ଚିତ୍ରକୋଣ୍ଡା,୧୮।୧୦(ଡି.ଏନ୍.ଏ.): ଆନ୍ଧ୍ର ଓଡିଶା ସୀମାନ୍ତ ବର୍ତ୍ତୀ ଆଦିବାସୀ ବହୁଳ ଗାଁ ତଥା ଉପାନ୍ତ ମାଲକାନଗିରି ଜିଲା ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳ ଧୂଳିପୁଟ ପଞ୍ଚାୟତର ଦୁର୍ଗମ ପାହାଡି ଜୁମଡାଙ୍ଗ ଗାଁରେ ପହଞ୍ଚିଛି ଚିତ୍ରକୋଣ୍ଡା ବ୍ଲକ ପ୍ରଶାସନ। କିଛି ଦିନ ପୂର୍ବ ଉକ୍ତ ଜୁମଡାଙ୍ଗ ଗାଁଟି ଓଡ଼ିଶା ହାତରୁ ଖସି ଯିବାକୁ ଯାଉଥିବା ନେଇ ଖବର ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲା। କାରଣ ପଡୋଶୀ ଆନ୍ଧ୍ର ପ୍ରଦେଶ ଉକ୍ତ ଗାଁର ଜନସାଧାରଣଙ୍କୁ ପାନୀୟ ଜଳ, ବିଦ୍ୟୁତ ଭଳି କେତେକ ସୁବିଧା ଯୋଗାଇ ଦେବାକୁ ନେଇ ମସୁଧା ଚଲାଇଥିଲା। ତେବେ ଏହା ଜଣାପଡ଼ିବା ପରେ ଜିଲା ପ୍ରଶାସନ ତତ୍ପର ହୋଇଉଠିଛି। ଉକ୍ତ ତଥ୍ୟକୁ ଆଧାର କରି ଜୁମଡ଼ାଙ୍ଗ ଗାଁରେ ବିଭାଗୀୟ ଅଧିକାରୀମାନେ ପହଞ୍ଚି ବିଭିନ୍ନ ମୌଳିକ ସୁବିଧା ଯୋଗାଇବା ସହ ଭତ୍ତା, ରାସନ ସାମଗ୍ରୀ, ଆଧାର କାର୍ଡ, ଜବ୍ କାର୍ଡ ବଣ୍ଟନ,ଏମ୍ଜିଏନ୍ଆର୍ଇଜିଏସ୍ରେ ଲୋକଙ୍କୁ କାମ, ଜଙ୍ଗଲ ଜମି ପଟ୍ଟା ବଣ୍ଟନ ପାଇଁ ଉଦ୍ୟମ, ଗାଁ ୬ ଗୋଟି ଷ୍ଟିଟ୍ ଲାଇଟ ଲଗାଇ ଆଲୋକିକରଣ ଓ ପିଲା ପାଠ ପଢ଼ିବା ପାଇଁ ବହି ଓ ବସ୍ତ୍ର ପ୍ରଦାନ ସହ ଅସ୍ଥାୟୀ ବିଦ୍ୟାଳୟ ଖୋଲିବା ଭଳି କିଛି ଯୋଜନା କାର୍ଯ୍ୟକାରୀ କରିବା ନିମନ୍ତେ ଆଲୋଚନା କରିଛନ୍ତି। ଜୁମଡାଙ୍ଗ ଗ୍ରାମର ବିକାଶକୁ ଆଗେଇ ନେବା ପାଇଁ ମଙ୍ଗଳବାର ଚିତ୍ରକୋଣ୍ଡା ବ୍ଲକ ଅଧକ୍ଷା ରାଜେଶ୍ୱରୀ ଖିଲଙ୍କ ନେତୃତ୍ୱରେ ଚିତ୍ରକୋଣ୍ଡା ବିଡ଼ିଓ ରଘୁନାଥ ମୁଣ୍ଡାରୀ ତଥା ଚିତ୍ରକୋଣ୍ଡା ବ୍ଲକ ପ୍ରଶାସନର ବିଭାଗୀୟ ଅଧିକାରୀମାନେ ଜୁମଡାଙ୍ଗ ଗ୍ରସ୍ତ କରି ଉକ୍ତ ଗ୍ରାମକୁ ରାସ୍ତା, ଆବାସ ଘର,ବିଦୂତ ସଂଯୋଗ କରଣ,ପାଣି ପ୍ରକଳ୍ପ ତଥା ଅନ୍ୟାନ୍ୟ ମୌଳିକ ସୁବିଧା ଯୋଗାଇ ଦେବାକୁ ଗ୍ରାମବାସୀଙ୍କ ସହ ବସି ଆଲୋଚନା କରି ଯୋଜନା କରିଥିବା ଜଣାପଡିଛି l ଖୁବ ଶୀଘ୍ର ଉକ୍ତ ଗ୍ରାମର ବିକାଶ ପାଇଁ ବହୁ ଯୋଜନା କାର୍ଯ୍ୟକାରୀ କରାଯିବ ବୋଲି ସୂଚନା ମିଳିଛି। ବିଶେଷକରି ଓଡ଼ିଶା ସୀମାନ୍ତ ଗ୍ରାମ ଗୁଡିକର ବିକାଶ ପ୍ରତି ପ୍ରଶାସନ ଗୁରୁତ୍ୱ ଦେଉଥିବା ଜଣାପଡିଛି l