ଯାଜପୁରରୋଡ୍,୧୯ା୧୦(ପବିତ୍ର ରଞ୍ଜନ ମହାନ୍ତି):ଆଜିର ବ୍ୟାସନଗର ପୌର ପରିଷଦ ସେ ସମୟର ଯାଜପୁରରୋଡ୍ ବିଜ୍ଞାପିତ ଅଞ୍ଚଳ ପରିଷଦ ନାମରେ ପରିଚିତ ଥିଲା। ବଜାର କହିଲେ ଷ୍ଟେଶନ ବଜାର, ସାହୁ ମାର୍କେଟ ଓ ଚୋରଦା ମୁଖ୍ୟ ରାସ୍ତାରେ କିଛି ବ୍ୟବସାୟ ପ୍ରତିଷ୍ଠାନ ଗଢ଼ି ଉଠିଥିଲା। ପୂର୍ବରୁ କେବଳ ସହରର ପି.କେ. ମଲିକ ରାଇସମିଲଠାରେ ଦୁର୍ଗାପୂଜା ଆରମ୍ଭ ହୋଇଥିଲା। ଏହାର ୨୭ ବର୍ଷ ପରେ ଅର୍ଥାତ ୧୯୬୭ରେ ସହରର ଚୋରଦାସ୍ଥିତ କଣ୍ଟିଗାଡ଼ିଆଠାରେ ଦ୍ୱିତୀୟ ଦୁର୍ଗାପୂଜା ଆରମ୍ଭ ହୋଇଥିଲା। ଚଳିତବର୍ଷ ଏହି ପୂଜା ୫୬ ବର୍ଷରେ ପଦାର୍ପଣ କରିଛି। ପୂଜା ପାଇଁ ଗତବର୍ଷ ୩ ଲକ୍ଷ ୫୦ ହଜାର ଟଙ୍କାବ୍ୟୟ ଅଟକଳ ଥିବାବେଳେ ଚଳିତ ବର୍ଷ ୪ ଲକ୍ଷ ଟଙ୍କାର ବ୍ୟୟ ଅଟକଳ ହୋଇଥିବା କମିଟି ପକ୍ଷରୁ କୁହାଯାଇଛି।
ଏକଦା ସୁକିନ୍ଦାର ଟମକାସ୍ଥିତ ଖଣ୍ଡୁରୀ ମନ୍ଦିରରେ ନନ୍ଦରାମ ଅନ୍ତରାମ ପରିବହନ କମ୍ପାନୀର ଏକ ବୈଠକ ଅନୁଷ୍ଠିତ ହୋଇଥିଲା। ସେଠାରେ ଶେଖବୀର ସିଂ ନାମକ ଜଣେ କମ୍ପାନୀ ଅଧିକାରୀ ବୈଠକରେ ଉପସ୍ଥିତ ଥିବା ଚୋରାଦାର ଗିରିଧାରୀ ବାରିକଙ୍କୁ ଯାଜପୁରରୋଡ୍ରେ ଦୁର୍ଗାପୂଜା କରିବାକୁ ପରାମର୍ଶ ଦେବାସହ ୭ହଜାର ଟଙ୍କା ସହାୟତା ପ୍ରଦାନ କରିଥିଲେ। ଏକଥା ସେ ଚୋରଦାର ସ୍ବର୍ଗତ ଗଙ୍ଗାଧର ବଳ, ବାସୁଦେବ ମହାନ୍ତି, ସହଦେବ ବଳ, କାଳନ୍ଦୀ ସ୍ବାଇଁ, ଯୋଗୀ ମଳିକ ଓ ସୁନାକାର ବାରିକ ପ୍ରମୁଖଙ୍କ ସହ ପରାମର୍ଶ କରିବା ସହ ପୂଜା ଆରମ୍ଭ କରିଥିଲେ। ସ୍ଥାନୀୟ ଗ୍ରାମବାସୀଙ୍କ ଉଦ୍ୟମରେ ସମୁଦାୟ ୨୩ ହଜାର ଟଙ୍କା ଆର୍ଥିକ ସହଯୋଗରେ ପ୍ରଥମ କରି ମା’ଙ୍କ ପୂଜା ଆରମ୍ଭ ହୋଇଥିଲା। ମା’ଙ୍କ ପୂଜାବିଧି ବିଷୟରେ ସ୍ବର୍ଗତ ଅନାମ ପଣ୍ଡା ଓ ଗଣେଶ ମିଶ୍ର ବୈଦିକ ରୀତିନୀତି ଅନୁଯାୟୀ ପରାମର୍ଶ ଦେବାସହ ପୂଜାକାର୍ଯ୍ୟ ବହୁ ବର୍ଷ ପର୍ଯ୍ୟନ୍ତ ତୁଲାଇଥିଲେ। ବାଉଁଶ, ପାଲ ସାହାଯ୍ୟରେ ଠାକୁରଙ୍କ ଘର ନିର୍ମାଣ କରାଯାଇ ପେଟ୍ରୋମାକ୍ସ ଆଲୋକ ସାହାଯ୍ୟରେ ପୂଜା ଆରମ୍ଭ କରାଯାଇଥିଲା। ଷଷ୍ଠୀଠାରୁ ପୂଜା ଆରମ୍ଭ ହୋଇ ଏକାଦଶୀରେ ମା’ଙ୍କ ଭସାଣି ଅନୁଷ୍ଠିତ ହୋଇଥାଏ।
ବହୁବର୍ଷ ଧରି ରୂଢ଼ିଆସ୍ଥିତ ବୈତରଣୀ ଘାଟରେ ମୂର୍ତ୍ତି ବିସର୍ଜନ ହୋଇ ଆସୁଥିବାବେଳେ ବର୍ତ୍ତମାନ ପ୍ରଶାସନ ନିର୍ଦ୍ଦେଶ ଅନୁଯାୟୀ ହେଉଛି। କମିଟିରେ ସଭାପତିଭାବେ ସତ୍ୟଜିତ ପରିଡ଼ା ଓ ସମ୍ପାଦକ ଭାବେ ଜୀବନ ବାରିକ କାର୍ଯ୍ୟ ତୁଲାଉଛନ୍ତି। ମୂର୍ତ୍ତି, ତୋରଣ, ଆଲୋକ ସଜ୍ଜା ସହ ସମସ୍ତ ନୀତିକାନ୍ତି ଓ ଭକ୍ତଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା ହୋଇଥାଏ। ଅର୍ଥ ଅଭାବରୁ ସାଂସ୍କୃତିକ କାର୍ଯ୍ୟକ୍ରମ କରାଯାଇ ପାରୁନାହିଁ। କର୍ତ୍ତାଭାବେ ପ୍ରଭାତ କୁମାର ସିଂ ଶସ୍ତ୍ରିକ କାର୍ଯ୍ୟ ତୁଲାଇ ଆସୁଛନ୍ତି। ପୂର୍ବତନ ଏମ୍ପି ମୋହନ ଜେନା ଏମ୍ପି ପାଣ୍ଠିରୁ ମା’ଙ୍କ ମଣ୍ଡପ ନିର୍ମାଣ ପାଇଁ ୧ ଲକ୍ଷ ଟଙ୍କା ଅନୁଦାନ ପ୍ରଦାନ କରିଥିଲେ। କମିଟିର ସଦସ୍ୟ ମନୋଜ ବାରିକ ମା’ଙ୍କ ରୂପାର ଏକ ମୁକୁଟ ପ୍ରଦାନ କରିଥିବାବେଳେ ଜଣେ ଭକ୍ତ ସୁନାର ପତାକା କମିଟିକୁ ଦାନ କରିଥିବା କମିଟିର ପୂର୍ବତନ ସଭାପତି ଅମିୟ ବାରିକ କହିଛନ୍ତି। ପ୍ରଥମ ଉଦ୍ୟୋକ୍ତା ଶତାୟୁ ଗିରିଧାରୀ ବାରିକ ଥିବାବେଳେ ତାଙ୍କ ନାତି ଜୀବନ ସମ୍ପାଦକ ଭାବେ ଦାୟିତ୍ୱରେ ଅଛନ୍ତି। ଉକ୍ତ ପରିବାରର ତିନି ପିଢ଼ି ମା’ଙ୍କ ସେବାରେ ବର୍ତ୍ତମାନ ସୁଧା ନିୟୋଜିତ ଅଛନ୍ତି।