ବେଜିଂ,୨୮ ।୧୧: କରୋନା ମହାମାରୀ ଏବେ ସାରା ବିଶ୍ୱକୁ ଚିନ୍ତାରେ ପକାଇ ଦେଇଥିବା ବେଳେ ଏହା ପ୍ରଥମେ ଚାଇନାର ଉହାନ ସହରରୁ ଆରମ୍ଭ ହୋଇଥିବା କୁହାଯାଏ । ଜାନୁୟାରୀ ମାସରେ ଏହା ପୃଥିବୀର ବିଭିନ୍ନ ଦେଶକୁ ବ୍ୟାପିଥିବା ବେଳେ ଡିସେମ୍ବର ୨୦୧୯ରେ ପ୍ରଥମେ ଏହା ଚାଇନାରେ ଦେଖାଯାଇଥିଲା ବୋଲି କୁହାଯାଉଛି । ଯେତେବେଳେ ଚାଇନାରେ ଏହି ମହାମରୀ ଅଣାୟତ୍ତ ହେଲା ସେତେବେଳେ ସେଠାରେ ଲକ୍ଡାଉନ ଘୋଷଣା କରାଯାଇଥିଲା । ଆଉ ଏହି ଲକ୍ଡାଉନକୁ ନେଇ ଜଣେ ଲେଖିକା ଫାଙ୍ଗ ଫାଙ୍ଗ ନିଜର ଅନୁଭୂତି ଶେୟାର କରିଥିଲେ । ଏବେ କିନ୍ତୁ ସେ ଏହି ଅନୁଭୂତିକୁ ନେଇ ବିବାଦ ମଧ୍ୟକୁ ଚାଲି ଆସିଛନ୍ତି । ଫାଙ୍ଗ ଫାଙ୍ଗ ଯେତେବେଳେ ଲକ୍ଡାଉନ ସମୟରେ ଏକା ଏକା ସମୟ କାଟୁଥିଲେ ସେ ପ୍ରତ୍ୟେକ ଦିନ ତାଙ୍କ ଅନୁଭୂତି ସୋସିଆଲ ମିଡିଆ ଡାଏରୀରେ ଲେଖୁଥିଲେ । ଏହି ଲେଖା ଅନ୍ୟମାନଙ୍କୁ ସାହସ ବି ଯେଗୋଉଥିଲା । ଏଥିରେ ସେ ସରକାର ଓ ପ୍ରଶାସନ କିପରି କରୋନା ମୁକାବିଲା କରିବାରେ ଫେଲ୍ ମାରିଛି ତାହା ମଧ୍ୟ ଉଲ୍ଲେଖ କରିଥିଲେ । ପ୍ରଥମେ ପ୍ରଥମେ ଏହାକୁ ଏତେ ଗୁରୁତ୍ୱ ଦିଆଯାଉ ନ ଥିବା ବେଳେ ଏବେ କିନ୍ତୁ ତାଙ୍କୁ ଦେଶଦ୍ରୋହୀ ବୋଲି କୁହାଯାଇଛି । ଫାଙ୍ଗ ଫାଙ୍ଗଙ୍କ ପ୍ରକୃତ ନାମ ହେଉଛି ୱାଙ୍ଗ ଫାଙ୍ଗ । ୬୫ ବର୍ଷୀୟା ଏହି ଲେଖିକା ନିଜର ଅନୁଭବ ୱିବୋ ୱେବ ଆକାଉଣ୍ଟରେ ଲେଖୁଥିଲେ । ଏହାକୁ ଚାଇନାର ଟୁଇଟର ବୋଲି ମଧ୍ୟ କୁହାଯାଏ ।
