ବେଙ୍ଗାଲୁରୁ,୨୪ା୮: ଚନ୍ଦ୍ରୟାନ-୩ ଚନ୍ଦ୍ରର ଦକ୍ଷିଣ ମେରୁରେ ସଫଳତାର ସହ ସଫ୍ଟ ଲ୍ୟାଣ୍ଡିଂ କରିଛି। ଦକ୍ଷିଣ ମେରୁରେ ମହାକାଶ ଯାନ ଅବତରଣ କରାଇବାରେ ଭାରତ ପ୍ରଥମ ଦେଶ ଭାବେ ଇତିହାସ ସୃଷ୍ଟି କରିଛି। ତେବେ ଭାରତୀୟ ମହାକାଶ ଗବେଷଣା ସଂଗଠନ(ଇସ୍ରୋ) କ’ଣ ପାଇଁ ଦକ୍ଷିଣ ମେରୁ ବାଛିଲା ସେ ନେଇ ଇସ୍ରୋ ମୁଖ୍ୟ ଏସ୍. ସୋମନାଥ ସ୍ପଷ୍ଟ କରିଛନ୍ତି।
ଚନ୍ଦ୍ରୟାନ-୨ ମଧ୍ୟ ଚନ୍ଦ୍ରର ଦକ୍ଷିଣ ମେରୁରେ ଅବତରଣ ଉଦ୍ୟମ କରି ବିଫଳ ହୋଇଥିଲା। ଚନ୍ଦ୍ରୟାନ-୩ର ଦକ୍ଷିଣ ମେରୁ ଅବତରଣ ସ୍ବତନ୍ତ୍ର ଥିଲା, କାରଣ ଏପର୍ଯ୍ୟନ୍ତ କେହି ଉକ୍ତ ପାର୍ଶ୍ୱରେ ସଫ୍ଟ ଲ୍ୟାଣ୍ଡିଂ କରିନାହାନ୍ତି। ଚନ୍ଦ୍ରରେ ପାଣି ଓ ବରଫ ହେଉଛି ଏହାର ସବୁଠୁ ମୂଲ୍ୟବାନ ସମ୍ବଳ। ଦକ୍ଷିଣ ମେରୁରେ ପ୍ରଚୁର ପାଣି ଓ ଖଣିଜ ପଦାର୍ଥର ସନ୍ଧାନ ମିଳିବା ନେଇ ଇସ୍ରୋ ଆଶାବାଦୀ ରହିଛି। ଏନେଇ ଦକ୍ଷିଣ ମେରୁରେ ଲ୍ୟାଣ୍ଡିଂ ପାଇଁ ନିଷ୍ପତ୍ତି ନିଆଯାଇଥିଲା ବୋଲି ସୋମନାଥ କହିଛନ୍ତି।
