ଲଣ୍ଡନ,୧୯।୮: ଭାରତ-ଇଂଲଣ୍ଡ ମଧ୍ୟରେ ଖେଳାଯାଇଥିବା ଦ୍ୱିତୀୟ ଟେଷ୍ଟ ମ୍ୟାଚ୍ ଅନେକ କାରଣରୁ ସ୍ମରଣୀୟ ଥିଲା। ହେଲେ ଏହି ମ୍ୟାଚ୍ରେ ଉଭୟ ଦଳ ମଧ୍ୟରେ କିଛି ବିବାଦୀୟ ପରିସ୍ଥିତି ଉପୁଜିଥିଲା। ଏବେ ଇଂଲଣ୍ଡର ମୁଖ୍ୟ କୋଚ୍ କ୍ରିସ ସିଲଭରଉଡ୍ ଏହି ପ୍ରସଙ୍ଗରେ ଏକ ବିବୃତ୍ତି ଦେଇ କହିଛନ୍ତି, ଭାରତ ସହ ଝଗଡ଼ା କରିବାକୁ ଆମେ ଭୟ କରୁନାହୁଁ। ଯଦି ସେମାନେ ଆମକୁ ଠେଲି ଦିଅନ୍ତି ତେବେ ଆମେ ମଧ୍ୟ ଜବାବ ଦେବୁ। ଫଳାଫଳକୁ ନେଇ ଆମେ ନିରାଶ ହୋଇଛୁ ହେଲେ ଏହା ଏକ ଭଲ ଟେଷ୍ଟ ଥିଲା। ପଡ଼ିଆରେ କିଛି ମତଭେଦ ଉପୁଜିଥିଲା। ମୁଁ ଭାବୁଛି ଏହା ଭଲ। ଖେଳାଳିମାନେ ପରସ୍ପର ସହ ଯୁକ୍ତିତର୍କ କରିଥିଲେ। ମୁଁ ତାହା ଉପଭୋଗ କଲି ବୋଲି ସେ କହିଛନ୍ତି।
ଦ୍ୱିତୀୟ ଟେଷ୍ଟର ତୃତୀୟ ଦିନରେ ଜସପ୍ରୀତ ବୁମ୍ରା ଜେମ୍ସ ଆଣ୍ଡରସନଙ୍କୁ ବାଉନ୍ସର ପକାଇଥିଲେ। ହେଲେ ଆଣ୍ଡରସନ ତାକୁ ପସନ୍ଦ କରି ନ ଥିଲେ। ସେ ଫେରିବା ସମୟରେ ବୁମ୍ରାଙ୍କୁ କିଛି କହିଥିବା ନଜର ଆସିଥିଲା। କଥା ଏହିଠାରେ ସରି ନ ଥିଲା। ପରଦିନ ଭାରତୀୟ ଅଧିନାୟକ ବିରାଟ କୋହଲି ବ୍ୟାଟିଂ କରିବାକୁ ଆସିଥିଲେ। ସେ ଆଣ୍ଡରସନଙ୍କୁ ଜବାବ ଦେବାକୁ ନିଷ୍ପତ୍ତି ନେଇଥିଲେ। ସିଲଭରଉଡ୍ କହିଛନ୍ତି, ଯଦି ଆମେ ପୁଣି ଥରେ ଏଭଳି ସ୍ଥିତିରେ ପହଞ୍ଚିବୁ ତେବେ ଆମକୁ ଖୁବ୍ଶୀଘ୍ର ପ୍ଲାନ୍ ଏର ଆବଶ୍ୟକତା ପଡ଼ିପାରେ। ଆକ୍ରମଣାତ୍ମକ ଆଭିମୁଖ୍ୟ ରଖିଲେ କୌଣସି ଅସୁବିଧା ନାହିଁ ବୋଲି ସେ କହିଛନ୍ତି।