରହିଛି। ଏହି କାରଣରୁ ମଙ୍ଗୋଲିଆ, ଲାଓସ, ଭିଏତନାମ, ମିଆଁମାର, ଆଫଗାନିସ୍ତାନ, ପାକିସ୍ତାନ, କାଜାଖସ୍ତାନ, କିର୍ଗିଜସ୍ଥାନ ଏବଂ ତାଜିକିସ୍ତାନ ସହ ଚାଇନା ସମ୍ପର୍କ ତିକ୍ତ ହୋଇ ରହିଛି। ଏହି ଦେଶଗୁଡିକ ସହିତ ଚାଇନାର ଅର୍ଥନୈତିକ ସମ୍ପର୍କ ଅଛି କିନ୍ତୁ ଏହାର ବିସ୍ତାର ନୀତି ଯୋଗୁ ଏହି ଦେଶଗୁଡିକ ଚାଇନା ଉପରେ ବିଶ୍ୱାସ କରିବାକୁ ସକ୍ଷମ ନୁହଁନ୍ତି।
