ବେଜିଂ,୨୫ା୧୨: ସୀମା ବିବାଦର ସମାଧାନ ଲାଗି କାମ କରିବାକୁ ଚାଇନା ପ୍ରସ୍ତୁତ ବୋଲି ବହିର୍ବ୍ୟାପାର ମନ୍ତ୍ରୀ ଓ୍ବାଙ୍ଗ୍ ୟି କହିଛନ୍ତି। ଭାରତ ସହ ଚାଇନାର ସମ୍ପର୍କ ଉପରେ ଓ୍ବାଙ୍ଗ୍ ଖବରଦାତାଙ୍କୁ କହିଥିଲେ, ଉଭୟ କୂଟନୈତିକ ଏବଂ ସାମରିକ ଚ୍ୟାନେଲ ମାଧ୍ୟମରେ ଦୁଇ ଦେଶ ମଧ୍ୟରେ ଯୋଗାଯୋଗ ଜାରି ରହିଛି। ସୀମାରେ ସ୍ଥିରତା ବଜାୟ ରଖିବା ଲାଗି ଉଭୟ ଦେଶ ପ୍ରତିଶ୍ରୁତିବଦ୍ଧ। ଦୁଇ ଦେଶର ସମ୍ପର୍କ ବଢ଼ାଇବା ଦିଗରେ ଏକତ୍ର କାର୍ଯ୍ୟ କରିବାକୁ ବେଜିଂ ପ୍ରସ୍ତୁତ ବୋଲି ଓ୍ବାଙ୍ଗ କହିଛନ୍ତି। ସୂଚନାଯୋଗ୍ୟ, ଗତ ୯ ତାରିଖରେ ଅରୁଣାଚଳପ୍ରଦେଶର ତାଓ୍ବଙ୍ଗ ସେକ୍ଟରରେ ଭାରତ ଓ ଚାଇନା ସୈନ୍ୟଙ୍କ ମଧ୍ୟରେ ସଂଘର୍ଷ ଘଟିଥିଲା।