ବେଜିଂ,୧୦।୪ : କରୋନା ମହାମାରୀ ଭୂତାଣୁର ଉତ୍ପତ୍ତି ନେଇ ବିଭିନ୍ନ ଚର୍ଚ୍ଚା ହେଉଥିବାବେଳେ ଚାଇନାର ଜଣେ ବୈଜ୍ଞାନିକ ନୂଆ ଦାବି କରିଛନ୍ତି। ପୂର୍ବରୁ ଚାଇନାର ଉହାନ ଲ୍ୟାବରୁ କରୋନାର ଉତ୍ପତ୍ତି ହୋଇଥିବାବେଳେ ଆମେରିକା ସମେତ ଅନ୍ୟ କେତେକ ଦେଶ କହି ଆସୁଥିଲେ। ତେବେ ଏବେ ଚାଇନା ସେମାନଙ୍କ ରିପୋର୍ଟକୁ ଆଇନା ଦେଖାଇବା ଆରମ୍ଭ କରିଛି। ଏହା ସହିତ କୁହାଯାଉଥିଲା ଯେ ପ୍ରାଣୀଙ୍କଠାରୁ ମଣିଷଙ୍କୁ କରୋନା ସଂକ୍ରମିତ ହୋଇଛି। ତେବେ ଚାଇନାର ବର୍ତ୍ତମାନର ଦାବି ପୂର୍ବ ରିପୋର୍ଟକୁ ଭୁଲ ବୋଲି ପ୍ରମାଣିତ କରିପାରେ।
ବେଜିଂ କେମିକାଲ ଟେକ୍ନୋଲୋଜି ବିଶ୍ୱବିଦ୍ୟାଳୟର ପ୍ରଫେସର ଟୋଙ୍ଗ ୟିଗେଙ୍ଗ୍ କହିଛନ୍ତି, ଉହାନର ସି ଫୁଡ ବଜାରରୁ ମିଳିଥିବା କରୋନା ଭୂତାଣୁର ଜେନେଟିକ ସିକ୍ୱେନ୍ସିଂ କରୋନା ଆକ୍ରାନ୍ତଙ୍କ ସିକ୍ୱେନ୍ସିଂ ସହିତ ପ୍ରାୟ ସମାନ ରହିଛି। ତେଣୁ ଏଥିରୁ ଅନୁମାନ କରାଯାଉଛି , ହୁଏତ କରୋନା ଭୂତାଣୁର ଉତ୍ପତ୍ତି ମଣିଷଠାରୁ ହୋଇ ଥାଇପାରେ। ଏବେ ଚାଇନା ବୈଜ୍ଞାନିକଙ୍କ ଏହି ନୂଆ ରିପୋର୍ଟ ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ଆରମ୍ଭ ହୋଇଛି।