ନୂଆଦିଲ୍ଲୀ,୧୫।୧୨ : ଅରୁଣାଚଳ ପ୍ରଦେଶର ତୱାଙ୍ଗରେ ଭାରତୀୟ ସେନା ସହ ହୋଇଥିବା ଚାଇନା ସୈନ୍ୟଙ୍କ ସଂଘର୍ଷ ନେଇ ପୂର୍ବତନ ସେନା ମୁଖ୍ୟ ଜେନେରାଲ ଏମ.ଏମ ନରାଓ୍ବଣେ ମୁହଁ ଖୋଲିଛନ୍ତି। ସେ କହିଛନ୍ତି ଚାଇନା ସୈନ୍ୟ ଗଳିର ଗୁଣ୍ଡାପରି ଆଚରଣ ପ୍ରଦର୍ଶନ କରୁଛନ୍ତି। ସେମାନେ ନିଜକୁ ଏକବିଂଶ ଶତାବ୍ଦୀର ସବୁଠାରୁ ସ୍ମାର୍ଟ ଏବଂ ପେଶାଦାର ସୈନିକ ଭାବରେ ବିବେଚନା କରୁଛନ୍ତି। କିନ୍ତୁ ସେମାନଙ୍କର କାର୍ଯ୍ୟକଳାପ ରାସ୍ତାଘାଟରେ ଘୂରିବୁଲୁଥିବା ଗୁଣ୍ଡାଙ୍କ ପରି ମନେହେଉଛି। ସେମାନେ ଏହାକୁ ଯୁଦ୍ଧ ଭାବୁଛନ୍ତି, କିନ୍ତୁ ଏଭଳି କାର୍ଯ୍ୟ କେବଳ ଗୁଣ୍ଡାଗିରି।
ତାଙ୍କୁ ପଚରାଯାଇଥିଲା କି ଡିସେମ୍ବର ୯ ରେ ତୱାଙ୍ଗ ସେକ୍ଟରର ୟାଙ୍ଗସେ ଅଞ୍ଚଳରେ ଚାଇନା ଏକପାଖିଆ ଭାବରେ ଏଲଏସି ସ୍ଥିତିକୁ ବଦଳାଇବାକୁ ଚେଷ୍ଟା କରିଛି। ଏହା ୨୦୨୦ ଗଲୱାନ ଘାଟି ହିଂସାତ୍ମକ ସଂଘର୍ଷ ସହିତ ସମାନ କି?
ଏହାର ଜବାବରେ ପୂର୍ବତନ ସେନା ମୁଖ୍ୟ କହିଛନ୍ତି, କେବଳ ୨୦୨୦ ଅବା ୨୦୨୨ ଚାଇନା ସୈନ୍ୟମାନେ ପ୍ରତିବର୍ଷ ଏଭଳି ଚେଷ୍ଟା କରନ୍ତି। ପ୍ରତିବର୍ଷ ସେମାନେ ଆମ ଅଞ୍ଚଳକୁ ପ୍ରବେଶ କରିବାକୁ ୨-୪ ଥର ପ୍ରୟାସ କରନ୍ତି ଏବଂ ପ୍ରତ୍ୟେକ ଥର ସେମାନେ ଏଭଳି ଲଜ୍ଜା ଜନକ ଘଟଣାର ସମ୍ମୁଖୀନ ହୋଇଥାନ୍ତି ।
ଚାଇନା ସୈନ୍ୟଙ୍କର ମାନସିକତା ଅତି ନିମ୍ନସ୍ତରକୁ ଖସି ଆସିଛି। ଗୋଟିଏ ପଟେ ସେମାନେ ଉନ୍ନତ ବୈଷୟିକ ଜ୍ଞାନକୌଶଳ ପ୍ରଦର୍ଶନ କରିବାକୁ ଚେଷ୍ଟା କରୁଛନ୍ତି ଏବଂ ଅନ୍ୟ ପଟେ ସେମାନେ ବାଡ଼ି ଧରି ଲଢ଼ିବାକୁ ଆସୁଛନ୍ତି। ଏହା ହାସ୍ୟାସ୍ପଦ। ମୁଁ ଆତ୍ମବିଶ୍ୱାସରେ ସମଗ୍ର ଦେଶକୁ କହିପାରେ ଯେ ଆମେ ସବୁବେଳେ ପ୍ରସ୍ତୁତ, ଆମ ଉପରେ ଯାହା ଦାୟିତ୍ୱ ଦିଆଯାଏ ତାହାର ଜବାବ ଦେବାକୁ ଆମେ ସର୍ବଦା ସତର୍କ।
