କୋଲକାତା,୧୪।୧୨ : ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସର ମୁଖ୍ୟ ମମତା ବାନାର୍ଜୀ ସିବିଆଇ ହେପାଜତରେ ବାଗତୁଇ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଲଲନ ଶେଖଙ୍କ ମୃତ୍ୟୁକୁ ନେଇ ଦୁଃଖ ପ୍ରକାଶ କରିବା ସହ ସିବିଆଇ ଉପରେ ପ୍ରଶ୍ନ ଉଠାଇଛନ୍ତି। ରାଜ୍ୟ ସରକାର ସିଆଇଡି ଦ୍ୱାରା ଏହାର ଅନୁସନ୍ଧାନ କରିବାକୁ ନିଷ୍ପତ୍ତି ନେଇଛନ୍ତି। ଫଳରେ ବୁଧବାର ସିଆଇଡି ସିବିଆଇ ମୁହାଁମୁହିଁ ହୋଇଛନ୍ତି। ସିଆଇଡି ପକ୍ଷରୁ ୭ଜଣ ସିବିଆଇ ଅଧିକାରୀଙ୍କ ବିରୋଧରେ ମାମଲା ରୁଜୁ କରାଯାଇଛି।
ମମତା କହିଛନ୍ତି, ସିବିଆଇ ହେପାଜତରେ କେହି କିପରି ମରିବେ? ମଙ୍ଗଳବାର ମେଘାଳୟ ଗସ୍ତ ସମୟରେ ମୁଖ୍ୟମନ୍ତ୍ରୀ ଲଲନଙ୍କ ଅସାଧାରଣ ମୃତ୍ୟୁ ବିଷୟରେ କହିଥିଲେ ଯେ, ମୁଁ ଏହି ଘଟଣାକୁ ନିନ୍ଦା କରୁଛି। ଯଦି ସିବିଆଇ ଏତେ ସ୍ମାର୍ଟ ତେବେ ଜେଲରେ କେହି କିପରି ମରିବେ? ତାଙ୍କ ସ୍ତ୍ରୀ ଏଫଆଇଆର ଦାଖଲ କରିଛନ୍ତି ଆମେ ମଧ୍ୟ ଏହି ପ୍ରସଙ୍ଗ ଉଠାଇବୁ।
ଅନ୍ୟପକ୍ଷରେ ଲଲନଙ୍କ ସ୍ତ୍ରୀ ଏହାକୁ ହତ୍ୟା ବୋଲି କହିଥିବା ବେଳେ ସିବିଆଇ ଏହାକୁ ଆତ୍ମହତ୍ୟା ବୋଲି କହିଛି। ସୂଚନାଯୋଗ୍ୟ ଯେ ସୋମବାର ବାଗତୁଇ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଲଲନଙ୍କ ମୃତଦେହ ରାମପୁରହାଟରେ ଥିବା ଅସ୍ଥାୟୀ ସିବିଆଇ କ୍ୟାମ୍ପର ଶୌଚାଳୟରେ ଝୁଲୁଥିବା ଦେଖିବାକୁ ମିଳିଥିଲା। ପୋଲିସ ଏହାର ତଦନ୍ତ କରୁଛି।
ସିବିଆଇ ଅଧିକାରୀ କହିଛନ୍ତି ଯେ ଲଲନ ଶେଖ ଆତ୍ମହତ୍ୟା କରିଛନ୍ତି। ତାଙ୍କ ସ୍ତ୍ରୀ ରେଶମା ବିବି ରାମପୁରହାଟ ଥାନାରେ ଅଭିଯୋଗ କରି କହିଛନ୍ତି ଯେ ସିବିଆଇ ଅଧିକାରୀମାନେ ତାଙ୍କ ସ୍ବାମୀଙ୍କୁ ହତ୍ୟା କରିବେ ବୋଲି ଧମକ ଦେଇଥିଲେ। ସିବିଆଇ ଦ୍ୱାରା ରେଶମା ବିବିଙ୍କ ଅଭିଯୋଗକୁ ଭିତ୍ତିହୀନ ବୋଲି କୁହାଯାଇଛି। ବୀରଭୂମ ପୋଲିସ ଏହି ଘଟଣାର ତଦନ୍ତ ଆରମ୍ଭ କରିସାରିଛି। ବର୍ତ୍ତମାନ ତଦନ୍ତକୁ ସିଆଇଡିକୁ ହସ୍ତାନ୍ତର କରାଯାଇଛି।
ସିଆଇଡି ତଦନ୍ତ ଦାୟିତ୍ୱ ନେବା ମାତ୍ରେ ସିବିଆଇ ଅଧିକାରୀଙ୍କ ବିରୋଧରେ ମାମଲା ରୁଜୁ କରାଯାଇଛି। ଏଥିରେ ଡିଜି ଏବଂ ଏସପି ସ୍ତରୀୟ ଅଧିକାରୀ ଅନ୍ତର୍ଭୁକ୍ତ। ହତ୍ୟା ଏବଂ ଆଇପିସିର ଅନ୍ୟ ଧାରା ଅନ୍ତର୍ଗତ ସେମାନଙ୍କ ବିରୋଧରେ ମାମଲା ରୁଜୁ ହୋଇଛି।