ନୂଆଦିଲ୍ଲୀ,୧୯।୧: ଦେଶର ପ୍ରମୁଖ ଘରୋଇ ସଂସ୍ଥା ତଥା ଟାଟା ଗ୍ରୁପ୍ର ସହଯୋଗୀ ସଂସ୍ଥା ଟାଟା ଷ୍ଟିଲ୍ ପକ୍ଷରୁ ନିକଟରେ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି) ମାଡ୍ରାସ ରିସର୍ଚ୍ଚ ପାର୍କରେ ସେଣ୍ଟର ଫର୍ ଇନୋଭେସନ୍ ଇନ୍ ମୋବିଲିଟି (ସିଆଇଏମ୍) ସ୍ଥାପନ କରାଯାଇଛି। ବିଶେଷକରି ଭାରତର ଗମନାଗମନ କ୍ଷେତ୍ରରେ ପ୍ରମୁଖ ଭୂମିକା ନିର୍ବାହ କରିବା ଲାଗି ଏହା ବେଶ୍ ସହାୟକ ହେବ ବୋଲି କୁହାଯାଇଛି। ଏହା ଶିକ୍ଷାନୁଷ୍ଠାନ ଓ ଗମନାଗମନ ଶିଳ୍ପ ସହ ମିଳିତଭାବେ କାର୍ଯ୍ୟ କରିବ। ଏପରିକି ଅଟୋମୋଟିଭ୍, ରେଳବାଇ ଓ ହାଇପର୍ଲୁପ୍ ଭଳି ବର୍ତ୍ତମାନ ଏବଂ ଭବିଷ୍ୟତର ଗମନାଗମନ ସୁବିଧା ଲାଗି ଉକ୍ତ କେନ୍ଦ୍ର ଏକ ପ୍ରୟୋଗାତ୍ମକ ପ୍ରଯୁକ୍ତି ବିକାଶ କରିବ। ସେହିଭଳି ଏହି ନୂଆ ଗବେଷଣା ଓ ବିକାଶ କେନ୍ଦ୍ରରେ ସିଏଡି, ସିଏଇ, ଏକ୍ସପେରିମେଣ୍ଟାଲ ରୋଲ୍ ଫର୍ମିଂ, ଡାଇନାମିକ୍ ଡେଣ୍ଟ୍ ଟେଷ୍ଟ ସିଷ୍ଟମ୍, ଏଆର୍-ଭିଆର୍ ଏକ୍ସପେରିଏନ୍ସ ସେଣ୍ଟର ଏବଂ ଗାଡ଼ିର ପୂର୍ଣ୍ଣାଙ୍ଗ ମାନଦଣ୍ଡ ନିର୍ଦ୍ଧାରଣର ବ୍ୟବସ୍ଥା ରହିବ। ପୂର୍ବରୁ ଜାମଶେଦପୁରଠାରେ ମଧ୍ୟ ଏକ ଅତ୍ୟାଧୁନିକ ଗବେଷଣା କେନ୍ଦ୍ର ସ୍ଥାପନ ହୋଇଥିଲା।
ଏ ସମ୍ପର୍କରେ ଟାଟା ଷ୍ଟିଲ୍ର ଏମ୍ଡି ଓ ସିଇଓ ଟି.ଭି.ନରେନ୍ଦ୍ରନ କହିଛନ୍ତି, ଭବିଷ୍ୟତର ନିରବଚ୍ଛିନ୍ନ, ସୁରକ୍ଷିତ ଓ ସୁଲଭ ଗମନାଗମନ ସମାଧାନ ଶିଳ୍ପ, ଶିକ୍ଷାନୁଷ୍ଠାନ ଓ ଉପକରଣ ଯୋଗାଣକାରୀଙ୍କ ସହଯୋଗରୁ ଆବିଷ୍କୃତ ହେବ, ନବସୃଜନ ଓ ଉନ୍ନତ ପ୍ରଯୁକ୍ତି ଉପରେ ଅତୁଳନୀୟ ଧ୍ୟାନ ରହିଥିବାରୁ ଗ୍ରାହକମାନଙ୍କୁ ପ୍ରତିଟି କ୍ଷେତ୍ରରେ ଉତ୍କର୍ଷ ପ୍ରତିପାଦାନ କରିବା ଏବଂ ଅଗ୍ରଗାମୀ ପ୍ରଯୁକ୍ତି ବିକାଶରେ ସର୍ବଦା ଆଗରେ ରହିବାକୁ ଟାଟା ଷ୍ଟିଲ୍ ପ୍ରତିବଦ୍ଧ ରହିଛି।