ଇସ୍ଲାମାବାଦ,୭।୯: ସାରା ବିଶ୍ୱରେ ଏବେସୁଦ୍ଧା ୨କୋଟି ୭୨ ଲକ୍ଷ ୩୪ ହଜାର ୮୯୨ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇ ସାରିଲାଣି। ଏମାନଙ୍କ ମଧ୍ୟରେ ୧ କୋଟି ୯୩ ଲକ୍ଷ ୧୩ ହଜାର ୨୬ ଜଣ ସୁସ୍ଥ ହୋଇ ସାରିଲେଣି। ଅନ୍ୟପଟେ ୮ ଲକ୍ଷ ୮୭ ହଜାର ୫୫୦ ଜଣଙ୍କର କରୋନା ସଂକ୍ରମଣରେ ମୃତ୍ୟୁ ମଧ୍ୟ ହୋଇ ସାରିଲାଣି। ସାରା ବିଶ୍ୱରେ କରୋନାକୁ ନେଇ ହାହାକାର ଲାଗି ରହିଥିବା ବେଳେ ଏବେବି ଏହାର ପ୍ରକୋପ ଜାରି ରହିଛି। କିଛି ଦେଶରେ ଲକ୍ଡାଉନ ନିୟମ ଲାଗୁ କରାଯାଇଥିବା ବେଳେ ଆଉ କିଛି ଦେଶରେ ବିଗିଡି ଚାଲିଥିବା ଅର୍ଥ ବ୍ୟବସ୍ଥାକୁ ଦୃଷ୍ଟିରେ ରଖି ଅନଲକ୍ ନିୟମ ଲାଗୁ କରାଯାଇଛି। ପାକିସ୍ତାନରେ କରୋନାକୁ ନେଇ ଲକ୍ଡାଉନ୍ କରାଯିବା ପରଠାରୁ ଏହାର ଅର୍ଥବ୍ୟବସ୍ଥା ଆହୁରି ବିଗିଡି ଯାଇଛି। ତେଣୁ କରୋନା ସଂକ୍ରମଣର ପାଖାପାଖି ୬ ମାସ ପରେ ଏବେ ସେଠାରେ ସିନେମା ହଲ୍ ଓ ମଲ୍ଟିପ୍ଲେକ୍ସ ଖୋଲିବାକୁ ସରକାର ନିଷ୍ପତ୍ତି ନେଇଛନ୍ତି। ସେପ୍ଟେମ୍ବର ୧୧ରେ ସେଠାରେ ସିନେମା ହଲ୍ ଓ ମଲ୍ଟିପ୍ଲେକ୍ସ ଖୋଲିବ ବୋଲି ସୂଚନା ମିଳିଛି। ଦୁଇଟି ହଲିଉଡ୍ ଫିଲ୍ମ ସହ ସିନେମା ହଲ୍ ଖୋଲିବ ବୋଲି ଜଣାପଡିଛି। ସୂଚନାଯୋଗ୍ୟ, କରୋନା ସଂକ୍ରମଣରେ ଏପର୍ଯ୍ୟନ୍ତ ପାକିସ୍ତାନରେ ୬,୩୮୨ ଜଣଙ୍କ ମୃତ୍ୟୁ ହୋଇ ସାରିଲାଣି। ପାକିସ୍ତାନ ସ୍ବାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁଯାୟୀ, ଏବେସୁଦ୍ଧା ପାକିସ୍ତାନରେ ମୋଟ କରୋନା ସଂକ୍ରମିତଙ୍କ ସଂଖ୍ୟା ୨,୯୮,୫୦୯ରେ ପହଞ୍ଚିଛି। ସେଠାରେ ଏବେ ଭାରତୀୟ ଫିଲ୍ମ ପ୍ରଦର୍ଶନ ଉପରେ ପ୍ରତିବନ୍ଧକ ରହିବ ବୋଲି ବିଶେଷ ସୂତ୍ରରୁ ମିଳିଥିବା ସୂଚନାରୁ ଜଣାପଡିଛି।
