ବେଜିଂ,୨୦ା୧: ଚାଇନାରେ କରୋନାକୁ ରୋକିବା ପାଇଁ କଡ଼ା ଲକ୍ଡାଉନ୍ ହେତୁ ଦେଶର ଲକ୍ଷଲକ୍ଷ ଲୋକ ଅତ୍ୟାବଶ୍ୟକ ସାମଗ୍ରୀ ପାଇବାକୁ ସଂଘର୍ଷ କରୁଛନ୍ତି। ଚାଇନାର ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, କରୋନା ମହାମାରୀର ଦୁଇ ବର୍ଷ ମଧ୍ୟରେ ଚାଇନା ସରକାର ଲୋକମାନଙ୍କୁ ଅତ୍ୟାବଶ୍ୟକ ସାମଗ୍ରୀ ଯୋଗାଇବାରେ ବିଫଳ ହୋଇଛନ୍ତି। ଗତ ବର୍ଷ ଡିସେମ୍ବରଠାରୁ ସିଆନ ସହରରେ ମାମଲା ବୃଦ୍ଧି ହେତୁ କଠୋର ଲକ୍ଡାଉନ୍ ଜାରି କରାଯାଇଛି। ଫଳରେ ୧୩ କୋଟି ଲୋକ ଏହି ସହରରେ ଖାଦ୍ୟ ଏବଂ ଯୋଗାଣ ଅଭାବରୁ ଅସୁବିଧାରେ ରହିଛନ୍ତି। ଏପରିକି ଖାଦ୍ୟାଭାବ ଯୋଗୁ ଗୁରୁତର ରୋଗୀମାନେ ମଧ୍ୟ ଅସୁବିଧାର ସମ୍ମୁଖୀନ ହେଉଛନ୍ତି।
ଏହା ସହିତ ସିଆନ ସହରର ଅନେକ ଲୋକ ସୋସିଆଲ ମିଡିଆରେ ଅଭିଯୋଗ କରିଛନ୍ତି ଯେ, ସେମାନେ ଦିନକୁ କେବଳ ଦଲିଆ ଖାଇ ଜୀବନଯାପନ କରୁଛନ୍ତି। ସେମାନେ ଅନାହାରରେ ଅଛନ୍ତି। ଲୋକମାନେ ସୋସିଆଲ ମିଡିଆରେ କହିଛନ୍ତି, ଖାଦ୍ୟ ଅଭାବ ପରେ ମଧ୍ୟ ଲୋକଙ୍କୁ ନିଜ ଘର ଭିତରୁ ବାହାରକୁ ଯିବାକୁ ଦିଆଯାଉ ନାହିଁ। ଓ୍ବାଇବୋ ପ୍ଲାଟଫର୍ମରେ ଜଣେ ଉପଭୋକ୍ତା ଲେଖିଛନ୍ତି, ଆମେ କିପରି ବଞ୍ଚିବୁ? ଆମେ କଣ ଖାଇବୁ? କିଛି ଦିନ ପୂର୍ବରୁ ଆମକୁ ଖାଦ୍ୟ ସାମଗ୍ରୀ କିଣିବାକୁ ଥରେ ବାହାରକୁ ଯିବାକୁ ଅନୁମତି ଦିଆଯାଇଥିଲା କିନ୍ତୁ ବର୍ତ୍ତମାନ ଏହା ମଧ୍ୟ ବାତିଲ ହୋଇଛି। ସମସ୍ତ ଅନ୍ଲାଇନ୍ ଗ୍ରୋସରୀ ଆପ ପ୍ରି-ବୁକ୍ ହୋଇଛି କିମ୍ବା ବିତରଣ କରୁନାହିଁ। ଏହା ସହିତ ଚାଇନାର ଅନ୍ୟ ଏକ ସହର ଉହାନ ଯାହାକି ୨୦୨୦ରେ କରୋନା ମହାମାରୀର କେନ୍ଦ୍ରବିନ୍ଦୁ ଭାବରେ ପରିଗଣିତ ହୋଇଥିଲା। ଏହି ସହରକୁ ମଧ୍ୟ ଲକ୍ଡାଉନ୍ କରାଯାଇଥିଲା। ପ୍ରାୟ ୧୧ ଲକ୍ଷ ଲୋକ ଦୀର୍ଘ ମାସ ପର୍ଯ୍ୟନ୍ତ ନିଜ ଘରେ ବନ୍ଦୀ ହୋଇଥିଲେ।