ମୁମ୍ବାଇ,୧୦।୧୨: କେନ୍ଦ୍ର ସରକାରଙ୍କ କୃଷି ଆଇନ ନେଇ ଦେଶବ୍ୟାପୀ ଅନ୍ନଦାତାଙ୍କ ଆନ୍ଦୋଳନ ଜାରି ରହିଛି। ଏପରି ସ୍ଥଳେ ଆନ୍ଦୋଳନ ନେଇ ଭାଜପାର ଉପଭୋକ୍ତା ବ୍ୟାପାର ରାଷ୍ଟ୍ରମନ୍ତ୍ରୀ ରାଓ ସାହେବ ଦାନଭେ ବିବାଦୀୟ ମନ୍ତବ୍ୟ ଦେଇଥିଲେ। ସେ କହିଥିଲେ ଯେ, ଭାରତରେ ହେଉଥିବା ଅନ୍ନଦାତାଙ୍କ ଆନ୍ଦୋଳନ ପଛରେ ଚାଇନା ଏବଂ ପାକିସ୍ତାନର ହାତ ରହିଛି। ଏହାକୁ ନେଇ ଏବେ ଶିବସେନା ଏମ୍ପି ସଞ୍ଜୟ ରାଉତ ଗୁରୁବାର କଟାକ୍ଷ କରିଛନ୍ତି। ସଞ୍ଜୟ କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋରଦି ସରକାର ଏହାର ଜବାବ ଦେଇ ଶୀଘ୍ର ଚାଇନା ଏବଂ ପାକିସ୍ତାନ ଉପରେ ସର୍ଜିକାଲ ଷ୍ଟ୍ରାଇକ୍ କରନ୍ତୁ। ଏହାକୁ ରାଷ୍ଟ୍ରପତି, ପ୍ରଧାନମନ୍ତ୍ରୀ , ସ୍ବରାଷ୍ଟ୍ରମନ୍ତ୍ରୀ ଏବଂ ୩ ସେନା ମୁଖ୍ୟ ଗୁରୁତର ସହିତ ବିଚାର କରନ୍ତୁ ବୋଲି ସଞ୍ଜୟ କହିଛନ୍ତି। ଭାଜପା ମନ୍ତ୍ରୀ ଏଭଳି ମନ୍ତବ୍ୟ ଦେଇ ନିଜର ଚେତନା ଶକ୍ତି ନ ଥିବା ଦର୍ଶାଇଛନ୍ତି ବୋଲି ଶିବସେନା ସଦସ୍ୟ ଅରବିନ୍ଦ ସାଓ୍ବନ୍ତ କହିଛନ୍ତି।
