ବେଜିଂ,୨୩ ।୧୦: ଚାଇନାରେ କମ୍ୟୁନିଷ୍ଟ ପାର୍ଟି ଅଫ ଚାଇନାର ସବୁଠାରୁ ବଡ ବୈଠକ ଶେଷ ହୋଇଛି । ୭ ଦିନ ପର୍ଯ୍ୟନ୍ତ ଚାଲିଥିବା ନ୍ୟାଶନାଲ କଂଗ୍ରେସର ୨୦ତମ ଅଧିବେଶନର ଶନିବାର ଥିଲା ଶେଷ ଦିନ । ଏହି ବୈଠକ ସମୟରେ ଚାଇନାରେ ଖୁବ୍ ଡ୍ରାମା ବି ଦେଖିବାକୁ ମିଳିିଛି । ଏସବୁ ଭିତରେ ବୈଠକ ଶେଷ ହୋଇଛି । ଏବେ ଚାଇନାରେ ପୁଣିଥରେ ଜିନପିଙ୍ଗ ଯୁଗର ତୃତୀୟ ପର୍ଯ୍ୟାୟ ଆରମ୍ଭ ହେବାକୁ ଯାଉଛି ।
ବୈଠକ କଥା ଆଲୋଚନା କଲେ ଏଥର ସିପିସିରେ ଏକଛତ୍ରବାଦୀ ଶାସନର ସବୁଠାରୁ ନିଷ୍ଠୁର ଚିତ୍ର ଦେଖିବାକୁ ମିଳିଥିଲା, ଯାହା ଗତ ୨୨ ଅକ୍ଟୋବରରେ ଅନୁଶାସନରେ ପରିପୂର୍ଣ୍ଣ ଥିଲା । ଚାଇନାର ପୂର୍ବତନ ରାଷ୍ଟ୍ରପତି ହୁ ଜିନତାଓଙ୍କୁ ସୁରକ୍ଷାକର୍ମୀମାନେ ବାଧ୍ୟକରି ବାହାରକୁ ନେଇଯାଇଥିଲେ ଯଦିଓ ତାଙ୍କର ଯିବାକୁ ଇଚ୍ଛା ନ ଥିଲା । ଜିନପିଙ୍ଗଙ୍କ ନିର୍ଦ୍ଦେଶରେ ଏକଛତ୍ରବାଦୀ ଶାସନର ଏହି ଲାଇଭ୍ ପ୍ରସାରଣ ଦେଖି ବିଶ୍ୱ ଆଶ୍ଚର୍ଯ୍ୟ ହୋଇଗଲା । ଏବେ ସମୟ କହିବ ଚାଇନାରେ ଏକଛତବାଦୀ ଶାସନ କେତେ ବୃଦ୍ଧି ପାଉଛି ।
ପୂର୍ବରୁ ସିପିସିର ହାଇ ଲେଭଲ ବୈଠକରେ ପୋଲିତ ବ୍ୟୁରୋର ସଦସ୍ୟଙ୍କ ନିର୍ବାଚନ ଲାଗି ଭୋଟିଂ ଶେଷ ହୋଇଛି । ପୋଲିତ ବ୍ୟୁରୋର ୨୫ ସଦସ୍ୟ ଓ ଷ୍ଟାଣ୍ଡିଂ କମିଟିର ୭ ସଦସ୍ୟ କିଏ ହେବେ ଏହାର ଘୋଷଣା ରବିବାର ହୋଇପାରେ । ସିପିସିର ନୂଆ ଟିମରେ ଜିନପିଙ୍ଗ ସମସ୍ତ ବିରୋଧିଙ୍କୁ ହଟାଇ ଦେଇ ନିଜର ବିଶ୍ୱାସଯୋଗ୍ୟ ଲୋକଙ୍କୁ ଏଣ୍ଟ୍ରି କରାଇଛନ୍ତି ।
