ଜଗତ୍ସିଂହପୁର, ୨୬ା୨(ପ୍ରମୋଦ କୁମାର ନାୟକ):ଗତ ସାଧାରଣ ନିର୍ବାଚନ ପରଠାରୁ ବରିଷ୍ଠ କଂଗ୍ରେସ ନେତା ତଥା ଜଗତ୍ସିଂହପୁର ପୂର୍ବତନ ବିଧାୟକ ଚିରଞ୍ଜୀବ ବିଶ୍ୱାଳ ତାଙ୍କ ନିର୍ବାଚନମଣ୍ଡଳୀରେ ଦଳୀୟ କର୍ମୀଙ୍କଠାରୁ ଏକପ୍ରକାର ଖାପଛଡ଼ା ଦେଇ ଆସୁଥିଲେ। ହେଲେ ରବିବାର ନାଉଗାଁ ବ୍ଲକ ଅନ୍ତର୍ଗତ ଚଗଲା ଦାସ ମଠ ପରିସରରେ ବନ୍ଧୁମିଳନ ଆଳରେ ଲୋକଙ୍କ ସହ ଯୋଡ଼ି ହେବାକୁ ଚେଷ୍ଟା କରିଛନ୍ତି। କିନ୍ତୁ ଯେଉଁ ଢଙ୍ଗରେ ବନ୍ଧୁମିଳନ କରିଛନ୍ତି ତାହା ପ୍ରତ୍ୟେକଙ୍କୁ ବିସ୍ମିତ କରିଛି। କାରଣ ଏହା କଂଗ୍ରେସର ବନ୍ଧୁମିଳନ ବୋଲି କୁହାଯାଇଥିବାବେଳେ ବାସ୍ତବରେ ବ୍ୟାନରରେ ଦଳୀୟ ଚିହ୍ନ ଅର୍ଥାତ୍ ହାତ ଚିହ୍ନ ନ ରହିବା ଭିନ୍ନ ଧରଣର ଇସାରା ଦେଇଛି।
ବନ୍ଧୁମିଳନରେ ଚିରଞ୍ଜୀବ କହିଥିଲେ, ଗତ ଜାନୁଆରୀ ପ୍ରଥମ ସପ୍ତାହରେ ବନ୍ଧୁମିଳନ ହେବାର ଥିଲା। ବିଭିନ୍ନ କାରଣରୁ ହୋଇପାରି ନ ଥିଲା। ବିଶେଷକରି ତାଙ୍କୁ ଦଳରୁ ନିଲମ୍ବନ କରାଯିବାରୁ ଏଥିରେ ବାଧା ଉପୁଜିଥିଲା। ଏନେଇ ମାନସିକ ଦୁଶ୍ଚିନ୍ତାରେ ଗତି କରୁଥିଲେ। ନିଲମ୍ବନ ଉଠିଲା ପରେ ପିସିସି ସଭାପତି ତାଙ୍କୁ ଫୋନ୍ କରିଥିଲେ। ତେବେ ଯାହାହେଉ ଜଗତ୍ସିଂହପୁର ନିର୍ବାଚନମଣ୍ଡଳୀ ବିଶେଷକରି ନାଉଗାଁ ବ୍ଲକର ଲୋକଙ୍କ ପାଖରେ ବିଗତ ଦିନରେ ସେ ଯେମିତି ରହି ଆସିଥିଲେ ସେମିତି ରହିବେ ବୋଲି ପ୍ରତିଶ୍ରୁତି ଦେଇଛନ୍ତି। ସାଙ୍ଗଠନିକ କାର୍ଯ୍ୟଠାରୁ ଦୂରେଇ ରହୁଥିବା ପ୍ରସଙ୍ଗକୁ ସ୍ବୀକାର କରି କହିଥିଲେ, ବାସ୍ତବରେ ଦୀର୍ଘ ୪ ବର୍ଷ ହେଲା ସେ ଦଳୀୟ ନେତା ଓ କର୍ମୀଙ୍କ ସହ ଯେପରି ମିଶିବା କଥା ସେପରି ମିଶିପାରି ନାହାନ୍ତି, ତେଣୁ ଦୁଃଖିତ। ଏହାସତ୍ତ୍ବେ କଂଗ୍ରେସ ଲୋକ ଏକଜୁଟ ହୋଇ ରହିଥିବାରୁ ସେ ଖୁସି ଅନୁଭବ କରିଥିଲେ। ଏହି ଅବସରରେ ସେ କହିଥିଲେ, ଆଉ ୮/୧୦ ଦିନ ପରେ ନିର୍ବାଚନ ମଣ୍ଡଳୀରେ ଏକ ବଡ଼ ଧରଣର କର୍ମୀ ସମ୍ମିଳନୀ ହେବ। ପ୍ରତ୍ୟେକେ ସଙ୍ଗଠିତ ହୋଇ ଆଗାମୀ କାର୍ଯ୍ୟପନ୍ଥା ଉପରେ ନିଷ୍ପତ୍ତି ନେବେ ବୋଲି ଚିରଞ୍ଜୀବ କହିଥିଲେ। ବିଜେଡିରେ ମିଶିବେ ବୋଲି ୪ ବର୍ଷ ହେବ ନିର୍ବାଚନମଣ୍ଡଳୀରେ ଚର୍ଚ୍ଚା ଲାଗି ରହୁଥିବାରୁ ସେ ସଂକ୍ରାନ୍ତରେ ପଚରାଯିବାରୁ ସେ କହିଛନ୍ତି, ସେ କହିଥିଲେ ମୂଳରୁ ମାଇପ ନାହିଁ, ପୁଅ ନାଁ ଗୋପାଳିଆ। ସେହିପରି ଯଦି ବିଜେଡିରୁ ଟିକେଟ ମିଳେ ପ୍ରଶ୍ନର ଉତ୍ତରରେ କହିଥିଲେ, ଯଦି କିମ୍ବା ସ୍ପେକୁଲେଶନର କିଛି ଉତ୍ତର ନ ଥାଏ। ତାଙ୍କ ଉପରେ ଏମିତି ବହୁତ ଆଲୋଚନା ହେଉଛି। ତେଣୁ ତା’ର କିଛି ଅର୍ଥ ନାହିଁ। ଠିକ ସମୟରେ ସେ ଏନେଇ ନିଷ୍ପତ୍ତି ନେବେ। କର୍ମୀମାନଙ୍କ ଧୈର୍ଯ୍ୟ ବହୁତ, ବରଂ ଅନ୍ୟମାନେ ଅଧୈର୍ଯ୍ୟ ହେଉଛନ୍ତି। ତେଣୁ ବ୍ୟସ୍ତ ହେବା ଉଚିତ ନୁହେଁ। ବ୍ୟାନରରେ ହାତ ଚିହ୍ନ ନ ଥିବା ସମ୍ପର୍କରେ କିନ୍ତୁ କୌଣସି ଉତ୍ତର ଦେଇ ନ ଥିଲେ। ଶେଷରେ ସମୟକୁ ଅପେକ୍ଷା କରନ୍ତୁ। ସମୟ ପାଖେଇ ଆସୁଥିଲେ ସୁଦ୍ଧା ଠିକ୍ ସମୟରେ ଠିକ୍ ନିଷ୍ପତ୍ତି ନିଆଯିବ। ଏବେଠୁ ସବୁ କହିଦେଲେ ଆଗକୁ କ’ଣ ରହିବ ବୋଲି ପାଲଟା ପ୍ରଶ୍ନ କରି ପ୍ରସଙ୍ଗକୁ ଭିନ୍ନ ମୋଡ଼ ଦେଇଥିଲେ।
ବନ୍ଧୁମିଳନରେ ନାଉଗାଁ ବ୍ଲକ ପୂର୍ବତନ ଅଧ୍ୟକ୍ଷ ପ୍ରସନ୍ନ ପରିଡ଼ା, ଜିଲା କଂଗ୍ରେସ ଉପସଭାପତି ବିଚିତ୍ରାନନ୍ଦ ଲେଙ୍କା, ବ୍ଲକ କଂଗ୍ରେସ ସଭାପତି ନିରଞ୍ଜନ ବେହୁରା, ସରପଞ୍ଚ ଲିପକ ସାହୁ, ବ୍ଲକ ପୂର୍ବତନ ଉପାଧ୍ୟକ୍ଷ ବେଣୁଧର ସ୍ବାଇଁ, ଜିଲା ପରିଷଦ ପୂର୍ବତନ ସଭ୍ୟ ଦୁଃଶାସନ ନାୟକ, ପୂର୍ବତନ ଡେରିକି ସରପଞ୍ଚ ପ୍ରମିଳା ବିଶ୍ୱାଳ, ସୁନୀଲ ମାଟିଆ ପ୍ରମୁଖ ଯୋଗଦେଇ ଦେଇଥିଲେ। କୁହାଯାଉଛି ଯେହେତୁ ଚିରଞ୍ଜୀବ କେଉଁ ଦଳରୁ ପ୍ରାର୍ଥୀ ହେବାକୁ ଚାହାନ୍ତି ସ୍ପଷ୍ଟ କରି ନ ଥିଲେ, ତେଣୁ ସମ୍ଭାବ୍ୟ ପରିସ୍ଥିତିକୁ ନେଇ ରାଜନୈତିକ ବିଶେଷଜ୍ଞମାନେ ଭିନ୍ନ ଆକଳନ କରୁଛନ୍ତି। ସେ ସମ୍ଭବତଃ ବିଜେଡିରେ ଯୋଗ ଦେଇପାରନ୍ତି ବୋଲି ଚର୍ଚ୍ଚା ହେଉଛି।