ବେଜିଂ,୨୫ା୨: ୟୁକ୍ରେନ୍ରେ ଯୁଦ୍ଧର ଅନ୍ତ ଘଟାଇବା ପାଇଁ ଚାଇନା ଶୁକ୍ରବାର ଶାନ୍ତି ପ୍ରସ୍ତାବ ଦେଇଛି। କିନ୍ତୁ ପାଶ୍ଚାତ୍ୟ ଶକ୍ତିଗୁଡ଼ିକ ଏହାକୁ ତତ୍କାଳ ଅଗ୍ରାହ୍ୟ କରିବା ସଙ୍ଗେ ସଙ୍ଗେ ମସ୍କୋ ସହ ଘନିଷ୍ଠତା ନ ବଢ଼ାଇବାକୁ ବେଜିଂକୁ ଚେତାବନୀ ଦେଇଛନ୍ତି। ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ଚାଇନାର ଶାନ୍ତି ପ୍ରସ୍ତାବକୁ ନେଇ ସମୀକ୍ଷା କରିବା ପୂର୍ବରୁ ବେଜିଂ ସହ ଆଲୋଚନା କରିବାକୁ ଚାହାନ୍ତି ବୋଲି କହିଛନ୍ତି। ଯୁଦ୍ଧର ବର୍ଷପୂର୍ତ୍ତି ଅବସରରେ ବେଜିଂ ୧୨ ପୃଷ୍ଠା ସମ୍ବଳିତ ଏକ ‘ପଲିଟିକାଲ୍ ସେଟଲମେଣ୍ଟ’ ଜାରି କରିଛି। ରୁଷିଆ ଓ ୟୁକ୍ରେନ୍କୁ ସମସ୍ତ ପକ୍ଷ ସମର୍ଥନ କରିବା ସହ ଯଥାଶୀଘ୍ର ଆଲୋଚନା ଆରମ୍ଭ କରନ୍ତୁ। ଯୁଦ୍ଧରେ ଆଣବିକ ଅସ୍ତ୍ର ବ୍ୟବହାର କଲେ କିମ୍ବା ଏହି ଉଦ୍ଦେଶ୍ୟରେ ମୁତୟନ କରାଗଲେ ସଙ୍କଟ ଆହୁରି ବଢ଼ିବ ବୋଲି ଏଥିରେ କୁହାଯାଇଛି। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଆଣବିକ ଅସ୍ତ୍ର ପ୍ରୟୋଗର ଧମକ ଦେଉଥିବାବେଳେ ବେଜିଂର ଏପରି ସତର୍କବାଣୀକୁ ଆମେରିକା ସମେତ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ସହଜରେ ଗ୍ରହଣ କରିପାରି ନାହାନ୍ତି। ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କ ଜାତୀୟ ସୁରକ୍ଷା ପରାମର୍ଶଦାତା ଜେକ୍ ସୁଲିଭାନ୍ କହିଛନ୍ତି, ରୁଷିଆ ୟୁକ୍ରେନ୍ରୁ ନିଜ ସେନା ଅପସାରଣ ସହ ଆକ୍ରମଣ ବନ୍ଦ କଲେ ଆସନ୍ତାକାଲି ଯୁଦ୍ଧ ବନ୍ଦ ହୋଇଯିବ। ୟୁକ୍ରେନ୍, ଆମେରିକା କିମ୍ବା ନର୍ଥ ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେଶନ୍ (ନାଟୋ) ରୁଷିଆକୁ ଆକ୍ରମଣ କରୁନାହାନ୍ତି। ରୁଷିଆ ଯୁଦ୍ଧରେ ପରାଜିତ ହୋଇସାରିଛି। ବେଜିଂରେ ୟୁକ୍ରେନୀୟ ଏବଂ ୟୁରୋପୀୟ ସଂଘ (ଇୟୁ) କୂଟନୀତିଜ୍ଞମାନେ ଯୁଦ୍ଧାବସାନ ପାଇଁ ରୁଷିଆ ଉପରେ ଅଧିକ ଚାପ ପକାଇବାକୁ ଚାଇନାକୁ ପରାମର୍ଶ ଦେଇଛନ୍ତି।