ବେଜିଂ,୨୩।୯: ଆଫଗାନିସ୍ତାନର ତାଲିବାନ୍ ସରକାରକୁ ଅର୍ନ୍ତଜାତୀୟ ମାନ୍ୟତା ଦେବାକୁ ଚାଇନା ବଡ଼ଭାଇ ପଣିଆ ଦେଖାଇବା ଆରମ୍ଭ କରିଛି। ଏନେଇ ଚାଇନା ପକ୍ଷରୁ ଜୋର୍ସୋର୍ ଉଦ୍ୟମ ଜାରି ରହିଛି। ଚାଇନାର ବିଦେଶ ମନ୍ତ୍ରୀ ଓ୍ବାଙ୍ଗ ୟି କହିଛନ୍ତି ଯେ, ଶୀଘ୍ର ତାଲିବାନ୍ ସରକାର ଉପରୁ ସମସ୍ତ ଆର୍ଥିକ ପ୍ରତିବନ୍ଧକ ହଟାଇ ଦିଆଯିବା ଆବଶ୍ୟକ। ଆଫଗାନିସ୍ତାନର ବିଦେଶୀ ମୁଦ୍ରା ଭଣ୍ଡାର ଦେଶର ସମ୍ପତ୍ତି। ଏହାକୁ ସାଧାରଣ ଲୋକଙ୍କ ବିକାଶ ପାଇଁ ବ୍ୟବହାର କରାଯିବା ଉଚିତ।
ଆଫଗାନିସ୍ତାନ ଉପରେ ଚାପ ପକାଇବା ଳାଗି ଅନ୍ତର୍ଜାତୀୟସ୍ତରରେ କୌଣସି ରାଜନୈତିକ ଅବା କୂଟନୈତିକ ଘୋଡ଼ା ବେପାର କରା ନ ଯିବା ଠିକ ନୁହେଁ ବୋଲି ଓ୍ବାଙ୍ଗ୍ କହିଛନ୍ତି। ରାଜନୈତିକ ବିଶେଷଜ୍ଞଙ୍କ ଅନୁଯାୟୀ ଚାଇନା ନିଜର ସ୍ବାର୍ଥ ପାଇଁ ଏଭଳି କରୁଛି। କାରଣ, ଆଫଗାନିସ୍ତାନ ରୂପରେ ନିଜର ଶକ୍ତି ବୃଦ୍ଧି କରିବାକୁ ସେ ଆଉ ଏକ ଭଲ ସ୍ଥାନ ପାଇ ପାରିବ।
ଚାଇନାର ରଣନୀତି ଆଫଗାନିସ୍ତାନରେ ତିନୋଟି ପ୍ରସଙ୍ଗ ଉପରେ କାମ କରୁଛି। ପ୍ରଥମଟି ହେଉଛି ଏହାର ରଣନୈତିକ ଏବଂ ବ୍ୟବସାୟିକ ସୁବିଧା, ଦ୍ୱିତୀୟଟି ହେଉଛି ଭାରତର କ୍ଷତି ଏବଂ ତୃତୀୟଟି ହେଉଛି ଆମେରିକାକୁ ପାନେ ଦେବା ଷଡ଼ଯନ୍ତ୍ର। ଆଫଗାନିସ୍ତାନ ସହିତ ସମ୍ପର୍କ ଦ୍ୱାରା ଏହି ତିନୋଟି ପ୍ରସଙ୍ଗକୁ ପୂରଣ କରାଯାଇ ପାରିବ। ରୁଷିଆ ସହିତ ପାକିସ୍ତାନ ମଧ୍ୟ ଚାଇନା ପରି ତାଲିବାନ୍କୁ ମାନ୍ୟତା ଦେବା ପାଇଁ ଚେଷ୍ଟା କରୁଛନ୍ତି।
ଏଥିସହ ସେମାନେ ଆଫଗାନିସ୍ତାନ ନିକଟରେ ଥିବା ଦେଶର ଏକ ନୂତନ ଗୋଷ୍ଠୀ ସୃଷ୍ଟି କରିବା ଦିଗରେ ମଧ୍ୟ ଯୋଜନା ପ୍ରସ୍ତୁତ କରିଛନ୍ତି। ଏହି ଗୋଷ୍ଠୀରେ ଚାଇନା, ପାକିସ୍ଥାନ, ଇରାନ, ତାଜିକିସ୍ତାନ, ତୁର୍କମେନିସ୍ତାନ ଏବଂ ଉଜବେକିସ୍ତାନ ଆଦିକୁ ଅନ୍ତର୍ଭୁକ୍ତ କରାଯାଇଛି।
ଭାରତ ପକ୍ଷରୁ ପୂର୍ବରୁ ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର କହିଛନ୍ତି ଯେ, ଆତଙ୍କବାଦ ପାଇଁ ଆଫଗାନିସ୍ତାନର ଜମିକୁ କୌଣସି ପ୍ରକାରେ ବ୍ୟବହାର ନ କରିବାକୁ ତାଲିବାନ ନିଜର ପ୍ରତିବଦ୍ଧତାକୁ କାର୍ଯ୍ୟକାରୀ କରିବା ଉଚିତ। ଜୟଶଙ୍କର ଜି-୨୦ ଦେଶ ସମୁହକୁ କହିଛନ୍ତି ଯେ, ଆଫଗାନିସ୍ତାନରେ ଏଭଳି ବ୍ୟାପକ ତଥା ଅନ୍ତର୍ଭୂକ୍ତ ପ୍ରକ୍ରିୟା ଆବଶ୍ୟକ ଯେଉଁଥିରେ ଆଫଗାନିସ୍ତାନ ସମାଜର ସମସ୍ତ ବର୍ଗ ପ୍ରତିନିଧିତ୍ୱ କରିବେ।