ବେଜିଂ,୧୭।୩: ଚାଇନା ରାଷ୍ଟ୍ରପତି ସି ଜିନ୍ପିଙ୍ଗ୍ ଆସନ୍ତା ସପ୍ତାହରେ ରୁଷିଆ ଗସ୍ତ କରିବେ। ତାଙ୍କର ମସ୍କୋ ଗସ୍ତକୁ ଚାଇନା ବୈଦେଶିକ ମନ୍ତ୍ରଣାଳୟ ସ୍ପଷ୍ଟ କରିଛି। ଜିନ୍ପିଙ୍ଗ୍ ମସ୍କୋରେ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କୁ ଭେଟିବେ। ଜିନ୍ପିଙ୍ଗ୍ଙ୍କ ଏହି ଗସ୍ତ ରୁଷିଆ-ୟୁକ୍ରେନର ଯୁଦ୍ଧ ମଧ୍ୟରେ ହେଉଛି। ତେଣୁ ବିଶ୍ୱର ନଜର ତାଙ୍କ ଉପରେ ରହିଛି। ଶୁକ୍ରବାର ଚାଇନା ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ମାର୍ଚ୍ଚ ୨୦ରୁ ଚାଇନା ରାଷ୍ଟ୍ରପତି ସି ଜିନ୍ପିଙ୍ଗ୍ ରୁଷିଆ ଗସ୍ତ କରିବେ। ଚାଇନା ରାଷ୍ଟ୍ରପତି ଭାବେ ତୃତୀୟ କାର୍ଯ୍ୟକାଳରେ ଏହା ଜିନ୍ପିଙ୍ଗ୍ଙ୍କ ପ୍ରଥମ ବୈଦେଶିକ ଗସ୍ତ। ଅନ୍ୟପଟେ ରୁଷିଆର ଶାସନକ୍ଷମତା କେନ୍ଦ୍ର କ୍ରେମଲିନ୍ରୁ ମଧ୍ୟ ଏକ ବିବୃତ୍ତିଜାରି କରାଯାଇଛି। ଯେଉଁଥିରେ କୁହାଯାଇଛି। ମାର୍ଚ୍ଚ ୨୦ରୁ ୨୨ ଜିନ୍ପିଙ୍ଗ୍ ରୁଷିଆକୁ ଏକ ରାଜକୀୟ ଗସ୍ତ କରିବେ। ତାଙ୍କ ଗସ୍ତ ସମୟରେ ରୁଷିଆ ଏବଂ ଚାଇନା ସହଭାଗୀତା ସମ୍ପର୍କ ଏବଂ ରଣନୈତିକ ସହଯୋଗ ସମେତ ପ୍ରମୁଖ ପ୍ରସଙ୍ଗ ଉପରେ ଆଲୋଚନା କରାଯିବ ବୋଲି କ୍ରେମଲିନ୍ ପକ୍ଷରୁକୁହାଯାଇଛି। ଏହି ଯାତ୍ରା ଏବେ ବିଶ୍ୱସ୍ତରୀୟ ବିଶେଷଜ୍ଞମାନଙ୍କ ମଧ୍ୟରେ ଏକ ଚର୍ଚ୍ଚାର ବିଷୟ ପାଲଟିଛି।