ବେଜିଂ, ୧୧।୮: ସ୍ତ୍ରୀ-ସ୍ବାମୀଙ୍କ ମଧ୍ୟରେ ଝଗଡ଼ା ସାଧାରଣ କଥା। ଏହାର ସମାଧାନ କରି ପୁଣିଥରେ ସେମାନେ ଖୁସିରେ ଜୀବନ ବିତାଇଥାନ୍ତି। ଜଦି ଏହି ଝଗଡା ଅଣାୟତ ହୁଏ, ତେବେ ସେମାନେ ଛାଡପତ୍ର ନେଇ ପରସ୍ପରଠାରୁ ଅଲଗା ହେବାକୁ ନିଷ୍ପତ୍ତି ନିଅନ୍ତି। ହେଲେ ଚାଇନାର ଜେଜିଆଙ୍ଗ ସହରରେ ଏକ ଦମ୍ପତିଙ୍କ ମଧ୍ୟରେ ଝଗଡ଼ାକୁ ନେଇ ଏମିତି କାଣ୍ଡ ଘଟିଛି ଶୁଣିଲେ ଲୋମ ଟାଙ୍କୁରି ଉଠିବ।
କୌଣସି କଥାକୁ ନେଇ ସୁ କୋଲି(୫୫)ଓ ତାଙ୍କ ସ୍ତ୍ରୀଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଫଳରେ ରାତିରେ ସ୍ତ୍ରୀ ନିଦରେ ଶୋଇଥିବା ବେଳେ କୋଲି ତାଙ୍କୁ ମାରି ଦେଇଥିଲେ। ଏତିକିରେ ତାଙ୍କ ମନ ବୁଝି ନ ଥିଲା। ତେଣୁ ସେ ସ୍ତ୍ରୀଙ୍କର ଛୋଟ ଛୋଟ ଖଣ୍ଡକରି କାଟି ବାଥ୍ରୁମ୍ରେ ପକାଇ ଫ୍ଲସ୍ ମାରିଦେଇଥିଲେ। ତେବେ ଘର ନିକଟରେ ଥିବା ସେପ୍ଟିକ୍ ଟାଙ୍କିରୁ ମାଂସ ଖଣ୍ଡ ବାହାରିବାରୁ ଏହି ଘଟଣା ପଦାକୁ ଆସିଥିଲା। ସ୍ଥାନୀୟ ଲୋକଙ୍କ ଅଭିଯୋଗ ପରେ ପୋଲିସ ତଦନ୍ତ କରିଥିଲା। ପ୍ରଥମେ କୋଲି ଏହାକୁ ଅସ୍ବୀକାର କରିଥିଲେ। ମାତ୍ର ପରେ ସେ ଏହା ସ୍ବୀକାର କରିବା ସହ ସମସ୍ତ ଘଟଣା ବିଷୟରେ ପୋଲିସକୁ କହିଥିଲେ। ପ୍ରତିଦିନ ଝଗଡ଼ା କରି କରି ସେ ଥକ୍କି ଯାଇଥିଲେ। ତେଣୁ ସ୍ତ୍ରୀଙ୍କଠାରୁ ସବୁଦିନ ପାଇଁ ମୁକ୍ତି ଚାହୁଁଥିଲେ ବୋଲି କୋଲି କହିଛନ୍ତି।