ନୂଆଦିଲ୍ଲୀ: ଗଲ୍ଓ୍ବାନ ଘାଟିରେ ୨୦ ଭାରତୀୟ ଯବାନ ଶହୀଦ ହେବା ପରେ ଭାରତ ଚାଇନା ବିରୋଧରେ କଠୋର କାର୍ଯ୍ୟାନୁଷ୍ଠାନ ଜାରି ରଖିଛି। ଏହି ଦିଗରେ ସରକାର ପୁଣି ଥରେ ନୂଆ କାର୍ଯ୍ୟପନ୍ଥା ଗ୍ରହଣ କରିବାକୁ ଯାଉଛନ୍ତି। ଚଳିତ ଥର ଟେଲିକମ୍ ଯନ୍ତ୍ରାଂଶ ଆମଦାନୀ ଉପରେ ସରକାର ନଜର ରଖିଛନ୍ତି। ଭାରତକୁ ଟେଲିକମ ଯନ୍ତ୍ରାଂଶ ଯୋଗାଉଥିବା ଦେଶଗୁଡିକର ଏକ ତାଲିକା ସରକାର ପ୍ରସ୍ତୁତ କରିବେ। କେବଳ ବିଶ୍ୱସ୍ତ ଭେଣ୍ଡରଙ୍କଠାରୁ ଏଭଳି ଯନ୍ତ୍ରାଂଶ କ୍ରୟ କରାଯିବାକୁ ସରକାର ଯୋଜନା ରଖିଥିବା ଜଣାପଡିଛି। ଏହା ହେଲେ ସରକାର ଚାଇନାରୁ ଆସୁଥିବା ଟେଲିକମ୍ ଯନ୍ତ୍ରାଂଶକୁ ଆମଦାନୀକୁ କମାଇବା ଦିଗରେ ପଦକ୍ଷେପ ନେଇପାରନ୍ତି ବୋଲି କୁହାଯାଉଛି।
ଟେଲିକମ୍ କ୍ଷେତ୍ର ଲାଗି ଜାତୀୟ ସୁରକ୍ଷା ମାର୍ଗଦର୍ଶିକାକୁ ନିରାପତ୍ତା ସଂକ୍ରାନ୍ତ କ୍ୟାବିନେଟ କମିଟି ମଞ୍ଜୁରୀ ପ୍ରଦାନ କରିଛି। ଯୋଗାଣ ଚେନ୍ରେ ନିରାପତ୍ତାକୁ ବ୍ୟବସ୍ଥିତ କରିବା ଲାଗି ସରକାର ବିଶ୍ୱସ୍ତ ସୂତ୍ରରୁ ଟେଲିକମ୍ ଯନ୍ତ୍ରାଂଶ କ୍ରୟ କରିବାକୁ ପଦକ୍ଷେପ ନେବେ। ଦେଶ ମଧ୍ୟକୁ ଉନ୍ନତ ପ୍ରଡକ୍ଟ ଆସିଲେ ଏହା ଟେଲିକମ୍ ସେବା ଯୋଗାଣକାରୀଙ୍କ ଲାଗି ଲାଭକାରୀ ହୋଇପାରିବ ବୋଲି କେନ୍ଦ୍ର ଟେଲିକମ ମନ୍ତ୍ରୀ ରବିଶଙ୍କର ପ୍ରସାଦ ସୂଚନା ଦେଇଛନ୍ତି। ନୂଆ ପଦକ୍ଷେପ ମୁତାବକ କେବଳ ବିଶ୍ୱସ୍ତ ସୂତ୍ରରୁ ହିଁ କମ୍ପାନୀଗୁଡିକ ଟେଲିକମ୍ ଯନ୍ତ୍ରାଂଶ କ୍ରୟ କରିବାକୁ ଅନୁମତି ଲାଭ କରିବେ।
ଦେଶର ଟେଲିକମ୍ ନେଟ୍ଓ୍ବର୍କରେ କେଉଁ କମ୍ପାନୀଗୁଡିକର ଯନ୍ତ୍ରାଂଶ ଲାଗିବ ସେ ନେଇ ଏକ ତାଲିକା ସରକାର ପ୍ରସ୍ତୁତ କରିବେ। ଜାତୀୟ ନିରାପତ୍ତା ଉପପରାମର୍ଶଦାତାଙ୍କ ଅଧ୍ୟକ୍ଷତାରେ ଗଠିତ କମିଟି ପ୍ରଡକ୍ଟ ଏବଂ ସୋର୍ସକୁ ମଞ୍ଜୁରୀ ଦେବ। ଏହି କମିଟିରେ ବିଭିନ୍ନ ବିଭାଗ, ମନ୍ତ୍ରଣାଳୟର ପ୍ରତିନିଧିଙ୍କ ସମେତ ସ୍ବାଧୀନ ଏବଂ ଶିଳ୍ପର କ୍ଷେତ୍ର ପ୍ରତିନିଧି ସଦସ୍ୟ ରହିବେ। ଏହି କମିଟିକୁ ଟେଲିକମ୍ ସଂକ୍ରାନ୍ତ ଜାତୀୟ ନିରାପତ୍ତା କମିଟି କୁହାଯିବ ବୋଲି ପ୍ରସାଦ କହିଛନ୍ତି। ସୂଚନାଯୋଗ୍ୟ, ସରକାର ଚାଇନା ମୋବାଇଲ ଆପ୍ଲିକେଶନ ଉପରେ କଟକଣା ଲଗାଇବା ସହ ଏଗୁଡିକୁ ଭାରତରୁ ବ୍ୟାନ୍ କରିଛନ୍ତି।