ମଦିନା,୨୯ ।୪: ପାକିସ୍ତାନ ପ୍ରଧାନମନ୍ତ୍ରୀ ଶହବାଜ ଶରିଫଙ୍କ ନେତୃତ୍ୱରେ ଏକ ପ୍ରତିନିଧି ମଣ୍ଡଳଙ୍କୁ ଦେଖି ମଦିନାରେ ମସଜି-ଏ-ନବାବିରେ ଲୋକେ ଚୋର ଚୋର ବୋଲି ସ୍ଲୋଗାନ ଦେଇଛନ୍ତି । ପ୍ରଧାନମନ୍ତ୍ରୀ ତାଙ୍କ ପ୍ରତିନିଧି ମଣ୍ଡଳଙ୍କ ସହ ୩ ଦିନିଆ ଅଧିକାରୀ ସ୍ତରୀୟ ଯାତ୍ରାରେ ସୌଦି ଆରବ ପହଞ୍ଚିଛନ୍ତି । ସୋସିଆଲ ମିଡିଆ ପ୍ଲାଟଫର୍ମରେ ଏବେ ଏମିତି ଏକ ଭିଡିଓ ଭାଇରାଲ ହେଉଛି । ଯେଉଁଥିରେ ଶହ ଶହ ଲୋକ ଚୋର ଚୋର ବେଲି କହି ପାଟି କରୁଛନ୍ତି । ଯେତେବେଳେ ପ୍ରତିନିଧିମଣ୍ଡଳ ମସଜିଦ-ଏ-ନବାବି ମଧ୍ୟକୁ ଆସୁଛନ୍ତି ସେତେବେଳେ ଲୋକେ ଚୋର ଚୋର ବୋଲି କହୁଥିବା ଦେଖାଯାଇଛି । ଏହି ଘଟଣା ପରେ ପୋଲିସ ସ୍ଲୋଗାନ ଦେଉଥିବା ଲୋକଙ୍କୁ ଗିରଫ କରିଥିବା ସୂଚନା ମିଳିଛି । ଏକ ଭିଡିଓରେ ସୂଚନା ମନ୍ତ୍ରୀ ମରିୟମ ଔରଙ୍ଗଜେବ ଓ ନ୍ୟାଶନାଲ ଆସେମ୍ଲିର ସଦସ୍ୟ ଶାହଜୈନ ବୁଗତି ଅନ୍ୟ ଲୋଙ୍କ ସହ ଦେଖାଯାଉଛନ୍ତି । ଏକ ପାକିସ୍ତାନୀ ଖବରକାଗଜର ସୂଚନା ଅନୁଯାୟୀ, ଔରଙ୍ଗଜେବ ପରୋକ୍ଷ ଭାବେ ଅପଦସ୍ଥ ଇମ୍ରାନ ଖାଁଙ୍କୁ ଏହି ଘଟଣା ପାଇଁ ଦାୟୀ କରିଛନ୍ତି । ଦ ଏକ୍ସପ୍ରେସ୍ ଟ୍ରିବ୍ୟୁନ ପ୍ରକାଶ କରିଛି ଔରଙ୍ଗଜେବ କହିଛନ୍ତି, ମୁଁ ଏହି ପବିତ୍ର ସ୍ଥାନରେ ସେହି ବ୍ୟକ୍ତି(ଇମ୍ରାନ ଖାଁ)ଙ୍କ ନାମ ନେବାକୁ ଚାହୁଁନାହିଁ, କାରଣ ଏହି ଭୂମିର ବ୍ୟବହାର ମୁଁ ରାଜନୀତି ପାଇଁ କରିବାକୁ ଚାହୁଁନାହିଁ । ସେ (ପାକିସ୍ତାନୀ) ସମାଜକୁ ନଷ୍ଟ କରି ଦେଇଛନ୍ତି ।
