ଜେନେଭା,୧୯।୧: ଚାଇନାର ଉହାନ ସହରରୁ କରୋନା ମହାମାରୀ ସୃଷ୍ଟି ହୋଇ ପୃଥିବୀର ବିଭିନ୍ନ ଦେଶକୁ ବ୍ୟାପୀ ଥିଲା। କରୋନା ସଂକ୍ରମଣ ପାଇଁ ଚାଇନା ଏବଂ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଦାୟୀ ବୋଲି ଏକ ରିପୋର୍ଟରେ ଉଲ୍ଲେଖ କରାଯାଇଛି। ଚାଇନା ଏବଂ ଡବ୍ଲ୍ୟୁଏଚ୍ଓ କୌଣସି ସାବଧାନତା ଅବଲମ୍ବନ କରି ନ ଥିବା ରିପୋର୍ଟରେ ଦର୍ଶାଯାଇଛି। ଏହି ରିପୋର୍ଟ ଇଣ୍ଡିପେଣ୍ଡେଟ୍ ପ୍ୟାନେଲ୍ ଫର୍ ପେଣ୍ଡାମିକ୍ ପ୍ରିପାର୍ଡନେସ୍ ଆଣ୍ଡ ରେସପନ୍ସ୍ ପକ୍ଷରୁ ପ୍ରକାଶ ପାଇଛି। ଚାଇନା ଚାହିଁଥିଲେ ମହାମାରୀ ସଂକ୍ରମଣକୁ ରୋକି ପାରିଥାନ୍ତା। ମାତ୍ର ଚାଇନା ଏଭଳି ପଦକ୍ଷେପ ଗ୍ରହଣ ନ କରିବାରୁ କରୋନା ମହାମାରୀ ପୃଥିବୀ ସାରା ବ୍ୟାପୀ ଯାଇଥିଲା। ୨୦୧୯ ଡିସେମ୍ବରରେ ଉହାନରେ କରୋନା ଆକ୍ରାନ୍ତଙ୍କୁ ଚିହ୍ନଟ କରାଯାଇଥିଲା। ମାତ୍ର ଚାଇନା ଅନ୍ତର୍ଜାତୀୟ ବିମାନ ଉଡ଼ାଣକୁ ବନ୍ଦ କରି ନ ଥିଲା। ସେହିପରି ଡବ୍ଲ୍ୟୁଏଚ୍ଓର ଜରୁରିକାଳୀନ କମିଟି ପକ୍ଷରୁ ୨୦୨୦ ଜାନୁୟାରୀ ୨୨ ପର୍ଯ୍ୟନ୍ତ ମହାମାରୀ ସଙ୍କଟ ସମ୍ପର୍କରେ କୌଣସି ସୂଚନା ପ୍ରଦାନ କରାଯାଇ ନ ଥିଲା, କିମ୍ବା ଏନେଇ ବୈଠକ ମଧ୍ୟ ଅନୁଷ୍ଠିତ ହୋଇ ନ ଥିଲା। ସମୟ ପୂର୍ବରୁ କମିଟି କରୋନା ମହାମାରୀ ସମ୍ପର୍କରେ ଘୋଷଣା କରିବାରେ ଅସଫଳ ରହିଥିବା ରିପୋର୍ଟରେ ପ୍ରକାଶ ପାଇଛି। ରିପୋର୍ଟ ନେଇ ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ ଏବଂ ଡବ୍ଲ୍ୟୁଏଚ୍ଓ ମହାନିର୍ଦ୍ଦେଶକ ଟେଡ୍ରୋସ୍ ଆଧାନୋମ୍ ଘେବ୍ରିସିୟସ୍ଙ୍କ ଚିନ୍ତା ବଢ଼ିବାରେ ଲାଗିଛି।