ନୂଆଦିଲ୍ଲୀ,୨୫।୭: କରୋନା ସଙ୍କଟ ଯୋଗୁ ସବୁ କ୍ଷେତ୍ର ଭଳି ଫିଲ୍ମ ଇଣ୍ଡଷ୍ଟ୍ରିରେ ମଧ୍ୟ ଏହାର ପ୍ରଭାବ ପଡ଼ିଛି। ଦେଶରେ ମାର୍ଚ୍ଚରୁ ସିନେମା ହଲ୍ ବନ୍ଦ ଥିବା ବେଳେ ପ୍ରଯୋଜକ ଓ ସିନେମା ହଲ୍ ମାଲିକଙ୍କୁ ବହୁ କ୍ଷତି ସହିବାକୁ ପଡ଼ିଛି। ଇତିମଧ୍ୟରେ ଶନିବାର ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ଏକ ବଡ଼ ଖବର ସାମ୍ନାକୁ ଆସିଛି। ସିନେମା ହଲ୍କୁ ନେଇ ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ସ୍ବରାଷ୍ଟ୍ର ମନ୍ତ୍ରଣାଳୟକୁ ଏକ ପ୍ରସ୍ତାବ ଦିଆଯାଇଛି। ଆସନ୍ତା ଅଗଷ୍ଟରୁ ଦେଶରେ ସିନେମା ହଲ୍ ଖୋଲିବା ପାଇଁ ମନ୍ତ୍ରଣାଳୟ ସଚିବ ଅମିତ ଖରେ ସ୍ବରାଷ୍ଟ୍ର ମନ୍ତ୍ରଣାଳୟର ସଚିବ ଅଜୟ ଭଲ୍ଲାଙ୍କୁ ଏକ ପ୍ରସ୍ତାବ ଦେଇଛନ୍ତି। ଅଗଷ୍ଟ ୧ରୁ ପୁରା ଦେଶରେ ସିନେମା ହଲ୍ ଖୋଲିବାକୁ ଅନୁମତି ଦିଆଯାଉ। ଏଥିପାଇଁ ଅମିତ ସ୍ବରାଷ୍ଟ୍ର ମନ୍ତ୍ରଣାଳୟକୁ ଏକ ପରାମର୍ଶ ଦେଇଛନ୍ତି। ଏଥିପାଇଁ ହଲ୍ରେ ପ୍ରଥମ ଧାଡିରେ ଗୋଟେ ସିଟ୍ ଛାଡ଼ି ଆଉ ଗୋଟିଏ ସିଟ୍ରେ ଦର୍ଶକ ବସିବେ ଏବଂ ଏହାର ପଛ ଭାଗକୁ ସମ୍ପୁର୍ଣ୍ଣ ଖାଲି ରଖାଯିବାକୁ ସେ ପରାମର୍ଶ ଦେଇଛନ୍ତି। ଏହି ନିୟମ ପୁରା ହଲ୍ରେ ଥିବା ସମସ୍ତ ସିଟ୍ଗୁଡିକରେ ଲାଗୁ ହେବ। ଅନ୍ୟପଟେ ଏହି ପ୍ରସ୍ତାବ ଉପରେ ହଲ୍ ମାଲିକ ରାଜି ନୁହଁନ୍ତି। କାରଣ ତାଙ୍କ କହିବା ଅନୁସାରେ ଏଭଳି ହେଲେ ଥରେ ଶୋ’ରେ ମାତ୍ର ୨୫ପ୍ରତିଶତ ଦର୍ଶକ ଫିଲ୍ମ ଦେଖିପାରିବେ। ଯାହାଦ୍ୱାରା ବହୁ କ୍ଷତି ସହିବାକୁ ପଡ଼ିବ। ଏହା ଅପେକ୍ଷା ସିନେମା ହଲ୍କୁ ଖୋଲିବା ପରିବର୍ତ୍ତେ ବନ୍ଦ ରଖାଯାଉ। ସୂଚନାଯୋଗ୍ୟ, ଜୁଲାଇ ୩୧ରେ ଦ୍ୱିତୀୟ ପର୍ଯ୍ୟାୟ ଅନଲକ୍ ଶେଷ ହେବାକୁ ଯାଉଛି। ତେବେ ଅଗଷ୍ଟ ୧ରୁ ଅନଲକ୍-୩ ପାଇଁ ନୂଆ ଗାଇଡ୍ଲାଇନ ଜାରି ହେବାର ସମ୍ଭାବନା ରହିଛି। ଏହାପୂର୍ବରୁ ଅମିତ ସିନେମା ହଲ୍ ଖୋଲିବାକୁ ପ୍ରସ୍ତାବ ଦେଇଥିବା ସୂଚନା ରହିଛନ୍ତି।
