ପାଟନା,୪।୯: କେନ୍ଦ୍ର ମନ୍ତ୍ରୀ ଚିରାଗ ପାସୱାନଙ୍କ ଲୋକ ଜନଶକ୍ତି ପାର୍ଟି ଏନଡିଏ ମେଣ୍ଟ ଓହରିଯିବାକୁ ନେଇ ଚାଲିଥିବା ଗୁଜବ ବିହାର ରାଜନୀତିରେ ଆଲୋଡ଼ନ ସୃଷ୍ଟି କରିଛି। ଏହି ଖବର ପ୍ରସାରିତ ହେବା ପରେ ଜାତୀୟ ରାଜନୀତିରେ ହଲଚଲ ଦେଖିବାକୁ ମିଳିଛି। ତେବେ ଏହି ଚର୍ଚ୍ଚା ଭିତରେ ଚିରାଗ, ଗୃହମନ୍ତ୍ରୀ ଅମିତ ଶାହାଙ୍କୁ ସାକ୍ଷାତ କରିଛନ୍ତି। ସାକ୍ଷାତକାର ପରେ ସେ ସ୍ପଷ୍ଟ କରିଛନ୍ତି ଯେ, ସେ ଦଳ ଛାଡି କୁଆଡେ ବି ଯିବେ ନାହିଁ। ଏସବୁ ମିଛ ପ୍ରଚାର କରାଯାଉଛି। ତେବେ ଚିରାଗଙ୍କ ବୟାନ ପରେ ତାଙ୍କ ଦଳର ସମସ୍ତ ଏମପି ଏବେ ଭିଡିଓ କରି ସୋସିଆଲ ମିଡିଆରେ ପୋଷ୍ଟ କରୁଛନ୍ତି।
ଏହାରି ଭିତରେ ଏଲଜେପିର ଏମପି ରାଜେଶ ବର୍ମା ଗଣମାଧ୍ୟମରେ ଏକ ସାକ୍ଷାତକାର ଦେଇଛନ୍ତି। ଯେଉଁଥିରେ ସେ କହିଛନ୍ତି, ପାର୍ଟିରେ ଏପରି ଫାଟ ପଡିବା ନେଇ ସୂଚନା ସମ୍ପୂର୍ଣ୍ଣ ଗୁଜବ ଏବଂ ଆଧାରହୀନ ଅଟେ। ଏହା ସମ୍ପୂର୍ଣ୍ଣ ଭାବରେ ମହାମେଣ୍ଟ ଓ ଆରଜେଡି ଦ୍ୱାରା ଲେଖାଯାଇଥିବା ମିଛ ସ୍କ୍ରିପ୍ଟ ଅଟେ। ତେବେ ଦଳ ଭିତରେ ଏହି ଗୁଜବ ପ୍ରଚାର କରୁଥିବା ଲୋକମାନେ ଜାଣି ରଖନ୍ତୁ ଯେ, ଏହାର ପ୍ରଭାବ ପଡିବ ନାହିଁ। ଗଣମାଧ୍ୟମରେ ହେଡ୍ଲାଇନ୍ରେ ଆସିବାକୁ ପାର୍ଟି ମୁଖପାତ୍ରମାନେ ଏପରି ମିଛ ସ୍କ୍ରିପ୍ଟ ପଡୁଛନ୍ତି।
ସେ ଆହୁରି କହିଛନ୍ତି, ବାସ୍ତବତା ହେଉଛି ଆମ ନେତା ଚିରାଗ ପାସୱାନଙ୍କ ସହ ଆମେ ଦୃଢ ଭାବରେ ଠିଆ ହୋଇଛୁ। ଚିରାଗ ତାଙ୍କୁ ରାଜନୈତିକ ପରିଚୟ ଦେଇଛନ୍ତି, ତେଣୁ ତାଙ୍କ ପ୍ରତି ବେଇମାନି କରିବି ନାର୍ହି।
