ବାଲିଗୁଡ଼ା,୧ା୭(ଡି.ଏନ୍.ଏ.)- ଆଜିବି ଅନେକ ଅଞ୍ଚଳ ରହିଛି ଯେଉଁଠି ପାଣି ଟୋପେ ପାଇଁ ଡହଳବିକଳ ହେଉଛନ୍ତି ଅଞ୍ଚଳବାସୀ। ବାରମ୍ବାର ଗୁହାରି ପରେ ମଧ୍ୟ ସମସ୍ୟା ସୁଧୁରୁନି। କନ୍ଧମାଳ ଜିଲା ବାଲିଗୁଡ଼ା ବ୍ଲକ ବାଟାଗୁଡ଼ା ଗ୍ରାମ ପଞ୍ଚାୟତ ସବାରକିଆ ଗାଁ ରେ ଦେଖିବାକୁ ମିଳିଛି ଏଭଳି ସମସ୍ୟା। ସ୍ବଚ୍ଛ ପାନୀୟ ଜଳ ବ୍ୟବସ୍ଥା ନ ଥିବାରୁ ଚୂଆପାଣି ପିଉଛନ୍ତି ଗ୍ରାମବାସୀ। ଖରା ହେଉ ବା ବର୍ଷା ସବୁ ଋତୁରେ ଏଭଳି ସମସ୍ୟା ଲାଗି ରହିଛି। ଗାଁ ରେ ରୁହନ୍ତି ୧୦ ପରିବାର। ବିଲ ମଝିରେ ଥିବା ଏକମାତ୍ର ନୂଆ ହିଁ ଏମାନଙ୍କ ସାହା ଭରଷା। ଖରାଦିନେ ଉକ୍ତ ଚୂଆରେ ପାଣି ଶୁଖି ଯାଉଥିବାବେଳେ ବର୍ଷାଦିନେ ବିଲ ପାଣି ଭରିଯାଉଛି। ବିକଳ୍ପ ବ୍ୟବସ୍ଥା ନ ଥିବାରୁ ଦୂଷିତ ପାଣି ପିଇ ବିଭିନ୍ନ ସମୟରେ ରୋଗାକ୍ରାନ୍ତ ହେଉଛନ୍ତି ଅଞ୍ଚଳବାସୀ। ବାରମ୍ବାର ଅଭିଯୋଗ ପରେ ପ୍ରଶାସନ ନଳକୂପଟିଏ ଗାଁ ରେ ଖୋଳୁନାହିଁ। ଯଥାଶୀଘ୍ର ଗଁ। ରେ କୂଅ କିମ୍ବା ନଳକୂପ ବ୍ୟବସ୍ଥା କରିବାକୁ ନିବେଦନ କରିଛନ୍ତି ଅଞ୍ଚଳବାସୀ। ଗତବର୍ଷ ବାଟାଗୁଡା ଗ୍ରାମ ପଞ୍ଚାୟତ ପକ୍ଷରୁ ସବାରକିଆ ଗାଁ ପାଇଁ କୂଅ ମଞ୍ଜୁର ହୋଇଥିଲା। ହେଲେ ଗାଁ ଲୋକେ ଖୋଳିଲେନି। ଫଣ୍ଡ ଆସିଲେ ଏ ଦିଗରେ ପଦକ୍ଷେପ ନିଆଯିବ ବୋଲି କହିଛନ୍ତି ବାଟାଗୁଡ଼ା ସରପଞ୍ଚ ମେନକା ମଲ୍ଲିକ। ଜିଲ୍ଲା ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ଦାବି କରିଛନ୍ତି ଗ୍ରାମବାସୀ।
