ଭୁବନେଶ୍ୱର,୧୦ା୯(ବ୍ୟୁରୋ):ଓଡ଼ିଶା ଜନ୍ମିତ ବିଶିଷ୍ଟ ସିନେମାଟୋଗ୍ରାଫର ଗାଗାରିନ ମିଶ୍ରଙ୍କ ବୁଧବାର ପରଲୋକ ଘଟିଛି। ମୁମ୍ବାଇର ଏକ ଘରୋଇ ହସ୍ପିଟାଲରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ତାଙ୍କୁ ୬୭ ବର୍ଷ ହୋଇଥିଲା। ହୃଦ୍ଘାତରେ ତାଙ୍କର ମୃତ୍ୟୁ ଘଟିଥିବା ପରିବାର ପକ୍ଷରୁ କୁହାଯାଇଛି। ସେ ‘ଫୁଲଚନ୍ଦନ’, ‘ନଈ ସେପାରି କନକ ଗୋରୀ’ ଭଳି ବହୁ ସୁପରହିଟ ଓଡ଼ିଆ ଫିଲ୍ମରେ କାମ କରି ନିଜ ଛାପ ଛାଡ଼ିଯାଇଛନ୍ତି। ୨୦୧୨ରେ ଚଳଚ୍ଚିତ୍ର ‘ନଈ ସେପାରି କନକ ଗୋରୀ’ ପାଇଁ ତାଙ୍କୁ ଓଡ଼ିଶା ରାଜ୍ୟ ଚଳଚ୍ଚିତ୍ର ପୁରସ୍କାର ମିଳିଥିଲା। କେବଳ ଓଡ଼ିଆ ଚଳଚ୍ଚିତ୍ର ନୁହେଁ, ‘ବେତାବ’, ‘ଚାନ୍ଦନୀ’, ‘ତେଜାବ’, ‘ରାମ ଅବତାର’, ‘ୱଜୁଦ’, ’ପ୍ୟାର୍ କି ଜିତ୍’ ଭଳି ବହୁ ହିନ୍ଦୀ ଫିଲ୍ମରେ ସେ ମଧ୍ୟ କାମ କରିଥିଲେ। ଗତ ଅଗଷ୍ଟରେ ଗାଗାରିନ୍ଙ୍କ ସାନ ଭାଇ ତଥା ଜଣାଶୁଣା ଫିଲ୍ମ ଏଡିଟର ଦେବେନ ମିଶ୍ରଙ୍କର ମଧ୍ୟ ହୃଦ୍ଘାତରେ ମୃତ୍ୟୁ ଘଟିଥିଲା।
