କୃଷ୍ଣପ୍ରସାଦ,୨୫ା୭(ଡି.ଏନ୍.ଏ.): ପୁରୀ ଜିଲା କୃଷ୍ଣପ୍ରସାଦ ବ୍ଲକ ଅନ୍ତର୍ଗତ କୁରୁପାଳ ଗ୍ରାମର ପ୍ରବୀର ଜେନାଙ୍କ ଝିଅ ଚାଇନା(୨୩)। ଜନ୍ମରୁ ଚାଇନା ଦିବ୍ୟାଙ୍ଗ। ଅଣ୍ଟା ପାଖରୁ ଗୋଡ଼ ପର୍ଯ୍ୟନ୍ତ କାମ କରୁନାହିଁ। ଘୋଷାରି ଘୋଷାରି ହୋଇ ଏ ଘରରୁ ସେ ଘରକୁ ଯିବା ଆସିବା କରୁଛନ୍ତିି। କଥା ବୁଝିପାରୁଛି, ହେଲେ କିଛି କହିପାରୁ ନାହିଁ। ଏନେଇ ବପ୍ରବୀର କୁହନ୍ତି, ଝିଅକୁ ଭଲ କରିବା ପାଇଁ ଓଲଟପୁର, ଭୁବନେଶ୍ୱର, କଟକ, ବ୍ରହ୍ମପୁର, ବିଶାଖାପାଟଣାର ବିଭିନ୍ନ ହସ୍ପିଟାଲରେ ଚିକିତ୍ସା ପାଇଁ ଜମି ବିକ୍ରି କରିସାରିଥିଲେ ମଧ୍ୟ ଚାଇନା ଭଲ ହେଲା ନାହିଁ। ଡାକ୍ତର କହୁଛନ୍ତି ଭଲ ହୋଇଯିବ, ହେଲେ ଟଙ୍କା ଦରକାର। ସବୁଦିନେ ଖଟିଲେ ପେଟକୁ ମୁଠାଏ ଖାଦ୍ୟ ମିଳେ। ଏତେ ଟଙ୍କା କେଉଁଠାରୁ ଆଣିବୁ, ଝିଅକୁ ଭଲ କରିବା ଲାଗି। ଚାଇନା ଦିବ୍ୟାଙ୍ଗ ହୋଇଥିବାରୁ ସରକାରଙ୍କ ପକ୍ଷରୁ ଷ୍ଟାଇପେଣ୍ଡ ଟଙ୍କା ମିଳୁଛି। ହେଲେ ରାଶନ ସାମଗ୍ରୀ ମିଳୁନାହିଁ। ଆର୍ଥିକ ଅନଟନ ଯୋଗୁୁ ଓଳିଏ ଖାଇଲେ ଓଳିିଏ ଉପବାସ ରହିବାକୁ ପଡୁଛି। ସରକାରୀ, ସାମାଜିକ ଅନୁଷ୍ଠାନ କିମ୍ବା ସହୃଦୟ ବ୍ୟକ୍ତି ସହାୟତା କଲେ ଝିଅର ଚିକିତ୍ସା ହୋଇପାରିବ ବୋଲି ପ୍ରବୀର କହିଛନ୍ତି। କୃଷ୍ଣପ୍ରସାଦ ବ୍ଲକ ବିଡିଓ ଦାୟିତ୍ୱରେ ଥିବା ତହସିଲଦାର ଉଲ୍ଲାସ କୁମାର ସେଠୀ କହିଛନ୍ତି, ତଦନ୍ତ ପରେ ସମସ୍ତ ସରକାରୀ ସୁବିଧା ଯୋଗାଇ ଦିଆଯିବ।