ସମ୍ବଲପୁର, ୨୫ା୩(ବ୍ୟୁରୋ): ସମ୍ବଲପୁର ବୁର୍ଲାସ୍ଥିତ ଭିସୁଟ୍ର ପୁରାତନ ଛାତ୍ରୀ ଚିନ୍ମୟୀ ପ୍ରିୟଦର୍ଶିନୀ ସାହୁଙ୍କ ପାଣିରେ ବୁଡି ମୃତ୍ୟୁ ଘଟିଥିଲା। ବ୍ୟବଚ୍ଛେଦ ରିପୋର୍ଟ ଓ ଡାଏଟନ୍ ରିପୋର୍ଟରେ ମଧ୍ୟ ଏହା ଉଲ୍ଲେଖ ଥିବା ପୋଲିସ କହିଥିଲା। ସୋମବାର ଭିସେରା ରିପୋର୍ଟକୁ ନେଇ ପୋଲିସ ସୂଚନା ଦେଇଛି। ଏସ୍ପି ବାତୁଳା ଗଙ୍ଗାଧର କହିଛନ୍ତି, ଚିନ୍ମୟୀ ମୃତ୍ୟୁ ପୂର୍ବରୁ ନିଶାଦ୍ରବ୍ୟ ସେବନ କରିଥିଲେ। ଭିସେରା ରିପୋର୍ଟରେ ଏହା ଉଲ୍ଲେଖ ରହିଛି। ତେବେ କୌଣସି ବିଷକ୍ରିୟା ହୋଇନାହିଁ। ପୂର୍ବରୁ ସେ ନିକଟସ୍ଥ ଏକ ହୋଟେଲରେ ନିଶା କରୁଥିବା ଭିଡିଓ ପୋଲିସର ହସ୍ତଗତ ହୋଇଥିଲା। ଏବେ ତାହା ସ୍ପଷ୍ଟ ହୋଇଛି। ହେଲେ ଚିନ୍ମୟୀ କିଭଳି ବୁର୍ଲା ଥାନା ପିସି ବ୍ରିଜ୍କୁ ଗଲେ। ପାଣିକୁ କିଏ ଠେଲିଦେଇଥିଲେ ନା ନିଜେ ପଡିଗଲେ, ଯଦି ସେ ଆତ୍ମହତ୍ୟା କରିଛନ୍ତି ତା’ହେଲେ ଏହାର କାରଣ ଓ ଏହା ପଛରେ କାହାର ହାତ ରହିଛି ସେ ନେଇ ତଦନ୍ତ କରାଯାଉଛି ବୋଲି ଏସ୍ପି ଗଙ୍ଗାଧର କହିଥିଲେ ା ଅନ୍ୟପଟେ ଏହି ଘଟଣା ଏବେ ମଧ୍ୟ ରହସ୍ୟଘେରରେ ରହିଛି। ପାଣିରେ ବୁଡ଼ି ଚିନ୍ମୟୀଙ୍କ ମୃତ୍ୟୁ ଘଟିଥିବା ପୂର୍ବରୁ ଜଣାପଡୁଥିଲା। ଏ ନେଇ ପରିବାର କିମ୍ବା ସାଧାରଣ ଲୋକଙ୍କ ମନରେ ସନ୍ଦେହ ନ ଥିଲା। ହେଲେ ଯୋଜନାବଦ୍ଧ ଭାବେ ଚିନ୍ମୟୀଙ୍କୁ ହତ୍ୟା କରାଯାଇଥିବା ନେଇ ପରିବାର ଲୋକେ ଅଭିଯୋଗ କରିଥିଲେ। ଅନ୍ୟପଟେ ପୁରୁଷବନ୍ଧୁ ପ୍ରୀତିମାନ ଦେ’ଙ୍କ ସହ ଚିନ୍ମୟୀ ବ୍ରିଜ୍କୁ ଆସିଥିଲେ ବୋଲି ପୋଲିସ କହିଛି। ପ୍ରୀତିମାନ ଏକମାତ୍ର ପ୍ରତ୍ୟକ୍ଷଦର୍ଶୀ ହୋଇଥିଲେ ମଧ୍ୟ ସେ ରାଜ୍ୟ ଗୃହ ବିଭାଗ ଯୁଗ୍ମସଚିବ ପ୍ରଣବ କୁମାର ଦେଙ୍କ ପୁଅ ହୋଇଥିବାରୁ ପୋଲିସ ଅନୁକମ୍ପା ଦେଖାଉଥିବା ଅଭିଯୋଗ ହୋଇଥିଲା। ଘଟଣା ଦିନ ପ୍ରୀତିମାନ ସହ ଚିନ୍ମୟୀ ଢାବାରେ ଖାଇବା ସହ ଏକାଠି ବୁଲାବୁଲି କରି ରାତିରେ ପିସି ବ୍ରିଜ୍କୁ ଆସିଥିଲେ। ଏତେ କମ୍ ସମୟରେ ଉଭୟଙ୍କ ମଧ୍ୟରେ ଏଭଳି କ’ଣ ଘଟିଥିଲା ଯେ, ବାଇକ୍ରେ ଆସିବା ମାତ୍ରେ ବ୍ରିଜ ଉପରୁ ଚିନ୍ମୟୀ ପାଣି ଭିତରେ ପଡିଯାଇଥିଲେ।