ବେଜିଂ,୨୮।୧୧: ଚାଇନା ଏବେ ଭାରତ ବିରୋଧରେ ମିଥ୍ୟା ପ୍ରଚାର ଆରମ୍ଭ କରିଛି। ଉହାନ ସହର କରୋନାର ଏନ୍ତୁଡ଼ିଶାଳ ପାଲଟିଥିବାବେଳେ ଚାଇନା ଭାରତରୁ କରୋନାର ସଂକ୍ରମଣ ପୃଥିବୀରେ ବ୍ୟାପି ଥିବା ଭ୍ରମାତ୍ମକ ଖବର ପ୍ରସାର କରୁଛି। ଚାଇନାର ବୈଜ୍ଞାନିକ କହିଛନ୍ତି ଯେ, ଭାରତରେ ଖରାପ ସ୍ବାସ୍ଥ୍ୟ ସେବା ଯୋଗୁ ଏଠାରେ ପ୍ରଥମେ କରୋନା ଭୂତାଣୁ ସଂକ୍ରମଣ ଆରମ୍ଭ ହୋଇଥିଲା। ଭାରତରେ ଯୁବବର୍ଗଙ୍କ ସଂଖ୍ୟା ଅଧିକ ଥିବାରୁ କରୋନା ଭୁତାଣୁ ଏଠାରେ ବିନା କୌଣସି ଲକ୍ଷଣରେ ସଂକ୍ରମିତ ହେବାରେ ଲାଗିଥିଲା। ଉହାନରେ କରୋନା ଭୁତାଣୁ ଠାବ ହେବାର ବହୁ ମାସ ପୂର୍ବରୁ ଏହା ଭାରତରେ କାୟା ବିସ୍ତାର କରିଥିବା ଚାଇନା ବୈଜ୍ଞାନିକ କହିଛନ୍ତି। ୨୦୧୯ ଡିସେମ୍ବରରେ ଉହାନରେ କରୋନା ଆକ୍ରାନ୍ତଙ୍କୁ ଚିହ୍ନଟ କରାଯାଇଥିଲା। ମାତ୍ର ଏହାର ଉତ୍ପତ୍ତି ଭାରତରେ ଅନେକ ପୂର୍ବରୁ ହୋଇସାରିଥିବା ଚାଇନା ବୈଜ୍ଞାନିକ ମିଥ୍ୟା ଅଭିଯୋଗ ଆଣିଛନ୍ତି। ଚାଇନାର ବୈଜ୍ଞାନିକଙ୍କ ଅଭିଯୋଗ ପରେ ବ୍ରିଟେନ୍ର ଗ୍ଲାସଗୋ ବିଶ୍ୱବିଦ୍ୟାଳୟର ବିଶେଷଜ୍ଞ ଡେଭିଡ୍ ରବର୍ଟସନ୍ କହିଛନ୍ତି ଯେ, ଚାଇନାର ଏଭଳି ଗବେଷଣା ସମ୍ପୂର୍ଣ୍ଣ ଭାବେ ଦୋଷପୂର୍ଣ୍ଣ। ଏବେ ଏଭଳି ମିଥ୍ୟା ଅଭିଯୋଗ ନେଇ ଅନ୍ତର୍ଜାତୀୟସ୍ତରରେ ତଥା ସୋସିଆଲ୍ ମିଡ଼ିଆରେ ଚର୍ଚ୍ଚା ଆରମ୍ଭ ହୋଇଛି।