ବାଲେଶ୍ୱର ଅଫିସ, ୭।୨:ବାଲେଶ୍ୱର ଚିଟ୍ଫଣ୍ଡ ଅଦାଲତର ବିଚାରପତି ବିଶ୍ୱଜିତ୍ ଦାସ ଏକ ଠକେଇ ମାମଲାର ବିଚାର କରି ରାଜ ଗଡସନ୍ ସର୍ଭିସେସ୍ ପ୍ରାଇଭେଟ୍ ଲିମିଟେଡ୍ର ଏମ୍ଡି ଜଗଦୀଶ ମିଶ୍ରଙ୍କୁ ୫ବର୍ଷ ଜେଲ୍ଦଣ୍ଡ ସହ ୩ଲକ୍ଷ ୮୧ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନା ଅନଦେୟ ଆଉ ଅଧିକ ଅଢ଼େଇବର୍ଷ ଜେଲ୍ଦଣ୍ଡ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି।
ଗତ ୨୦୧୦ରେ ଜଗଦୀଶ ମିଶ୍ର ରାଜ ଗଡସନ୍ ସର୍ଭିସେସ୍ ପ୍ରା.ଲିଃ. ନାମରେ ଚିଟ୍ଫଣ୍ଡ ସଂସ୍ଥା କରି ଏହାର ମୁଖ୍ୟ ଅଫିସ୍ ଭୁବନେଶ୍ୱରର ନିଳାଦ୍ରୀ ବିହାର ଓ ବ୍ରାଞ୍ଚ ଅଫିସ୍ ବାଲେଶ୍ୱର ମଲ୍ଲିକାଶପୁର ସହ ମୟୂରଭଞ୍ଜ ଓ ଭଦ୍ରକ ଜିଲାରେ ଶାଖା ଖୋଲିଥିଲେ। ଜମାକାରୀଙ୍କୁ ମୂଳ ଟଙ୍କାର ୪ବର୍ଷରେ ୨ଗୁଣା ଓ ୭ବର୍ଷରେ ୪ ଗୁଣା ଫେରସ୍ତ ଦେବା ସହ ବାଲେଶ୍ୱର ଟାଉନ ଓ ଆଖପାଖ ଅଞ୍ଚଳର ସମାନ ମୂଲ୍ୟର ଜମିର ପ୍ଲଟ ଯୋଗାଇ ଦେବାର ପ୍ରତିଶ୍ରୁତି ଦେଇ କୋଟି କୋଟି ଟଙ୍କା ଉଠାଇଥିଲେ। ଏହାର ଖିଲାପ ହେବାରୁ ଜମାକାରୀମାନେ ୨୦୧୬ ଅଗଷ୍ଟ ୨୩ରେ ଅଭିଯୋଗ କରିଥିଲେ। ଏନେଇ ମାମଲା (ନଂ. ୨୧୬/୧୬) ପ୍ରାଇଜ୍ ଚିଟ୍ ମନି ସର୍କୁଲେସନ୍ (ବ୍ୟାନିଂ) ଆକ୍ଟ ୧୯୭୮ ଓ ଓଡ଼ିଶା ପ୍ରୋଟେକ୍ସନ୍ ଅଫ୍ ଇଣ୍ଟରେଷ୍ଟ ଅଫ୍ ଡିପୋଜିଟର୍ସ (ଇନ୍ ଫାଇନାନ୍ସିଆଲ୍ ଏଷ୍ଟାବ୍ଲିସ୍ମେଣ୍ଟ) ଆକ୍ଟ ୨୦୧୧ ଅନୁଯାୟୀ ରୁଜୁ କରାଯାଇଥିଲା।