ବେଜିଂ,୨୫।୫ : ଆମେରିକା ପାଇଁ, ରୁଷିଆ ପରେ ବର୍ତ୍ତମାନ ଚାଇନିଜ ହ୍ୟାକରମାନେ ଏକ ବଡ ସମସ୍ୟା ପାଲଟିଛନ୍ତି। ନିକଟରେ ପ୍ରକାଶ ପାଇଥିବା ଏକ ରିପୋର୍ଟରୁ ଜଣାପଡିଛି ଯେତେବେଳେ ଆମେରିକା ଚାଇନା ଗୁପ୍ତଚର ବେଲନକୁ ଗୁଳି କରି ସେମାନଙ୍କ ତଥ୍ୟ ଅନୁସନ୍ଧାନ ଆରମ୍ଭ କରିଥିଲା, ସେହି ସମୟରେ ଆମେରିକାର ଗୁପ୍ତଚର ଏଜେନ୍ସି ଏଫବିଆଇ ଏବଂ ଟେକ କମ୍ପାନୀ ମାଇକ୍ରୋସଫ୍ଟରେ ଚାଇନାର ହ୍ୟାକରଙ୍କ ଦ୍ୱାରା ଅନେକ ହ୍ୟାକ ହୋଇଥିଲା। ଚିନ୍ତାର ବିଷୟ, ହ୍ୟାକରମାନେ ଆମେରିକାର ସିଷ୍ଟମ ବଦଳାଇବା ଆରମ୍ଭ କରିଥିବାବେଳେ କମ୍ପ୍ୟୁଟର କୋଡ ମଧ୍ୟ ଗୁଆମର ଟେଲିକମ ସିଷ୍ଟମରେ ଦେଖିବାକୁ ମିଳିଥିଲା।
ଗୁଆମ ଆମେରିକାର ବୃହତ୍ତମ ଏୟାରବେସ ମଧ୍ୟରୁ ଅନ୍ୟତମ। ଯାହା ପ୍ରଶାନ୍ତ ମହାସାଗରର ଗୁରୁତ୍ୱପୂର୍ଣ୍ଣ ବନ୍ଦରଗୁଡ଼ିକୁ ନିୟନ୍ତ୍ରଣ କରିଥାଏ। ମାଇକ୍ରୋସଫ୍ଟ ଅନୁଯାୟୀ, ଚାଇନା ସରକାର ସହିତ ସଂଯୁକ୍ତ ଏକ ହ୍ୟାକିଂ ଗ୍ରୁପ ଦ୍ୱାରା ଏହି କୋଡ ଆମେରିକୀୟ ସିଷ୍ଟମରେ ସଂଯୋଗ କରାଯାଇଥିଲା। ଏବିଷୟରେ ସୂଚନା ପାଇବା ପରେ ଆମେରିକା ସୁରକ୍ଷା ବିଭାଗରେ ଆଲୋଡ଼ନ ସୃଷ୍ଟି ହୋଇଥିଲା।
ପ୍ରକୃତରେ, ଅଧିକାରୀମାନେ କହିଛନ୍ତି ସୁରକ୍ଷା ଦୃଷ୍ଟିରୁ ଏହି ଏୟାରବେସ ଆମେରିକା ଏବଂ ଏସିଆ ମଧ୍ୟରେ ଏକ ସେତୁ ଭାବରେ କାର୍ଯ୍ୟ କରିଥାଏ। ଯଦି ଚାଇନାରୁ ତାଇୱାନ ଉପରେ ଆକ୍ରମଣ ହୁଏ, ତେବେ ଗୁଆମ ଏୟାରବେସ ଆମେରିକାର ସାମରିକ ପ୍ରତିକ୍ରିୟାର ସବୁଠାରୁ ଗୁରୁତ୍ୱପୂର୍ଣ୍ଣ କେନ୍ଦ୍ର ହେବ। ତେବେ ଚାଇନାର ଗୁଆମର ସୁରକ୍ଷା ବ୍ୟବସ୍ଥାକୁ ଟାର୍ଗେଟ କରିବା ପରେ ଚିନ୍ତା ପ୍ରକଟ କରାଯାଇଛି କୌଣସି ପ୍ରକାର ଯୁଦ୍ଧ ହେଲେ ଚାଇନାର ହ୍ୟାକରମାନେ ଆମେରିକାର ଏୟାରବେସକୁ ଟାର୍ଗେଟ କରି ଧ୍ୱଂସ କରିବାକୁ ଚେଷ୍ଟା କରିପାରନ୍ତି।