ନୂଆଦିଲ୍ଲୀ,୨୧।୭: ଲାଇଭ୍ ଫିଡରେ
ଖାଇବା ଚ୍ୟାଲେଞ୍ଜ କରୁଥିବାବେଳେ ଚାଇନାର ଜଣେ ୨୪ ବର୍ଷୀୟ ସୋସିଆଲ ମିଡିଆ ଇନଫ୍ଲୁଏନ୍ସରଙ୍କ ମୃତ୍ୟୁ ଘଟିଛି। ଜୁଲାଇ ୧୪ ରେ ଏହି ଘଟଣା ଘଟିଥିଲା ବୋଲି ସ୍ଥାନୀୟ ଗଣମାଧ୍ୟମ ଏହି ଖବର ରିପୋର୍ଟ କରିଛି।
ରିପୋର୍ଟରେ ଦର୍ଶାଯାଇଛି ଯେ ପାନ୍ ଜିଆଓଟିଙ୍ଗ୍ ଏପରି ଚ୍ୟାଲେଞ୍ଜ ଗ୍ରହଣ କରିବା ପାଇଁ ଜଣାଶୁଣା ଥିଲେ, ଯେଉଁଥିରେ ତାଙ୍କୁ ୧୦ ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ଖାଇବାକୁ ପଡୁଥିଲା। ସ୍ଥାନୀୟ ଚାଇନିଜ୍ ମିଡିଆ ରିପୋର୍ଟ ଅନୁଯାୟୀ ଜିଆଓଟିଙ୍ଗ୍ ପ୍ରତି ଥର ୧୦ କିଲୋଗ୍ରାମ ଖାଦ୍ୟ ଖାଉଥିଲେ। ତାଙ୍କ ପିତାମାତା ଏବଂ ଶୁଭେଛୁମାନଙ୍କ ବାରମ୍ବାର ଚେତାବନୀ ସତ୍ତ୍ୱେ ଜିଆଓଟିଙ୍ଗ ଏହା ଜାରି ରଖିବାକୁ ନିଷ୍ପତ୍ତି ନେଇଥିଲେ।
ଜିଆଓଟିଙ୍ଗଙ୍କ ଶବ ବ୍ୟବଚ୍ଛେଦ ରିପୋର୍ଟରେ ଦର୍ଶାଯାଇଛି ଯେ ତାଙ୍କ ପେଟ “ବିକୃତ” ଏବଂ ଏଥିରେ “ହଜମ ନ ହୋଇଥିବା ଖାଦ୍ୟ” ରହିବା କାରଣରୁ ତାଙ୍କର ମୃତ୍ୟୁ ଘଟିଛି। ତେବେ ଜିଆଓଟିଙ୍ଗଙ୍କ ମୃତ୍ୟୁ ସୋସିଆଲ ମିଡିଆରେ ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିଛି। ଏହିପରି ଚ୍ୟାଲେଞ୍ଜଗୁଡିକ କରିବା ଆବଶ୍ୟକତା ଉପରେ ବିଶେଷଜ୍ଞ ପ୍ରଶ୍ନ ମଧ୍ୟ ଉଠାଇଛନ୍ତି।
ଜଣେ ବ୍ୟକ୍ତି କହିଛନ୍ତି, “ମୁଁ କଦାପି ବୁଝିପାରେ ନାହିଁ ଯେ କେହି କାହିଁକି ଅନ୍ୟକାହାର ଖାଇବାକୁ ଦେଖିବାକୁ ଚାହାଁନ୍ତି?”
ବର୍ତମାନ ସମୟରେ ଏପରି ଉଦାହରଣ ଅଛି ଯେଉଁଠାରେ ଲୋକମାନେ ସୋସିଆଲ ମିଡିଆରେ ଲାଇକ୍ ଏବଂ ଲୋକପ୍ରିୟତା ହାସଲ କରିବା ପାଇଁ ଏକ ରିଲ୍ସ ସୁଟ୍ କରିବା କିମ୍ବା ଷ୍ଟଣ୍ଟ କରିବା ପାଇଁ ନିଜ ଜୀବନକୁ ବିପଦରେ ପକାଉଛନ୍ତି।
