ବେଜିଂ,୧୪।୩: ଚାଇନା ରାଷ୍ଟ୍ରପତି ସି ଜିନପିଙ୍ଗ ରୁଷିଆ ଗସ୍ତରେ ଯିବାକୁ ପ୍ରସ୍ତୁତ ହେଉଛନ୍ତି। ମସ୍କୋରେ ସେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିବେ। ସି ଜିନପିଙ୍ଗଙ୍କ ଏହି ଗସ୍ତ ରୁଷିଆ-ୟୁକ୍ରେନରେ ଚାଲିଥିବା ଯୁଦ୍ଧ ମଧ୍ୟରେ ହେଉଛି, ତେଣୁ ବିଶ୍ୱର ନଜର ଦୁଇ ନେତାଙ୍କ ସାକ୍ଷାତ ଉପରେ ରହିଛି। ସି ଜିନପିଙ୍ଗ ୟୁକ୍ରେନର ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ସହ ମଧ୍ୟ କଥା ହେବେ ବୋଲି ଜଣାପଡିଛି। ରୁଷିଆ ଏବଂ ୟୁକ୍ରେନ ମଧ୍ୟ ଯୁଦ୍ଧ ଶେଷ କରିବାକୁ ଚାଇନା ଚାହୁଁଛି।
ଚାଇନା ନିକଟରେ ଦୁଇ ବଡ ଇସଲାମ ଦେଶ ମଧ୍ୟରେ ଶତ୍ରୁତାକୁ ଦୂର କରିବା ପାଇଁ ପଦକ୍ଷେପ ନେଇଥିଲା। ଚାଇନା ସାଉଦି ଆରବ ଏବଂ ଇରାନ ମଧ୍ୟରେ ମଧ୍ୟସ୍ଥତା କରିଥିଲା, ଯାହାକି ସେମାନଙ୍କ ଦୀର୍ଘ ବର୍ଷର ଶତ୍ରୁତା ହ୍ରାସ କରିଥିଲା। ଚାଇନାରେ ଏହି ଦୁଇ ଇସଲାମ ଦେଶର ପ୍ରତିନିଧୀଙ୍କ ମଧ୍ୟରେ ହୋଇଥିବା ବୈଠକରେ ଆମେରିକା ଏବଂ ଅନ୍ୟ ପାଶ୍ଚାତ୍ୟ ଦେଶଗୁଡ଼ିକର କୌଣସି ସୂଚନା ନ ଥିଲା। ଉଭୟଙ୍କ ମଧ୍ୟରେ ସମନ୍ବୟ ରକ୍ଷା କରି ଚାଇନା ସ୍ଥିତିକୁ ଜାହିର କରିଛି।