କାଠମାଣ୍ଡୁ, ୨୦।୯: ଭାରତରେ ବେଆଇନ ଜମି ଦଖଲ କରିଥିବା ଚାଇନା ଏବେ ନେପାଳରେ ମଧ୍ୟ ନିଜର ଦାଦାଗିରି ଆରମ୍ଭ କରିଛି। ନେପାଳ ସୀମାରେ ସୁରକ୍ଷାକର୍ମୀ ନଥିବାର ସୁଯୋଗ ନେଇ ଚାଇନା ୯ ବିଲ୍ଡିଂ ନିର୍ମାଣ କରିଛି। ନେପାଳର ହୁମ୍ଲା ଜିଲାର ସୀମାବର୍ତ୍ତୀ ଗାଁ ନାମ୍ଖାରେ ଚାଇନା ଏଭଳି ବେଆଇନ ନିର୍ମାଣ ଗୁପ୍ତରେ କରିଥିବା ଜଣାପଡ଼ିଛି। ନିର୍ମାଣ ସମ୍ପର୍କରେ ନେପାଳ ସରକାର ଅଥବା ଗୋଇନ୍ଦା ସଂସ୍ଥା ପାଖରେ କୌଣସି ଖବର ନ ଥିବା କୁହାଯାଉଛି। ବିଲ୍ଡିଂର ଆଖପାଖରେ ପ୍ରବେଶ କରିବାକୁ ନିଷେଧ କରାଯାଇଛି। ଏହି ଅଞ୍ଚଳର ଗାଁ ଅଧ୍ୟକ୍ଷ ବିଷ୍ଣୁ ବାହାଦୂର ଲାମା ନିକଟବର୍ତ୍ତୀ ଅଞ୍ଚଳରେ ବୁଲାବୁଲି କରୁଥିବା ସମୟରେ ଚାଇନା ନେପାଳ ସୀମାରେ ନିର୍ମାଣ ହୋଇଥିବା ବେଆଇନ ବିଲ୍ଡିଂ ସମ୍ପର୍କରେ ଜାଣିପାରିଥିଲେ। ବିଲ୍ଡିଂ ପାଖକୁ ନ ଯିବାକୁ ତାଙ୍କୁ ଚାଇନା ସୈନ୍ୟ ସତର୍କ ସୂଚନା ଦେଇଥିଲେ। ଅଧିକ ପଚରା ଉଚରା କରିବାରୁ ଚାଇନା ସୈନ୍ୟ ନିର୍ମାଣ ସରଞ୍ଜାମ ଧରି ଚାଇନା ସୀମାରେ ପ୍ରବେଶ କରିଯାଇଥିବା ଲାମା କହିଛନ୍ତି। ସେ ଏହାର ଫଟୋ ଉଠାଇ ନେପାଳ ସରକାରଙ୍କ ପାଖକୁ ପଠାଇଛନ୍ତି। ତେବେ ଏହାକୁ ନେଇ ବର୍ତ୍ତମାନ ସୁଦ୍ଧା ନେପାଳର ଗୃହ ମନ୍ତ୍ରଣାଳୟ ଏବଂ ବିଦେଶ ମନ୍ତ୍ରଣାଳୟ ନୀରବତା ଅବଲମ୍ବନ କରିଥିବା ଜଣାପଡ଼ିଛି। ଏହାକୁ ନେଇ ଭାରତ ଚିନ୍ତା ବଢ଼ିବାରେ ଲାଗିଛି।